ވޭތުވެދިޔަ ސަރުކާރުތަކުން ވަނީ ޒުވާނުން ކުޅިވަރުގެ އަވައިގައި ޖައްސާފަ: ނައިބު ރައީސް
23 ޖޫން 2019 | އާދީއްތަ 08:06ޒުވާނުންނަށް ހެޔޮ އެދޭ ވެރިއަކު ކަންތައް ކުރައްވާނެ އުސޫލެއް ނޫން
ހުނަރުވެނި ޝޯގައި ނައިބު ރައީސް ފައިސަލް ނަސީމް ވާހަކަފުޅު ދައްކަވަނީ
ވޭތުވެދިޔަ ސަރުކާރުތަކުން ވަނީ ކޮންމެ ވެސް ބޭނުމެއްގައި، ޒުވާނުން ކުޅިވަރާއި މަޖަލުގެ އަވައިގައި ޖައްސާފަ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ އާދިއްތަ ދުވަހު ދަރުބާރު ގޭގައި ބޭއްވި "ހުނަރުވެނި" ޝޯގައި ވާހަކަފުޅު ދައްކަވަމުންނެވެ.
ނައިބު ރައީސް ފައިސަލް ވިދާޅުވީ ވޭތުވެ ދިޔަ އަހަރުތަކުގައި ކުރީގެ ސަރުކާރުތަކުން ވަނީ ކޮންމެވެސް ބޭނުމެއް އޮވެގެން، ޒުވާނުން ކުޅިވަރާ މަޖަލުގެ އަވައިގައި ޖެއްސުމަށް ފަހު އެކަމުގެ ތެރެއަށް ދޫކޮށްލާފައި ކަމަށެވެ.
ފައިސަލް ވިދާޅުވީ އެއީ ޒުވާނުންނަށް ހެޔޮ އެދޭ ވެރިއަކު ކަންތައް ކުރައްވާނެ އުސޫލެއް ނޫން ކަމަށާއި އެފަދަ ވެރިން ގައުމު ތަރައްގީ ކުރުމަށްޓަކައި، ޒުވާނުން ބިނާ ކުރައްވާނެ ކަަށެވެ.
މީގެ އިތުރުން، ހުންރުވެރިން ބިނާކުރުމަށްޓަކައި ގިނަ ގުނަ މަސައްކަތްތަކެއް ކުރައްވާނެ ކަމަށް ފައިސަލް ވިދާޅުވިއެވެ.
ހުނަރުވެރިކަމުގެ މަސައްކަތްތަކަކީ އެންމެ ޅަފަތުގެ ދައުރުން ފެށެން ޖެހޭ ކަންތައްތައް ކަމާއި ރައީސް އިބްރާހިމް މުހައްމަދު ސޯލިހުގެ ސަރުކާރުގެ އެންމެ ބޮޑު އެންމެ ބޮޑު އަމާޒަކީ ތައުލީމީ ކަންތައްތައް ރަނގަޅު ކުރުން ކަން ފައިސަލްގެ ވާހަކަފުޅުގައި ފާހަގަ ކުރެއްވިއެވެ.
ހަމައެކަނި ވަކި ނަތީޖާއެއް ހާސިލް ކުރުމަށްޓަކައި ކުރީގެ ސަރުކާރުތަކުން މަސައްކަތް ކުރިތަން ފެނިވަޑައިގަތް ކަމަށާއި މަތީ ވަނަތަކެއް ހާސިލް ކުރުމަށްޓަކައި ވަރަށް ބޮޑަށް މަސައްކަތް ކުރި ކަމަށް ފައިސަލް ވިދާޅުވިއެވެ. އެއާ ހިލާފަށް މިސަރުކާރުން މަސައްކަތް ކުރަނީ ފަންނުވެރިން ގާބިލު ކުރުމަށް ކަމަށް ފައިސަލް ވިދާޅުވިއެވެ.
