ކ. މާލެ
|
17 ޖޫން 2019 | ހޯމަ 19:31
ޖޯ ހާޓް
ޖޯ ހާޓް
ގެޓީ އިމޭޖަސް
ޖޯ ހާޓް
ހާޓް ހޯދުމަށް ބޯންމައުތުންވެސް މަސައްކަތް ފަށައިފި
 
ބާންލީއާއެކު ހާޓް ހަދާފައިވާ އެއްބަސްވުން ހަމަވާނީ އަންނަ އަހަރު

ބާންލީއަށް ކުޅެމުން އަންނަ އިނގިރޭސި ކީޕަރ ޖޯ ހާޓް ހޯދުމަށް ބޯންމައުތުންވެސް މަސައްކަތް ފަށާފައިވާ ކަމަށް ރިޕޯޓްތައް ބުނެފިއެވެ.

ދަ ސަންއިން ބުނީ، ކުރިޔަށް އޮތް ސީޒަނަށް އަމާޒުކޮށް ޓީމު ވަރުގަދަކުރުމުގެ ގޮތުން ބޯންމައުތުން ހާޓް ހޯދުމަށް މަސައްކަތް ފަށާފައިވާ ކަމަށާއި، އޭނާއަށް 20 މިލިއަން ޕައުންޑު ހުށަހަޅަން އެ ކްލަބުން އޮތީ ތައްޔާރަށް ކަމަށެވެ.

ހާޓް ހޯދުމަށް ނޯވިޗް ސިޓީންވެސް މަސައްކަތް ކުރަމުން އަންނަ ކަމަށް ރިޕޯޓްތައް ބުނާއިރު، ބައެއް ރިޕޯޓްތައް ބުނާ ގޮތުން ހާޓް ވިއްކާލަން ބާންލީން ވެސް ބޭނުންވެއެވެ. ނަމަވެސް އޭނާ ވިއްކާލާނީ ދާއިމީ ލޯން އެއްބަސްވުމެއްގެ ދަށުން ތޯ ނުވަތަ ދާއިމީ ގޮތެއްގައިތޯ ބާންލީން ނުނިންމާ ކަމަށެވެ.

ބާންލީގެ އެއް ނަމްބަރު ކީޕަރަކީ މިވަގުތު ޓޮމް ހީޓޮންއަށް ވާއިރު، ބާންލީއާ އެކު ހާޓްގެ އެއްބަސްވުން ހަމަވާނީ އަންނަ އަހަރެވެ. އޭނާ ބާންލީއަށް ބަދަލުވީ 2018 ވަނަ އަހަރު ދެ އަހަރު ދުވަހުގެ އެއްބަސްވުމެއްގެ ދަށުންނެވެ.

މެންޗެސްޓާ ސިޓީން ވިދާލި ހާޓް ސިޓީ ދޫކޮށްލީ 2016 ވަނަ އަހަރުގެ ސީޒަނުގައެވެ. އޭނާ ވަނީ ޓޮރީނޯއަށް ބަދަލުވެ އެޓީމަށް 37 މެޗު ކުޅެފައެވެ. އެގޮތުން އޭނާ ވަނީ މެޗުތަކުގައި މޮޅެތި ސޭވްތަކެއްކޮށް، އިޓަލީ ސަޕޯޓަރުންގެ އިހުތިރާމު ހޯދާފައެވެ.

މެންޗެސްޓާ ސިޓީއާ އެކު ދެ ޕްރިމިއާ ލީގު، އެފްއޭކަޕް އަދި ދެ ފުޓްބޯލް ލީގް ކަޕް ހޯދާފައިވާ ހާޓް ވަނީ ޕްރިމިއާ ލީގުގެ ގޯލްޑެން ގްލޯވް ޖެހި ޖެހިގެން ހަތަރު ފަހަރު ހޯދާފައެވެ. މީގެ އިތުރުން އޭނާ ވަނީ އިންގްލޭންޑް ގައުމީ ޓީމަށް 75 މެޗު ވެސް ކުޅެދީފައެވެ.

ބާންލީއަށް ހާޓް ބަދަލުވީ މިދިޔަ އަހަރެވެ. އޭނާ ވަނީ އެ ކްލަބަށް 21 މެޗު ކުޅެ، މޮޅެތި ސޭވްތަކެއް ކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
0%
0%
0%
0%
0%
ކޮމެންޓް