ހާލަތު ގޯސްވީ އޮފިސަރުން އަމަލުކުރި ގޮތުން: ޕްރިޒަންސް ކޮމިޝަނަރު މުނާޒް
22 ޖޫން 2019 | ހޮނިހިރު 16:51އުސޫލުގެ ތެރެއިން ކަންކުރި ނަމަ ހާލަތު އިތުރަށް ގޯސްވެގެން ނުދިޔައީސް
ކޮމިޝަނަރ އޮފް ޕްރިޒަންސް އަބްދުﷲ މުނާޒް މަޖިލީހުގެ ކޮމިޓީގައި
މާފުށީ ޖަލުގައި އޮފިސަރުންނާއި ގައިދީންނާއި ދެމެދު ހިނގި ހަމަނުޖެހުމުގައި، ހާލަތު ގޯސްވާން މެދުވެރިވީ ޖަލު ބަލަހައްޓަން ތިބި އޮފިސަރުން ކަންތައް ކުރެއްވި ގޮތުން ކަމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒް ވިދާޅުވެއްޖެއެވެ.
ހޮނިހިރު ދުވަހު ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީ އަދި ހިއުމަން ރައިޓްސް އެންޑް ޖެންޑަރ ކޮމިޓީއަށް ކޮމިޝަނަރ އޮފް ޕްރިޒަންސް ހާޒިރުކޮށްގެން ބޭއްވި ބައްދަލުވުމުގައި މުނާޒް ވިދާޅުވީ، އުސޫލުގެ ތެރެއިން ކަންކުރިނަމަ އެއްވެސް ގައިދީއަކަށް ވެސް އެއްވެސް އޮފިސަރަކަށް ވެސް އަނިޔާ ނުލިބުނީސް ކަމަށެވެ.
މުނާޒް ވިދާޅުވީ ޖަލާ ހަވާލުވެވަޑައިގެންނެވި ފަހުން ގަވައިދުތަކަށް ބަދަލު ގެނެސްފައިވާނެ ކަމަށާއި މައްސަލައަކީ ގަވައިދުތައް ހެދިފައި ވިޔަސް އެ ގަވައިދުތަކަށް އަމަލުނުކުރުން ކަމަށެވެ. މުނާޒް ވަނީ މި މައްސަލައާއި ބެހޭގޮތުން ތަފްސީލީ މައުލޫމާތު ފޯރުކޮށްދިނުމުގެ ގޮތުން، ކޮމިޓީ ސިއްރުކޮށްގެން ކުރިޔަށް ގެންދިޔުމަށް އެދިވަޑައިގެންފައެވެ.
މައްސަލައިގައި ހިމެނޭ ފަރާތްތަކުގެ ނަން ހާމަކުރަން ބޭނުންނުވަނީ، މައްސަލައާއި ގުޅިގެން ކުރިޔަށް ގެންދާ ތަހުގީގަށް ހުރަސް ނޭޅުމުގެ ގޮތުން ކަމަށް މުނާޒް ވިދާޅުވިއެވެ. މުނާޒް ވެސް ވަނީ މި މައްސަލައިގައި ހާލަތާ ނުބައްދަލު ބާރު ބޭނުންކޮށްފައިވާ ކަން ގަބޫލުކުރައްވާ ކަމަށާއި، އެ މީހުންނާ ދެކޮޅަށް މައްސަލައިގެ ފުރިހަމަ ތަހުގީގެއް ހިންގުމަށް ފަހު ފިޔަވަޅު އަޅުއްވާނެ ކަމަށް ވިދާޅުވެފައެވެ.
ހަމަލާގެ ތަފްސީލީ މައުލޫމާތު ދެއްވަމުން މުނާޒް ވިދާޅުވީ މި ހަމަނުޖެހުން ހިނގައި ދިޔައީ މާފުށީ ޖަލުގެ ޔުނިޓް 4 ގައި މަސައްކަތް ކުރާ އޮފިސަރެއް ގާތު، އެތަނުގައި ހުރި ގައިދީއަކު ޖަލަށް ވެއްދުން މަނާ އެއްޗެއް ގެނެސްދޭން ބުނުމުން އޮފިސަރު އެކަމަށް އިންކާރުކޮށް ދެކެވުނު ވާހަކަތަކަކާއި ގުޅިގެން ކަމަށެވެ. އަދި އެތަނުގައި އުޅޭ އެހެން އޮފިސަރުން ވެސް އެ ޒާތުގެ ތަކެތި ގެނެސްދޭ ކަމަށް ބުނެ އޮފިސަރާ މެދު ނުރުހުން ފާޅުކުރުމުން، އޮފިސަރުގެ ބަސްމަގު ހުރިގޮތުން ރުޅި އައިސްގެން ހަމަލާދިނީ ކަމަށް ގައިދީ ބުނެފައިވާ ކަމަށް އޭނާ ވިދާޅުވިއެވެ.
ގައިދީންގެ ބޯބޭލި ކަމަށް މީޑިއާގައި ދެކެވޭ ވާހަކަތަކަށް ރައްދު ދެއްވަމުން މުނާޒް ވިދާޅުވީ އެއީ 2015 ވަނަ އަހަރުގެ ތެރޭގައި ހެދިފައިވާ ގަވައިދެއްގެ ދަށުން ކޮށްފައިވާ ކަމަކަށް ވުމުން، އެކަމާއި މެދު ފިޔަވަޅެއް އެޅެން ނެތް ކަމަށެވެ. އެގޮތުން އެ ގަވައިދުގައި މާފުށީ ޖަލަށް ވައްދާ ގައިދީންގެ އިސްތަށިގަނޑާއި ތުނބުޅި ވެސް ހުންނަން ޖެހޭނީ އެއް އިންޗި ދިގުމިނުގައި ކަމަށް ބަޔާންކޮށްފައިވާ ކަމަށް އޭނާ ވިދާޅުވިއެވެ.
އޭގެ އިތުރުން ޖަލުގައި ތިބި ގައިދީންގެ ފުރަގަސް ފަރާތަށާއި ކުރިމަތީ ފަރާތަށް ޕެޕަރ ސްޕްރޭ ޖެހި ވާހަކަވެސް ގައިދީންނާ ހަވަލާދީ މުނާޒް ދޮގުކުރެއްވިއެވެ. އެގޮތުން މުނާޒް ވިދާޅުވީ ގައިދީން ކުރެން އެހުމުން އެހެން ކަންތައް ނުކުރާ ކަމަށް މައުލޫމާތު ދީފައިވާ ކަމަށެވެ. ނަމަވެސް ވަނުމުގެ ކުރިން ޕެޕަރ ސްޕްރޭ ޖެހިކަމަށް ގައިދީން ވެސް އަދި ކަރެކްޝަންސް އޮފިސަރުން ވެސް ބުނެފައިވާ ކަމަށް އޭނާ ވިދާޅުވިއެވެ.
