މޯލްޑިވްސް ޕާޓްނާޝިޕް ފޯރަމް 2019: ސަރުކާރުން ބުނަނީ ނަތީޖާ ނެރޭނޭ ކަމަށް
16 ޖޫން 2019 | އާދީއްތަ 10:1962 ފަރާތަކުން ބައިވެރިވާނެ، އޭގެ ތެރޭގައި 32 ގައުމު ހިމެނޭ
ހާރިޖީ ވަޒީރު އަބްދުﷲ ޝާހިދު (ވ) އަދި މާލީ ވަޒީރު އިބްރާހިމް އަމީރް (ކ)
ޖޫން މަހުގެ 17 އިން 18 އަށް ބާއްވަން ހަމަޖެހިފައިވާ މޯލްޑިވްސް ޕާޓްނާޝިޕް ފޯރަމުން ބޭނުންވާ ނަތީޖާ ނެރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ހާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
ޕާޓްނާޝިޕް ފޯރަމާ ބެހޭގޮތުން މީޑިއާތަކަށް މައުލޫމާތު ދިނުމުގެ ގޮތުން ހާރިޖީ ވުޒާރާގައި އޮތް ބައްދަލުވުމެއްގައި މިނިސްޓަރ ޝާހިދު ވިދާޅުވީ، ފޯރަމުގެ މައިގަނޑު މަގްސަދަކީ މި ސަރުކާރުގެ ތަރައްގީގެ އެޖެންޑާ ކަމުގައިވާ "ޖަޒީރާ ރާއްޖެ" މެނިފެސްޓޯގައި ހިމެނިފައިވާ ކަންކަމާއި ބެހޭގޮތުން މައުލޫމާތުދީ ޕާޓްނާޝިޕްތައް ގާއިމްކުރުން ކަމަށެވެ. އެގޮތުން މިފަހަރުގެ ފޯރަމް ނިމިގެންދާ އިރު ރާއްޖެ ތަރައްގީ ކޮށްދޭނެ ބައިވެރިންތަކެއް ލިބިވަޑައިގަންނަވާނެ ކަމުގެ ފުރިހަމަ ޔަގީންކަން އެބައޮތް ކަމަށް ޝާހިދު ވިދާޅުވިއެވެ.
މި ފަހަރުގެ ފޯރަމުގައި ބައިވެރިވާ ފަރާތްތަކުގެ ތެރޭގައި 35 ކަށް ވުރެ ގިނަ ގައުމުތަކުގެ މަންދޫބުންނާއި 27 ޖަމިއްޔާ ހިމެނެއެވެ. މި ފަހަރުގެ ބައްދަލުވުމުގައި ޖަޕާން ސަރުކާރުގެ ހާއްސަ މުޝީރު އާއި ސަރބިއާގެ ލޭބަރ މިނިސްޓަރާއި އދ.ގެ އެސިސްޓަންޓް ސެކެޓްރީ ޖެނެރަލް އަދި ޔޫއޭއީގެ އެސިސްޓަންޓް މިނިސްޓަރ ބައިވެރިވެލައްވާނެއެވެ. މިއީ މިހާ ގިނަ ގައުމުތަކަކުން މި ފޯރަމްގައި ބައިވެރިވާ ފުރަތަމަ ފަހަރު ކަމަށް ވެސް މިނިސްޓަރ ޝާހިދު ވިދާޅުވިއެވެ.
މިނިސްޓަރ ޝާހިދުގެ އިތުރުން މި ފޯރަމްގެ ކޯ-ޗެއަރކަން ކުރައްވާ ފިނޭންސް މިނިސްޓަރ އިބްރާހިމް އަމީރު ވެސް ވަނީ މި ފޯރަމް ކާމިޔާބުވާނެ ކަމުގެ ފުރިހަމަ އިތުބާރު އެބައޮތް ކަމަށް ވިދާޅުވެފައެވެ. ސަބަބެއް ކަމުގައި މިނިސްޓަރ ވިދާޅުވީ މި ފަހަރު ސަރުކާރުން ހުށައަޅާފައިވާ ކަންކަމަކީ ވަރަށް ރަނގަޅަށް ދިރާސާކުރުމަށް ފަހު، ހާސިލްކުރަން ބޭނުންވާ ލަނޑުދަނޑިތަކާއި ބޭނުންވާ ފައިސާގެ އަދަދު ހިމަނައިގެން ހުށައަޅާފައިވާ ހުށައެޅުންތަކެއް ކަމަށެވެ. އެގޮތުން ބޭރުގެ ފަރާތްތަކުން އިންވެސްޓް ކުރަން، މި ސަރުކާރުން ބޭނުންވަނީ ކޮން މަޝްރޫއުތަކަކަށް ކަން ފޯރަމްގެ ވެބްސައިޓުން ފެންނަން ހުންނާނެ ކަމަށް ވެސް އޭނާ ވިދާޅުވިއެވެ.
ޕާޓްނާޝިޕް ފޯރަމުން ހާސިލްކުރަން ބޭނުންވާ މަގުސަދުތަކަށް އަލިއަޅުއްވާލައްވާ މިނިސްޓަރ ޝާހިދު ވިދާޅުވީ ބޭނުންވަނީ ބޭރުގެ ގައުމުތަކާއި ގުޅިގެން ބިނާކުރަނިވި ގޮތެއްގައި މަސައްކަތް ކުރަން ތައްޔާރަށް އޮތްކަން ހާމަކޮށްދިނުމާއި ސަރުކާރުގެ ތަރައްގީގެ ބައިވެރިންތަކެއް ހޯދުން ކަމަށެވެ.
ދެ ދުވަހުގެ މުއްދަތަށް މިފަހަރުގެ ފޯރަމް އިފްތިތާހުކޮށްދެއްވާނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ. މި ފޯރަމްގައި ކެބިނެޓުގެ ހުރިހާ ވަޒީރުން ޕެނަލިސްޓުންގެ ގޮތުގައި ބައިވެރިވެ އެބޭބޭފުޅުންގެ ވުޒާރާތައް ނިސްބަތްވާ ދާއިރާތަކާއި ކުރިޔަށް ހުރި މަޝްރޫއުތަކާއި ބެހޭގޮތުން ފޯރަމްގެ ބައިވެރިންނަށް މައުލޫމާތު ދޭން ވަނީ ހަމަޖެހިފައެވެ.
މިއީ ދިހަ އަހަރުގެ މެދުކެނޑުމަކަށް ފަހު މޯލްޑިވްސް ޕާޓްނާޝިޕް ފޯރަމް ބާއްވާ ފުރަތަމަ ފަހަރެވެ. ދެ ދުވަހުގެ މުއްދަތަށް ކުރިޔަށްދާ މޯލްޑިވްސް ޕާޓްނާޝިޕް ފޯރަމް އޮންނާނީ ކުރުނބާ މޯލްޑިވްސްގައެވެ. މިއީ ޕާޓްނާޝީޕް ފޯރަމް ބާއްވާ ހަތަރު ވަނަ ފަހަރެވެ.
