ރިޒާވްތައް ހުސްވެ ޗެންނާއީ ފެނަށް ޖެހިއްޖެ!
ފެން ފޯރުކޮށްދިނުމުގެ މަސައްކަތް ޗެންނާއީ ވޯޓަރ ޑިޕާޓްމަންޓުން ދަނީ ކުރަމުން
ފެން ހޯދަން ޗެންނާއީގައި ދިރިއުޅޭ މީހުން ކިޔޫގައި ޖެހިގެން
ގިނަ ދުވަސްތަކެއް ވަންދެން ވާރޭ ނުވެހުމާ ގުޅިގެން އިންޑިއާގެ ޗެންނާއީގެ ފެނުގެ ރިޒާވްތަކުގައި ހުރި ފެން އެއްކޮށް ހުސްވެ، އެ އަވަށުގައި ދިރިއުޅޭ މީހުން ފެނަށް ޖެހިއްޖެއެވެ.
ފެން ނެތުމާ ގުޅިގެން، އެކި ސަރަހައްދުތަކުގައި ބޯހޯލް ތޮރުފައިގެން ފެން ހޯދުމުގެ މަސައްކަތް ކުރަމުން ދިޔުމުގެ އިތުރަށް އެހެނިހެން ގޮތްތަކުން ވެސް ފެނުގެ މައްސަލައަށް ހައްލެއް ހޯދުމުގެ މަސައްކަތް ޗެންނާއީގެ ކަމާ ބެހޭ ފަރާތްތަކުން ކުރަމުންދާ ކަމަށް އިންޑިއާގެ މީޑިއާތަކުން ރިޕޯޓްކޮށްފައި ވެއެވެ.
ސަރުކާރުން ފޯރުކޮށްދީފައިވާ ފެން ޓޭންކްތަކުން ފެން ނެގުމަށް ރައްޔިތުން ދިގު ކިޔުއެއްގައި ތިބެން ޖެހިފައިވާ އިރު، ފެން ނުލިބިގެން ހުރިހާ ރެސްޓޯރަންޓްތަކެއް ވެސް ވަނީ ބަންދުކޮށްފައެވެ. ބީބީސީއާ ވާހަކަދެއްކި އޮފިޝަލަކު ބުނީ މިކަމަށް އޮތް ހަމައެކަނި ހައްލަކީ ވާރޭ ވެހުން ކަމަށެވެ. މިހާރު އެ އަވަށުގައި ދިރިއުޅޭ މީހުންނަށް ފެން ފޯރުކޮށްދެމުން ދަނީ ޗެންނާއި ވޯޓަރ ޑިޕާޓްމަންޓްގެ ފެން އުފުލާ ޓްރަކްތަކުގައެވެ.
ފެން ބޭނުންކުރުން މަދުކުރުމުގެ ގޮތުން ރޭލްވޭ ސްޓޭޝަންތަކުގައި ހުރި އޭސީތައް ނިއްވާލާ، ގޭގައި ތިބެގެން މަސައްކަތް ކުރުމަށް ބައެއް އޮފީސްތަކުން އެތަންތަނުގެ މުވައްޒަފުންނަށް އަންގާފައިވެއެވެ. ނަމަވެސް ގޭގޭގައި ރައްކާކޮށްފައި ހުރި ފެން ހުސްވާން ކައިރިވެފައި ވާތީ އެއީ ވެސް ހައްލެއް ނޫން ކަމަށް ބުނެ އެ އަވަށުގެ ބައެއް ރައްޔިތުން އަޑުއުފުލާފައި ވެއެވެ.
ފެން ލިބުމުގައި ހުރި ދަތިތަކުގެ ސަބަބުން ބައެއް ހިސާބުތަކުގައި ހަމަނުޖެހުންތަކެއް ވެސް ހިނގާފައި ވެއެވެ. އެގޮތުން މިދިޔަ ހަފުތާގެ ތެރޭގައި ފުލުހުން ވަނީ، ފެނާ މެދު އުފެދުނު ހިޔާލު ތަފާތުވުމެއްގައި އަވަށްޓެރިއެއް ގަޔަށް ވަޅި ޖެހި މީހަކު ހައްޔަރުކޮށްފައެވެ.
އިންޑިއާގައި ބޮޑު ސަރަހައްދަކަށް ވާރާ ނުވެހުމާއި ގުޅިގެން، ގިނަ ސަރަހައްދުތަކަކުން ފެން ހުސްވެދާނެ ކަމުގެ ބޮރު ހީވެފައިވާ އިރު، އެ ގައުމުގެ މޫސުމާ ބެހޭ ވުޒާރާއިން ބުނެފައިވަނީ އަންނަ ހަފުތާގެ ތެރޭގައި ބޮޑު ބަޔަކަށް ވާރާ ވެހި، މިކަމަށް ހައްލެއް ލިބޭނެ ކަމަށް ލަފާކުރެވޭ ކަމަށެވެ. އާންމު ގޮތެއްގައި މި ދުވަސްވަރު އިންޑިއާގެ ތިން ބައި ކުޅަ އެއް ބަޔަށް ވާރޭ ވެހުނު ކަމުގައިވީ ނަމަވެސް، މިއަހަރު އަދި ވާރޭ ވެހިފައިވަނީ ދެކުނުގެ ބައެއް ސަރަހައްދުތަކަށް އެކަންޏެވެ.
ޗެންނާއީއަކީ ގިނަ އަދަދެއްގެ ދިވެހިން ބޭސްފަރުވާއަށާއި ޗުއްޓީ ހޭދަކޮށްލުމަށް ދަތުރުކުރާ މަގުބޫލު މަންޒިލެކެވެ.
