ގދ. ތިނަދޫ ކޯޓުގެ މެޖިސްޓްރޭޓް އިބްރާހިމް ރަޝީދު ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހަށް ފޮނުވައިފިއެވެ.
މެޖިސްޓްރޭޓް އިބްރާހިމް ރަޝީދު މަގާމުން ވަކި ކުރުމަށް މަޖިލީހަށް ފޮނުވަން ނިންމީ މި މަހުގެ 12 ވަނަ ދުވަހު ބޭއްވި ޖުޑީޝަލް ސާވިސް ކޮމިޝަން (ޖޭއެސްސީ) ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
ހޯމަ ދުވަހު ޖޭއެސްސީން ކުރި ޓްވީޓްގައި ބުނެފައިވަނީ އިބްރާހިމް ރަޝީދު ފަޑިޔާރުކަމުން ވަކިކުރުމަށް ފޮނުވާފައިވާ ކަމަށެވެ. ނަމަވެސް އޭނާ ވަކި ކުރެވޭނީ މަޖިލީހުގެ ތަޅުމުން އެކަން ފާސްކޮށްގެންނެވެ. އަދި ފަނޑިޔާރަކު ވަކި ކުރެވޭނީ ޖަލްސާގައި ބައިވެރިވާ މެމްބަރުންގެ ތެރެއިން ތިން ބައި ކުޅަ ދެ ބައި މެމްބަރުންގެ ވޯޓު ލިބިގެންނެވެ.
މިއީ ޖޭއެސްސީގެ ތާރީހުގައި ފަނޑިޔާރަކު މަގާމުން ވަކި ކުރަން މަޖިލީހަށް ހުށަހެޅި ފުރަތަމަ ފަހަރެއެވެ.
ބަދުއަހުލާގީ މައްސަލައެއްގައި އިބްރާހިމް ރަޝީދު ފަނޑިޔާރުކަމުން ވަކިކުރުމަށް ޖޭއެސްސީން ނިންމާފައިވާއިރު، ރ. އަތޮޅު މާކުރަތު މެޖިސްޓްރޭޓް ކޯޓުގައި ވަޒީފާ އަދާކުރަމުންދާ ތިން އަންހެން މުވައްޒަފަކަށް ކޯޓުގެ އިސް މެޖިސްޓްރޭޓް އަދުނާން ހުސައިން ޖިންސީ ފުރުއްސާރަކޮށް ސިހުރު ހެދި މައްސަލައެއް ޖޭއެސްސީއަށް ވަނީ ހުށައަޅާފައެވެ.
