ޖޭއެސްސީއާ ގުޅޭ ގޮތުން ސުޕްރީމް ކޯޓުން ނެރުނު ދެ އަމުރު ބާތިލް ކަމަށް ކަނޑައަޅާ ގަރާރު ބަލައިގަތުމަށް ފާސްކޮށްފި
19 ޖޫން 2019 | ބުދަ 10:23މަޖްލީހުގެ އިމްތިޔާޒްތަކާއި ބާރުތަކަށް އަރައިގަތުމަކީ، މަޖިލީހުގެ ބާރުތަކުގެ މައްޗަށް އަރައިގަތުން ކަމަށް
ތުޅާދޫ ދާއިރާގެ މެމްބަރު ހިސާން ހުސެއިން
ސުޕްރީމް ކޯޓުން މަޖިލީހުގެ ބާރުގެ މައްޗަށް އަރައިގަންނަ ނަމަ، މަޖިލީހުގެ ބާރު ބޭނުންކުރަންޖެހިދާނެ ކަމުގެ ގަރާރު މަޖިލީހަށް ބަލައިގެންފިއެވެ.
ގަރާރު މަޖިލީހަށް ބަލައިގަންނަން ފެންނަ ކަމަށް 68 މެމްބަރުން ވަނީ ވޯޓް ދެއްވާފައެވެ.
މި ގަރާރު މަޖިލީހަށް ހުށަހެޅުއްވީ ޖޭއެސްސީގައި މަޖިލީހުގެ ފަރާތުން އިންނަވާ ތުޅާދޫ ދާއިރާގެ މެމްބަރު ހިސާން ހުސެއިންއެވެ.
ހިސާން ހުށަހެޅުއްވި ގަރާރުގައި ވަނީ މަޖިލީހުގެ އިމްތިޔާޒްތަކާއި ބާރުތަކަށް އަރައިގަތުމަކީ، މަޖިލީހުގެ ބާރުތަކުގެ މައްޗަށް އަރައިގަތުން ކަމަށެވެ. ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ މައްސަލައިގައި، ޖޭއެސްސީގެ އެއްވެސް ނިންމުމަކަށް ފާޑުކިޔުމުގެ ބާރު މަޖިލީހަށާއި، މަޖިލީހުގެ ކޮމިޓީއަކަށް ލިބިގެން ނުވާނެ ކަމަށް, ސުޕްރީމް ކޯޓުން ބުނެފައި އޮތުމަކީ ސީދާ މަޖިލީހުގެ ބާރު ހަނިކުރުމުގެ މައްސަލައެއް ކަމަށެވެ.
ސުޕްރީމް ކޯޓުގެ އަމުރާ އެއްގޮތަށް މަޖިލީހުން އަމަލުކޮށްފި ނަމަ، އެއީ ގާނޫނު އަސާސީން މަޖިލީހަށް ލިބިދީފައި އޮތް ބާރު ދޫކޮށްލުން ކަމަށް ހިސާންގެ ގަރާރްގައި ވަނީ ބުނެފައެވެ. ހިސާން ހުށަހެޅުއްވި ގަރާރުގައި އިތުރަށް ބުނެފައި ވަނީ މަޖިލީހުގައި ވެސް އަދި މަޖިލީހުގެ ކޮމިޓީއެއްގައި ނިންމާ އެއްވެސް ނިންމުމަކަށް ބަސް ބުނުމުގެ ބާރު އެއްވެސް ބަޔަކަށް ނޯންނާނެ ކަމަށާއި، ގާނޫނު އަސާސީގައި ވެސް މި ބާރު އެއްވެސް ބަޔަކަށް ދީފައި ނޯންނާނެ ކަމަށެވެ.
ދުބިޔޭގެ ތަހްޒީބް ގައުމުތަކުގައި ވެސް މަޖިލީހުން ނިންމާ ނިންމުމެއްގެ މައްޗަށް އެހެން ފަރާތަކުން ބަސް ކިޔާ ގޮތް ކަނޑައެޅުން ނޯންނަ ކަމަށާއި، އެކަން ކުރަމުން އަންނަނީ މަޖިލިސް އިން ކަމަށް ވެސް ގަރާރުގައި ބުނެފައި ވެއެވެ.
ސުޕްރީމް ކޯޓުގެ ފަނޑިޔާރު އަބްދުﷲ ދީދީއާ ގުޅޭ ގޮތުން ޖުޑިޝަލް ސާރވިސް ކޮމިޝަނުން ބަލަމުންދާ މައްސަލައާ ގުޅޭ ގޮތުން ސުޕްރީމް ކޯޓުން ނެރުނު ދެ އަމުރަކީ ގާނޫނުއަސާސީއާ ހިލާފު ބާތިލް ދެ އަމުރުކަމަށް ވެސް ގަރާރުގައި ބުނެފައި ވެއެވެ.
މަޖިލީހުގެ ބާރުތަކަށް އަރައިގަންނަ ނަމަ، މަޖިލީހުގެ ބާރުގެ ބޭނުން ކުރަން ޖެހިދާނެ ކަމުގެ ގަރާރެއް ހިސާން ހުށަހަޅުއްވާފައިވާއިރު، ސުޕްރީމް ކޯޓްގެ އަމުރާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ މަޖިލީހަށް މައްސަލައެއް ހުށަހަޅުއްވާފައެވެ.
ރައީސް ނަޝީދު ވިދާޅުވީ ދައުލަތުގެ ތިން ބާރުގެ ތެރެއިން އެއް ބާރަކީ ގާނޫނު ހަދާ މަޖިލިސް ކަމަށާއި، ދައުލަތުގެ ބާރުތައް ފެށިގެން އަންނަނީ ވެސް އަދި ނިމެނީ ވެސް ރައްޔިތުންގެ ކިބައިން ކަމަށެވެ. ރައްޔިތުންގެ މަޖިލީހުގައި ތިއްބެވީ ރައްޔިތުންގެ މަންދޫބުން ކަން ފާހަގަކުރައްވައި ރައީސް ނަޝީދު ވިދާޅުވީ ސުޕްރީމް ކޯޓުން މަޖިލީހުގެ ނިންމުމަކީ ބާތިލް ނިންމުމެއް ކަމަށް ނިންމާފައިވާތީ، އެކަމާ ގުޅިގެން މަޖިލީހުގެ މެމްބަރުންނަށް، އެއްޗެއް ދެންނެވުމަށް އެދިވަޑައިގަންނާވާ ކަމަށެވެ.
