ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ޕާލިމެންޓްރީ ގްރޫޕްގެ މަގާމުތަކަށް މެމްބަރުން އިންތިޚާބު ކުރުމަށް ބާއްވާ އިލެކްޝަން އަންނަ މަހު 02 ގައި ބާއްވާ ގޮތަށް ނިންމައިފިއެވެ.

އެމްޑީޕީން ބުނީ، އެ ޕާޓީގެ ޕާލިމެންޓްރީ ގްރޫޕްގެ މަގާމުތަކަށް މެމްބަރުން އިންތިޚާބު ކުރުމަށް ބާއްވާ އިލެކްޝަން 02 ޖުލައި 2019 ވާ އަންގާރަ ދުވަހު 16:00 އިން 17:00 އަށް ބާއްވަން ނިންމާފައިވާ ކަމަށެވެ.

އެމްޑީޕީން ބުނީ ޕާލިމެންޓްރީ ގްރޫޕްގެ މަގާމްތަކަށް ކުރިމަތިލައްވަން ބޭނުންފުޅުވާ އެ ޕާޓީގެ ޕާލިމެންޓްރީ ގްރޫޕްގެ މެމްބަރުން 30 ޖޫން ވާ އާދިއްތަ ދުވަހުގެ 16:00ގެ ކުރިން އެމެމްބަރަކު ކުރިމަތިލާ މަގާމް އެނގޭނެ ގޮތަށް ޕާޓީގެ ސެކްރެޓޭރިއެޓް އަށް ލިޔުމުން ފޮނުވުމަށް އެދޭ ކަމަށެވެ.

ޕާލިމެންޓްރީ ގްރޫޕްއަށް އިންތިޚާބު ކުރަނީ ޕާލިމެންޓްރީ ގްރޫޕްގެ ލީޑަރަކާއި، ދެ ޑެޕިއުޓީ ލީޑަރުން، އަމީން އާންމު، އަމީންއާންމުގެ ނައިބުކަމަށް ބޭފުޅަކާއި، ޗީފް ވިޕާއި އަދި ހަ ވިޕުންނެވެ. މި މަގާމުތަކަށް މިހާރު ވެސް ބައެއް މެންބަރުން ވަނީ ޝައުގުވެރިކަން ފާޅުކުރައްވާފައި ކެމްޕެއިން ފައްޓަވާފައެވެ.