އުރީދޫ އިން އީ-ސިމް ތައާރަފް ކޮށްފި
16 ޖޫން 2019 | އާދީއްތަ 09:42އީސިމްގެ ޚިދުމަތް މެދުވެރިކޮށް ޕްރީޕެއިޑް، ޕޯސްޓްޕެއިޑް އަދި ޓުއަރިސްޓް ޕްލޭން ވެސް ޚިޔާރު ކުރެވޭނެ
ޓުއަރިޒަމް މިނިސްޓަރ އަލީ ވަހީދު އުރީދޫގެ \"އީ-ސިމް\" ތައާރަފް ކޮށްދެއްވަނީ
ސިމް ޓެކޮނޮލޮޖީގެ އެންމެ ފަހުގެ އުފެއްދުން ކަމަށްވާ އީ-ސިމް، އުރީދޫ ކަސްޓަމަރުންނަށް ޚާއްޞަކޮށް ރާއްޖޭގައި ތައާރަފްކޮށްފިއެވެ.
އުރީދޫ އިން ބުނީ ޑިޖިޓަލް މޯލްޑިވްސް އަށް އެއްބާރުލުން ފޯރުކޮށްދީ، ބައިނަލްއަޤްވާމީ ޓެކްނޮލޮޖީތައް ދިވެހިންނަށް ތައާރަފްކޮށްދިނުމަށް ފެށުނީއްސުރެ ކުރަމުންދާ މަސައްކަތްތަކުގެ ދަށުން، އީސިމްގެ ޚިދުމަތް ދިވެހިރާއްޖޭގައި ފޯރުކޮށްދޭން ފެށި މިއީ ފުރަތަމަ ފަހަރު ކަމަށެވެ.
ރާއްޖޭއަށް މުޅިން އަލަށް އީ-ސިމްގެ ޚިދުމަތް ތައާރަފްކޮށްދީފައި ވަނީ، އުރީދޫ އިން އާދީއްތަ ދުވަހު ހެނދުނު ދަރުބާރުގޭގައި ބޭއްވި ޚާއްޞަ ރަސްމިއްޔާތު ޝަރަފްވެރި މެހެމާނު މިނިސްޓަރ އޮފް ޓުއަރިޒަމް، އަލީ ވަހީދު އަދި އުރީދޫ މޯލްޑިވްސްގެ މެނޭޖިންގ ޑައިރެކްޓަރ އަދި ސީއީއޯ، ނަޖީބް ޚާން އެވެ.
އުރީދޫ އިން ބުނީ އެ ކުންފުނީގެ ކަސްޓަމަރުންނަށް ސިމް ޓެކްނޮލޮޖީގެ އެންމެ ފަހުގެ އުފެއްދުން ފޯރުކޮށްދީފައިވާ އިރު، އީސިމްގެ ޚިދުމަތް މެދުވެރިކޮށް ޕްރީޕެއިޑް، ޕޯސްޓްޕެއިޑް އަދި ޓުއަރިސްޓް ޕްލޭން ވެސް ޚިޔާރު ކުރެވޭނެ ކަމަށެވެ. މަދު ގައުމެއްގައި މިހާތަނަށް ތައާރަފްކުރެވިފައިވާ މި ޚިދުމަތް އަދި ބޭނުން ކުރެވޭނީ އީސިމް ޓެކްނޮލޮޖީ ހިމެނިފައިވާ، އެންމެ ފަހުގެ ފޯނުތަކުގައި އެކަންޏެވެ. މީގެ ތެރޭގައި، އައިފޯން އެކްސް އެސް، އައިފޯން އެކްސް އެސް މެކްސް، އައިފޯން އެކްސް އާރް، އަދި ގޫގުލް ޕިކްސެލް 3 ހިމެނެއެވެ.
މިހާރު ބޭނުންކުރާ ޕްލާސްޓިކް ސިމްގެ ބަދަލުގައި، އީސިމްއަކީ ސްމާޓްފޯނަށް އިންސްޓޯލް ކޮށްލެވޭ ޑީޖިޓަލް ސިމްކާޑެކެވެ. މި އިލެކްޓްރޯނިކް ސިމް ކާޑު މެދުވެރިކޮށް، ކޮންމެ ފޯނެއްގައިވެސް ގިނަ ވެގެން ނުވަ ނަމްބަރު ބޭނުންކުރެވޭނެއެވެ. އަމިއްލަ ބޭނުމަށާއި ވިޔަފާރި ކުރުމަށް ގިނަ ނަމްބަރުތައް ބޭނުންކުރާ ކަސްޓަމަރުންނަށް، މި ޚިދުމަތުގެ ފަސޭހަކަން ލިބިގެންދާނެ ކަމަށް އުރީދޫ އިން ބުންޏެވެ.
މީގެ އިތުރުން، ނަޖީބް ޚާން ވިދާޅުވީ މި ޚިދުމަތުގެ ސަބަބުން، ދިވެހިރާއްޖެއަށް ޒިޔާރަތްކުރާ އެތައް މިލިއަން ޓުއަރިސްޓުންގެ ދަތުރު ފެށުމުގެ ކުރިން ވެސް އުރީދޫ ޓުއަރިސްޓް ސިމެއް ގަނެ، ރާއްޖޭގައި ފްލައިޓް ޖެއްސުމާ އެކު ނަމްބަރު އެކްޓިވޭޓް ކޮށްލުމަށް މަގުފަހިވާނެ ކަމަށާއި، އީސިމްގެ ޚިދުމަތް ފުޅާވެގެންދާއިރު، ޑިޖިޓަލް ރާއްޖެއެއްގައި އައިއޯޓީ ޓެކްނޮލޮޖީ ބޭނުންކުރުމަށް އެހީތެރިވެދީ، ޑިޖިޓަލް މުސްތަޤުބަލެއްގައި ބައިވެރިވުމަށް އިތުރަށް ތައްޔާރުވެވޭނެ ކަމަށެވެ.
އުރީދޫ އިން ބުނީ އީސިމް ޚިދުމަތާ އެކު، ކޮންމެ ތަނެއްގައި ހުރެގެން ވެސް ކަސްޓަމަރުންނަށް އުރީދޫ ނަމްބަރެއް ނަގައި ފަސޭހަކަމާ އެކު އެކްޓިވޭޓް ކޮށްލެވޭނެ ކަމަށެވެ. އެ ގޮތުން ހިދުމަތް ހޯދުމަށް އުރީދޫ މޯލްޑިވްސްގެ ވެބްސައިޓުގައިވާ، އީސިމް ޕޭޖަށް ޒިޔާރަތްކޮށް ބޭނުންވާ ޕްލޭން ޚިޔާރުކުރުމަށް ފަހު ފޯން ނަމްބަރު ރަޖިސްޓަރީކޮށް އަދި އޮންލައިންކޮށް ފައިސާ ދެއްކުމަށް ފަހު ލިބޭ ކޮންފަމޭޝަން އެސްއެމްއެސްގައިވާ ކިއުއާރް ކޯޑު ސްކޭންކުރުމަށް ފަހު، އީސިމް އެކްޓިވޭޓްކުރުމުން ހިދުމަތް ބޭނުން ކުރަން ފެށޭނެ ކަމަށް އުރީދޫ އިން ބުންޏެވެ.
