ރަސްމީ ދަތުރުފުޅެއްގައި ރައީސް ސިންގަޕޫރަށް، ފުރާވަޑައިގަންނަވާނީ 29 ގައި
ރައީސްގެ ދަތުރުފުޅަކީ އެ ގައުމުގެ ދައުވަތަކަށް ކުރައްްވާ ދަތުރުފުޅެއް
ރައީސް ސޯލިހު
ފުރަމާނަ ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ސިންގަޕޫރަށް މި މަހުގެ 29 ވަނަ ދުވަހު ފުރާވަޑައިގަންނަވާ ގޮތަށް ހަމަޖެހިއްޖެއެވެ.
ރާއްޖެ.އެމްވީ އަށް މައުލޫމާތު ލިބިފައިވާ ގޮތުން ރައީސް ސޯލިހުގެ ދަތުރުފުޅަކީ ސިންގަޕޫރުގެ ދައުވަތަކަށް ކުރައްވާ ދަތުރުފުޅެކެވެ. އެމަނިކުފާނުގެ މި ދަތުރުފުޅުގައި އަނބިކަނބަލުން ފަޒްނާ އަހުމަދު ވެސް ބައިވެރިވެ ވަޑައިގަންނަވާނެއެވެ.
ރައީސް ސޯލިހު ސިންގަޕޫރަށް ދަތުރުފުޅެއް ކުރައްވަން ހަމަޖެހިފައިވޭތޯ ރާއްޖެ.އެމްވީން ސުވާލު ކުރުމުން ރައީސްގެ ތަރުޖަމާނު އިބްރާހިމް ޙޫދު އެއްޗެއް ވިދާޅެއް ނުވެއެވެ.
ރައީސް ސޯލިހު ރަސްމީ ދަތުރުފުޅެއްގައި ސިންގަޕޫރަށް ވަޑައިގަންނަވަން ހަމަޖެހިފައިވާއިރު ވެރިކަމާއި ހަވާލުވެވަޑައިގަތް ފަހުން އެމަނިކުފާނު ވަނީ ފެބްރުއަރީ މަހުގެ 27 ވަނަ ދުވަހު ސިންގަޕޫރަށް ނުރަސްމީ ދަތުރުފުޅެއް ކުރައްވާފައެވެ.
ރައީސް ކަމުގެ ހުވާކުރެއްވި ދުވަހު ސިންގަޕޫރުގެ ރައީސާ ހަލީމާ އާއި ބޮޑު ވަޒީރު ލީ ޝެން ލޫންގް ވަނީ ރައީސް ސޯލިހު އަށް މަރުހަބާ ވިދާޅުވެ ސިޓީއެއް ފޮނުއްވާފައެވެ.
ރައީސް ސޯލިހުގެ ވެރިކަމުގައި ދިވެހިރާއްޖެ ތަރައްގީ އާއި ކުރިއެރުމާއި ފުދުންތެރި ކަމުގެ އާ ހަރުފަތްތަކަށް އަރާނެ ކަމުގެ ޔަގީން ކަން އޮތް ކަމަށް ބޮޑު ވަޒީރު ލީ ޝެން ފޮނުއްވެވި ސިޓީގައި ވަނީ ވިދާޅުވެފައެވެ.
