މަޖިލީހުން ފާސްކޮށްފައިވާ ތިން ހުށަހެޅުމަށް ގޮތެއް ނިންމައިދިނުމަށް ޖޭއެސްސީގައި އެދިއްޖެ

ސުޕްރީމް ކޯޓާއި ގުޅޭގޮތުން މަޖިލީހުން ފާސްކޮށްފައިވާ، ތިން ހުށަހެޅުމަށް ގޮތެއް ނިންމައި ދެއްވުމަށް އެދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ޖުޑީޝަލް ސާރވިސް ކޮމިޝަން (ޖޭއެސްސީ) އަށް ސިޓީފުޅެއް ފޮނުއްވާފައިވާ ކަމަށް ރައްޔިތުންގެ މަޖިލީހުގެ އަމީންއާންމު ފާތިމަތު ނިއުޝާ ވިދާޅުވެއްޖެއެވެ.

ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާއަށް މަޖިލީހުގެ ރިޔާސަތުން ވަނީ މައްސަލައެއް ހުށަހަޅުއްވާފައެވެ. މަޖިލީހުގެ ރިޔާސަތުން މައްސަލައެއް ހުށަހެޅުއްވީ ސުޕްރީމް ކޯޓްއިން ނެރެފައިވާ އަމުރަކާއި ގުޅިގެންނެވެ.

ސުޕްރީމް ކޯޓްއިން އަމުރެއް ނެރެފައިވަނީ ފަނޑިޔާރު އަބްދުﷲ ދީދީގެ ސަސްޕެންޝަން މަޑުޖައްސާލުމަށް، އެ ކޯޓުން ނެރުނު އަމުރާ ޚިލާފަށް ދައުލަތުގެ އެއްވެސް މުއައްސަސާއަކުން ނިންމާ ނިންމުމަކީ ބާތިލް ނިންމުމެއް ކަމަށް ބުނެއެވެ. އަދި އެ އަމުރަކީ ޤާނޫނު އަސާސީއާ ޚިލާފް އަމުރެއް ކަމަށް އަންގާރަ ދުވަހު އޮތް މަޖިލީގެ ޖަލްސާގައި ވަނީ ކަނޑައަޅާފައެވެ.

ބުދަ ދުވަހުގެ ޖަލްސާއަށް ސުޕްރީމް ކޯޓްގެ ނިންމުމާއި ގުޅިގެން މަޖިލީހުގެ ރިޔާސަތުން ހުށަހެޅުއްވި މައްސަލަ އަށް ވަނީ ތިން ހުށަހެޅުމެއް ހުށަހަޅުއްވާފައެވެ. އަދި އެތިން ހުށަހެޅުންވެސް ވަނީ ފާސްކޮށްފައެވެ. މި ހުށަހެޅުންތައް ހުށަހެޅުއްވީ މެދު ހެންވޭރު ދާއިރާގެ މެމްބަރު އަލީ އާޒިމްއެވެ.

އާޒިމްގެ ފުރަތަމަ ހުށަހެޅުއްވުމަކީ ސުޕްރީމް ކޯޓްގެ ހުރިހާ ފަނޑިޔާރުންގެ ޝަރުތު ފުރިހަމަވޭތޯ ބެލުމަށެވެ. އާޒިމްގެ އެ ހުށަހެޅުން ފާސްކޮށްފައިވަނީ 66 މެމްބަރުންގެ ވޯޓުންނެވެ. މެމްބަރު އާޒިމް ހުށަހެޅުއްވި ދެވަނަ ހުށަހެޅުއްވުމަކީ ސުޕްރީމް ކޯޓުން މަޖިލީހާ ގުޅޭގޮތުން މިދިޔަ ހޯމަ ދުވަހާއި އަންގާރަ ދުވަހު، މަޖިލީހުގެ ބާރު ކަނޑުވާލުމަށް މަސައްކަތް ކުރި މައްސަލަ ބެލުމަށެވެ. އާޒިމްގެ އެ ހުށަހެޅުން ފާސްކޮށްފައިވަނީ 69 މެންބަރުންގެ ވޯޓުންނެވެ.އާޒިމް ހުށަހެޅުއްވި ތިންވަނަ ހުށަހެޅުމަކީ ސުޕްރީމް ކޯޓްގެ ފަނޑިޔާރުންގެ އެއްވެސް ކޮރަޕްޝަނުގެ އަމަލެއްވޭތޯ، ޖޭއެސްސީން ބަލައިދެއްވުމަށެވެ. އެ އިސްލާހު ފާސްކޮށްފައިވަނީ 69 މެމްބަރުންގެ ވޯޓުންނެވެ.

މަޖިލީހުގެ އަމީންއާންމު ފާތިމަތު ނިއުޝާ ވިދާޅުވީ, ސުޕްރީމް ކޯޓާ ގުޅޭގޮތުން ބުދަ ދުވަހު އޮތް މަޖިލީހުގެ ޖަލްސާއިން ނިންމާފައިވާ ނިންމުންތަކާއި ގުޅޭގޮތުން ގޮތެއް ނިންމަވައިދެއްވުމަށް ޖޭއެސްސީގައި މަޖިލީހުގެ ރައީސް މުހައްމަދު ނަޝީދު އެދިވަޑައިގެންފައިވާ ކަމަށެވެ. އަމީންއާންމު ވިދާޅުވީ އެ ހުށަހެޅުންތަކުގައި އަލިއަޅުވާލާފައިވާ ކަންތައް ޖޭއެސްސީގެ ސަމާލުކަމަށް، މަޖިލީހުގެ ރައީސް ގެންނަވާފައިވާ ކަމަށެވެ.