ރާއްޖޭގައި އުޅޭ ބިދޭސީންގެ އަދަދު ކޮންޓްރޯލް ވާން ޖެހޭ: ހަނަފީ
20 ޖޫން 2019 | ބުރާސްފަތި 05:10ބިދޭސީންގެ ކަންކަން ހައްލު ކުރުމަށް ގިނަ ގޮންޖެހުންތަކެއް އެބަހުރި
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ)
ރާއްޖޭގައި އުޅޭ ބިދޭސީންގެ އަދަދު ކޮންޓްރޯލް ވާން ޖެހޭ ކަމަށް އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ވިދާޅުވެއްޖެއެވެ.
ހަނަފީ މިހެން ވިދާޅުވެފައިވަނީ މޯލްޑިވްސް ޕާޓްނަޝިޕް ފޯރަމްގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވި އެއްޗަކާ ގުޅުވައިގެން ކުރެއްވި ޓްވީޓެއްގައެވެ.
އޭނާ ކުރެއްވި ޓްވީޓްގައި ވިދާޅުވެފައި ވަނީ ރާއްޖޭގައި ދިރިއުޅޭ ބިދޭސީންގެ އަދަދު ގިނަވުމުގެ މައްސަލަ ހައްލު ކުރެވޭނީ ގައުމީ ނިސްބަތުން ވޯކް ވިސާ ދޭނެ އަދަދު ކަނޑައަޅައިގެން ކަމަށެވެ.
އެގޮތުން، އިމިގްރޭޝަނުން ދަނީ ބިދޭސީންގެ ކަންކަން ހައްލު ކުރުމަށް ހުރި ގިނަ ގޮންޖެހުންތަކާ އެކު ވެސް އެކަން ހައްލުކުރުމަށް މަސައްކަތް ކުރަމުން ކަމަށް ހަނަފީގެ ޓްވީޓްގައި ވިދާޅުވެފައި ވެއެވެ.
މޯލްޑިވްސް ޕާޓްނަޝިޕް ފޯރަމްގައި ސީޕީ ވިދާޅުވެފައި ވަނީ، ރާއްޖޭގައި މަސައްކަތް ކުރާ ބިދޭންސީގެ އަދަދު އިންތިހާއަށް އިތުރުވެގެން ގޮސްފައިވާއިރު، އެ މީހުންގެ ފަރާތުން ގައުމުގެ ސަލާމަތަށް ކުރިމަތިވެދާނެ ނުރައްކަލަށް ވިސްނަންޖެހޭ ކަމަށެވެ.
ރާއްޖޭގައި 1،44,607 ބިދޭސީން އުޅެއެވެ. އޭގެތެރޭގައި ގަވައިދާ ޚިލާފަށް އުޅޭ 63،000 ބިދޭސީން ރާއްޖޭގައި މިވަގުތު ތިބި ކަމަށް އިމިގްރޭޝަންގެ ތަފާސް ހިސާބުތަކުން ދައްކައެވެ.
