މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އެކި ރަށްރަށުގައި ކުރިއަށް ގެންދިޔަ މަޝްރޫއުތަކުގެ ތެރެއިން 13 ރަށެއްގައި ހިންގި މަޝްރޫއުތައް އެއްކޮށް ނިމިފައިވާ ކަމަށް އެ ކުންފުނިން ބުނެފިއެވެ.
އާދިއްތަ ދުވަހު ނޫސްވެރިންނާ ބައްދަލުކުުރައްވައި އެމްޓީސީސީގެ ކޮންސްްޓްރަކްޝަން އެންޑް ޕްރޮޖްކްޓް މެނޭޖްމަންޓްގެ ހެޑް އޮފް ޑިޕާޓްމަންޓް އަހުމަދު ލަތީފް ވިދާޅުވީ، އެ ކުންފުނިން މި ވަގުތު 24 މަޝްރޫއެއް ކުރިއަށްގެންދާ ކަމަށާއި، 13 ރަށެއްގައި ހިންގަމުންދިޔަ މަޝްރޫއުތައް އެއްކޮށް ނިމިފައިވާ ކަމަށެވެ. އޭގެ ތެރޭގައި ފަސް ރަށެއްގެ ބަނދަރުގެ މަސައްކަތާއި، އެއް އެއާޕޯރޓުގެ މަސައްކަތް ހިމެނޭ ކަމަށް ލަތީފް ވިދާޅުވިއެވެ.
ޖުމުލަ 13 ރަށެއްގެ މަސައްކަތް އަޅުގަނޑުމެންނަށް މި އަހަރު ނިމިފައި މިވަނީ، އޭގެ ތެރޭގައި މި ހިމެނެނީ ފަސް ބަނދަރެއްގެ މަސައްކަތާއި، މާލޭ އިންޑަސްޓްރިއަލް ވިލެޖް، މި ޕްރޮޖެކްޓަކީ މީދެން 2016 ވަނަ އަހަރުން ފެށިގެން އަޅުގަނޑުމެން ކުރިއަށްގެންދާ މަސައްކަތެއް، މި މަސައްކަތުގަ ދެން އެކި ސްޓޭޖުގަ އެކި ބަދަލުތައް ގެނެވި އެހެން ނަމަވެސް މިއަހަރު ވަނީ މީގެ ގާތްގަނޑަކަށް ހުރިހާ މަސައްކަތެއްވެސް ނިމިފައި، ދެން މި ހިމެނެނީ އެއް އެއާޕޯރޓްގެ މަސައްކަތް މިއަހަރު ނިމިފަ، ދެން ވޭސްޓް މެނޭޖެމަންޓް، އެދެން ވަރަށް ކުދިކުދި ޕްރޮޖެކްޓު، އެހެން ނަމަވެސް އޭގެވެސް ގާތްގަނޑަކަށް ދެ ޕްރޮޖެކްޓެއްގެ މަސައްކަތް އަޅުގަނޑުމެންނަށް ކުރެވިފަވޭ،ކޮންސްްޓްރަކްޝަން އެންޑް ޕްރޮޖްކްޓް މެނޭޖްމަންޓްގެ ހެޑް އޮފް ޑިޕާޓްމަންޓް އަހުމަދު ލަތީފް
ލަތީފް އިތުރަށް ވިދާޅުވީ، ފާއިތުވި ހަ މަސް ތެރޭގައި ބޮޑެތި ބަދަލުތަކެއް ގެނެވިފައިވާ ކަމަށާއި، އެ ބަދަލުތަކާ އެކު އިތުރު މަސައްކަތްތައް ކުންފުންޏަށް ލިބެމުންދާ ކަމަށެވެ. އެގޮތުން ހަތް ރަށެއްގެ މަގު ހެދުމުގެ މަސައްކަތް މުޅިން އަލަށް ލިބިފައިވާ ކަމަށާއި، ކުންފުނީގެ އަމާޒަކީ ގިނަ މަސައްކަތްތައް ހޯދުން ކަަމަށް ވެސް އޭނާ ވިދާޅުވިއެވެ. އެ ގޮތުން ޕީއެސްއައިޕީ ބަޖެޓުގައި ހިމަނާފައިވާ ޕްރޮޖެކްޓްތަކަށް އެމްޓީސީސީން ބިޑަށް ލާނެ ކަމަށް ވެސް ލަތީފް ވިދާޅުވިއެވެ.
މި ބައްދަލުވުމުގައި އެމްޓީސީސީގެ ސީއީއޯ ހަސަން ޝާހު ވެސް ބައިވެރިވެ ވަޑައިގެންފައިވާއިރު، ޝާހު ވިދާޅުވީ، މިހާރު ކުރިއަށްދާ ބައެއް މަސައްކަތްތަކުގެ ތެރޭގައި ހަ ރަށެއްގެ ބަނދަރުގެ މަޝްރޫ އާއި، ގޮނޑުދޮށް ހިމާޔަތް ކުރުމުގެ ތިން މަޝްރޫއާއި، ދެ ރަށެއްގެ އެއާޕޯރޓުގެ މަސައްކަތް ހިމެނޭ ކަމަށެވެ.
ޝާހު އެހެން ވިދާޅުވެފައިވާއިރު، ހއ. ހޯރަފުށީ އެއާޕޯރޓުގެ ބިން ހިއްކުމުގެ މަސައްކަތުގެ 60 އިންސައްތަ ނިމިފައިވާ ކަމަށާއި، މި އަހަރު ތެރޭގައި އެ މަސައްކަތް އެއްކޮށް ނިންމާލެވޭނެ ކަމަށް ލަފާ ކުރެވޭ ކަމަށް އެމްޓީސީސީން ވަނީ ބުނެފައެވެ. އޭގެ އިތުރުން ވެސް ގދ. ފަރެސްމާތޮޑާގައި އަޅާ އެއާޕޯރޓުގެ ބިން ހިއްކުމުގެ މަސައްކަތުގެ 80 އިންސައްތަ ނިމިފައިވާ ކަމަށާއި، ޖުލައިގެ ނިޔަލަށް އެ ޕްރޮޖެކްޓުގެ ދަށުން އެމްޓީސީސީއާ ހަވާލުކުރެވިފައިވާ މަސައްކަތްތައް ނިންމާލެވޭނެ ކަމަށް އެ ކުންފުނިން ބުނެފައިވެއެވެ.
