"ނޯޓީ40" ގެ ޕްރިމިއަރ ނައިޓް ބާއްވައިފި

"ނޯޓީ40" ގެ ޕްރިމިއަރ ނައިޓް ބާއްވައިފިއެވެ.

"ނޯޓީ40" ގެ ޕްރިމިއަރ ނައިޓް ބާއްވާފައި ވަނީ ބުދަ ދުވަހުގެރޭ އޮލިމްޕަހުގައެވެ. ޕްރިމިއަރ ނައިޓްގައި ފިލްމުގެ ގިނަ ފަންނާނުންތަކެއް ވަނީ ބައިވެރިވެފައެވެ.

ޕްރިމިއަރ ނައިޓްގެ ޝަރަފުވެރި މެހެމާން ވީ މީޑިއާގެ ޗީފް އޮޕަރޭޓިން އޮފިސަރ މުހައްމަދު އާސިފް ވިދާޅުވީ "ނޯޓީ40 އަކީ ވަރަށް ގާތްގުޅުމެއް ބާއްވައިފައިވާ ފިލްމެއް ކަމަށާއި ވީ މިޑިއާއަކީ ދިވެހި ފިލްމީ ފަންނާނުންނަށް އެހީތެރިކަން ފޯރުކޮށްދެއްވުމަށްޓަކައި މަސައްކަތް ކުރާ ބައެއް ކަމަށެވެ.

"ނޯޓީ 40" ގެ އެސިސްޓެންޑް ޑައިރެކްޓަރ މުހައްމަދު މަނިކު ބުނެފައިވަނީ މިއީ ކުރެވުނު ވަރަށް ބޮޑު މަސައްކަތެއް ކަމަށާއި މަނިކުއަށް ފިލްމުގައި ކުރެވުނު މަސައްކަތަކީ ވަރަށް ހިތްހަމަޖެހޭ ތަފާތު މަސައްކަތެއް ކަމަށެވެ.

ފިލްމާއި ބެހޭގޮތުން ޔޫއްޕެ ބުނެފައިވަނީ ފިލްމުގެ ރިކެޓްއިންގެ ރޭޓައަށް ބަލަފިނަމަ ބެލުންތެރިންގެ ތަރުޙީބު ފިލްމަށް ލިބިފައިވާ މިންވަރު ހާމަވެގެންދާނެކަމަށާއި ފިލްމުން ހުރިހާ ފަންނާނުންގެ ބުރަ މަސައްކަތް ފެނިގެންދާނެކަމަށެވެ. އަދި ފިލްމަށް ކުރެވޭ އުންމީދު ބޮޑުކަމަށާއި "ނޯޓީ40" އަހަރުގެ އެންމެ ބޮޑު ފިލްމަށް ވެގެންދާނެ ކަމަށް ބުންޏެވެ.

ފާތިމަތު އާޒިފާ (އަޒޫ) ބުނެފައި ވަނީ މި ފިލްމުގައި އޭނާގެ ވަރަށް ތަފާތު ރޯލެއް ފެނިގެންދާނެ ކަމަށާއި ފަހަރެއްގައި ފިލްމް ބެލުމަށް ފަހު ބެލުންތެރިން އޭނާ ދެކެ ރުޅިއައުމަކީ ވެސް އެކަށީގެންވާނެ ކަމެއް ކަމަށެވެ. ސަބަބަކީ ފިލްމުގައި އޭނާގެ ކުޅެފައިވާ ރޯލަކީ ވިލަން އެއްގެ ރޯލެއް ކަމުންނެވެ.

ފިލްމްގެ ޕްރިމިއަރ ނައިޓް ފަށާފައިވަނީ "ދަންމާނު" ބޮޑުބެރު ގްރޫޕް ހުށަހަޅައިދިން ލަވަތަކަކުންނެވެ. "ދަންމާނު" ބޮޑުބެރު ގްރޫޕުން ހުށަހަޅައިދީފައިވަނީ "ނޯޓީ40" ފިލްމުގެ ތަފާތު 3 ލަވައެކެވެ. އަދި ސްޓެޕް އައްޔަގެ ނެށުމުގެ ފަރި ހަރަކާތްތަކެއް ވެސް ވަނީ ފެނިގެން ގޮސްފައެވެ.

ފިލްމުގެ ޕްރޮޑިއުސަރ ޝަފީގު ބުނެފައިވަނީ ބެލުންތެރިންގެ ވަރަށް ބޮޑު ތަރުހީބެއް ފިލްމަށް ލިބިފައިވާ ކަމަށާއި މިހާތަނަށް 5 ޝޯ އަށް ޓިކެޓްތައް ވިކިފައިވާ ކަމަށެވެ.

ފިލްމުގެ ގިނަ ތަރިން ބުނެފައިވަނީ މި ފިލްމަކީ ބެލުންތެރިންނަށް ވަރަށް ކަމުދާނެ ފިލްމަކަށް ވެގެންދާނެ ކަމަށާއި މިއަހަރުގެ ފާހަގަ ކޮށްލެވޭ ފިލްމަކަށް މި ފިލްމް ވެގެންދާނެ ކަމަށެވެ.