ރާއްޖޭގެ މަޝްހޫރު ފިލްމު ސްޓޫޑިއޯ، ޑާކް ރެއިން އެންޓަރޓެއިންމަންޓް އިން މި އަހަރު ނެރޭ ދެވަނަ ފިލްމު، "މާމުއި" ގައި ފެނިގެންދާނެ ތަރިންތަކުގެ ތެރެއިން އެންމެ ކަމުދާ ތަރިއަކަށް ވޯޓު ދިނުމުން އެ ފިލްމުގެ ޕްރިމިއަރ އަށް ދިއުމުގެ ފުރުސަތު ލިބޭ ލަކީ ޑްރޯއެއް އެ ސްޓޫޑިއޯ އިން ފަށައިފިއެވެ.

ވޯޓުލާން ޖެހޭ ގޮތަކީ ޑާކް ރެއިން އެންޓަރޓެއިންމަންޓް އިން މި ލަކީ ޑްރޯއާ ގުޅިގެން ފޭސްބުކްގައި ހިއްސާ ކޮށްފައިވާ ޕޯސްޓަރުގައި، އެންމެ ކަމުދާ ތަރިއަކަށް ދީފައިވާ ނަމްބަރު ކޮމެންޓް ކުރާނީއެވެ.

މި ލަކީ ޑްރޯގައި ފަސް މީހަކަށް ގުރުއަތު ނަގައިގެން އިނާމު ލިބޭނެ ކަމަށް ޑާކް ރެއިންގެ ފޭސްބުކް ޕޯސްޓުގައި ބުނެފައި ވެއެވެ. އަދި އިނާމަށް އެދި ކޮމެންޓު ކުރުމުގެ ފުރުސަތު ހުޅުވާލެވިފައި ވަނީ 30 ޖޫންގެ ނިޔަލަށެވެ.

އިނާމަށް އެދި ކޮމެންޓު ކުރެވޭނީ އަށާރަ އަހަރުން މަތީގެ މީހުންނަށް ކަމަށް ވެސް އެ ޕޯސްޓުގައި ބުނެފައި ވެއެވެ.

މާމުއި ޕްރިމިއަރ ކުރާނީ ޖޫން މަހުގެ 1 ވަނަ ދުވަހުއެވެ. އަދި މި ފިލްމަކީ ކޮމެޑީ ފިލްމަކަށްވާއިރު، ފިލްމު ޚާއްސަވެގެންދާ އެއް ސަބަބަކީ މި ފިލްމުގައި ކުރީގެ މަޝްޙޫރު ލަވަތަކުގެ މަންޒަރުތައް ރީކްރިއޭޓްކޮށްގެން އުފައްދާފައިވާ ޓްރިބިއުޓް ލަވައެއް ހިމެނޭތީއެވެ.

މި ފިލްމު ޕްރޮޑިއުސްކޮށްފައިވަނީ ޑާކް ރެއިން އެންޓަރޓެއިންމަންޓްގެ ބާނީ މުޙައްމަދު އަލީ (މޮގަރ) އާއި އޭނާގެ އަންހެނުން އައިޝަތު ފުވާދު (ލޯކީ) އެވެ.