ބިގް އަށް ފާއިސާ ދޫކޮށްފައިވަނީ ކުރީގެ ޑެޕިއުޓީ އެޓާރނީ ޖެނެރަލް އަހްމަދު އުޝާމްގެ ލަފާގެ މަތިން: ރިފްއަތު
19 ޖޫން 2019 | ބުދަ 12:18ބިގް އަށް ފާއިސާ ދޫކުރެއްވުމަށް ލަފާ އަރުވާފައިނުވާނެ ކަމަށް ވިދާޅުވި
އެޓާރނީ ޖެނެރަލް އިބްރާހިމް ރިފްއަތު، ރައްޔިތުންގެ މަޖިލީހުގެ ޖަލްސާގައި
ބިޒްނަސް އިމޭޖް ގްރޫޕް ޕްރައިވެޓް ލިމިޓެޑަށް ފާއިސާ ދޫކޮށްފައިވަނީ ކުރީގެ ޑެޕިއުޓީ އެޓާރނީ ޖެނެރަލް އަހުމަދު އުޝާމް ދެއްވާފައިވާ ލަފާގެ މަތިން ކަމަށް އެޓާރނީ ޖެނެރަލް އިބްރާހިމް ރިއްފަތު ވިދާޅުވެއްޖެ އެވެ.
އެޓާރނީ ޖެނެރަލް މި ގޮތަށް ވިދާޅުވެފައިވަނީ ބިގް ކުންފުންޏަށް ދައުލަތުން ބޮޑު ބަދަލެއް ދޭން ޖެހޭ، މައްސަލައާ ގުޅޭ ގޮތުން ކާށިދޫ ދާއިރާގެ މެންބަރު އަބްދުﷲ ޖާބިރު. އެޓާރނީ ޖެނެރަލް އާއި ސުވާލު ކުރެއްވުމަށް، މަޖިލީހަށް ހުށަހެޅުއްވި މައްސަލަ އާއި ގުޅޭ ގޮތުން މަޖިލީހަށް ވަޑައިގެން، ޖާބިރު ހުށަހެޅުއްވި ސުވާލަށް ޖަވާބު ދެއްވަމުންނެވެ. ޖާބިރު ކުރައްވާފައިވާ ސުވާލަކީ ބިގް ކުންފުންޏަށް ފާއިސާ ދިނުމަށް ލަފާ ދެއްވާފައިވޭތޯ އާއި، އަދި އެ މައްސަލަ އިސްތިއުނާފް ކުރުމަށް ބަންޑާރަނައިބް އެއްވެސް މަސައްކަތެއް ކޮށްފައިވޭތޯއެވެ.
ޖާބިރު ކުރެއްވި ސުވާލަށް ޖަވާބު ދެއްވަމުން ރިފްއަތު ވިދާޅުވީ ބިޒްނަސް އިމޭޖް ގްރޫޕް ޕްރައިވެޓް ލިމިޓެޑް އިން މޯލްޑިވްސް ނޭޝަނަލް ބްރޮޑްކާސްޓިންގ ކޯޕަރޭޝަންގެ މައްޗަށް، ސިވިލް ކޯޓުން އުފުލި ދައުވާ އާއި ކުރި ހުކުމަކީ ދައުލަތަށް ދައުވާ ލިބުނު މައްސަލައެއް ނޫން ކަމަށެވެ. ރިފްއަތު ވިދާޅުވީ އެއީ ދައުލަތުން އިސްތިއުނާފްކުރަންޖެހޭ މައްސަލައެއްވެސް ނޫން ކަމަށެވެ.
އެމްއެންބީސީ އުވި އެކުންފުނީގެ ދަރަންޏާއި އިމްތިޒާމްތައް ފަހުން ބަދަލުކުރެވިފާއިރު، މޯލްޑިވްސް ބްރޮޑްކާސްޓިން ކޯޕަރޭޝަން އަދި ޕަބްލިކް ސާރވިސް މީޑިޔާ އަމިއްލަ ނަމުގައި ދައުވާ ކުރެވޭ ދައުވާ ލިބިފައިވާ ވަކި ގާނޫނީ ޝަހްސްތަކެއް ކަމަށް ބަންޑާރަ ނައިބް ވިދާޅުވި އެވެ. އެ ތިން ފަރާތަކީވެސް ކުންފުނިތަކަށްވާތީ، އެ ކުންފުނިތައް ޝަރީއަތުގައި ތަމްސީލް ކުރަންޖެހޭނީ އެޓާރނީ ޖެނެރަލް އޮފީހުން ނޫން ކަމަށް ރިފްއަތު ވިދާޅުވިއެވެ. އެހެންކަމުން ބިގް ކުންފުންޏަށް ފާއިސާ ދެއްކުމަށް އެޓާރނީ ޖެނެރަލްކަމާއި ހަވާލުވިފަހުން އެއްވެސް ފަރާތަކަށް ލަފާ އަރުވާފައި ނުވާނެ ކަމަށް ރިފްއަތު ވިދާޅުވި އެވެ.
ރިއްފަތު ވިދާޅުވީ ބިގް ކުންފުންޏަށް ފައިސާ ދެއްކުމަށް އޭނާ އެއްވެސް ފަރާތަކަށް ލަފާ އަރުވާފައި ނުވާ ކަމަށެވެ. ނަމަވެސް އެ ފައިސާ ދައްކަން ޖެހޭ ގޮތާ މެދު އަމަލު ކުރަންވީ ގޮތުގެ ލަފައެއް 22 ސެޕްޓެމްބަރު 2016 ގައި އުޝާމް އަރުވާފައިވާ ކަމަށް ރިއްފަތު ވިދާޅުވި އެވެ.
2016 ވަނަ އަހަރުގެ ޖޫން މަހުގެ 7 ވަނަ ދުވަހު ސިވިލް ކޯޓުން ކުރި ހުކުމުގައި ވަނީ ބިގް ކުންފުންޏަށް 78 މިލިއަން ރުފިޔާ ދިނުމަށެވެ.
ރިފްއަތު ވިދާޅުވީ މި މައްސަލައަކީ އެމްބީސީން ކޯޓަށް ހާޒިރުވާން އެތައް ފަހަރަކު ޗިޓް ފޮނުވުމުންވެސް ހާޒިރުނުވުމުގެ ސަބަބުން، އެމްބީސީގެ އައިރު ހާޒިރުގައި ކޮށްފައިވާ ހުކުމެއް ކަމަށެވެ.
