ވަގަށް ނަގާފައިވާ ވޮލެޓް ފުލުހުންނާއި ހަވާލުކޮށްފި
ވައްކަން ކޮށްފައިވަނީ ޖޫން މަހުގެ 18 ވަނަ ދުވަހު 13:15 ގައި
ވޮލެޓް ވަގަށް ގެންދިޔަ ކަމަށް ބެލެވޭ ދެމަފިރިން
ފިހާރައެއްގެ ތެރެއިން ވަގަށް ނަގާފައިވާ ވޮލެޓް ފުލުހުންނާއި ހަވާލުކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ޖޫން މަހުގެ 18 ވަނަ ދުވަހު 13:15 އެހާއިރު ފިހާރައެއްގެ ތެރެއިން މީހެއްގެ ވޮލެޓް ގެއްލުނު މައްސަލައެއް އެ އިދާރާއަށް ހުށައަޅާފައިވާ ކަމަށެވެ. އަދި މިހާރު އެ ވޮލެޓް ފުލުހުންނާއި ހަވާލުކޮށްފައިވާ ކަމަށް ފުލުހުން ބުނެއެވެ.
ވޮލެޓްގެ ވެރިފަރާތް މިވަގުތު މާލެގައި ނެތް ކަމަށާއި ވެރިފަރާތާއި ގުޅިފައިވާ ކަމަށް ފުލުހުން ބުނެފައިވާއިރު މި މައްސަލަ ތަހުގީގު ކުރަމުން ދާކަމަށް ފުލުހުން މައުލޫމާތުދެއެވެ. އަދި މި މައްސަލާގައި އެއްވެސް މީހަކު ހައްޔަރު ކޮށްފައި ނުވާކަމަށްވެސް ފުލުހުން މައުލޫމާތު ދެއެވެ.
މައުލޫމާތު ލިބިފައިވާ ގޮތުގައި އެ ވޮލެޓަކީ ފިހާރައެއްގެ ކައުންޓަރުގައި މީހަކު ހަނދާންނެތިގެން ބާއްވާފައި ދިޔަ ވޮލެޓެކެވެ.
މި ވައްކަމާއި ގުޅިގެން މީސްމީޑިއާގައި ދައުރުވަމުންދާ ވީޑިއޯއިން ފެންނަނީ، ފިހާރައެއްގެ ކައުންޓަރުގައި އޮތް ވޮލެޓެއް ދެމަފިރިއަކު ވަގައްނަގާ, އެ ވޮލެޓުގައި ހުރި ފައިސާއިން ވިޔަފާރިކޮށް އެ ވޮލެޓު ހިފައިގެން ދާ މަންޒަރެވެ. އަދި އެ ވީޑިއޯއިން ފެންނަ ގޮތުގައި، އެ ވޮލެޓް ނެގުމަށް އިޝާރަތް ކުރަނީ އަންހެން މީހާއެވެ.
އަންހެން މީހާ ފިރިހެން މީހާގެ ކޮނޑުގައި ޖެހުމަށްފަހު ކައުންޓަރު މަތީގައި އޮތް ވޮލެޓު ލޮލުގެ އިޝާރާތުން ދައްކާލައެވެ. އަދި ފިރިހެން މީހާ އެ ވޮލެޓް ނަގާ އޭގައި ފައިސާ ހުރިތޯ ބަލައެވެ. އަދި އެ ދެމީހުން ގަތް އެއްޗެއްސަށް އެ ވޮލެޓްގައި ހުރި ފައިސާއިން ފައިސާ ދައްކައެވެ. އަދި އެ ވޮލެޓު ނަގާ ފިރިހެން މީހާގެ ޖީބަށް ލުމަށްފަހު ދާ މަންޒަރު ފެނެއެވެ.
