އީސްޓާ އެޓޭކް: އިތުރު ފަސް މީހަކު ހައްޔަރު ކޮށްފި

ސްރީލަންކާ އަށް އޭޕްރީލް މަހުގެ 21 ވަނަ ދުވަހު ދިން ޓެރަރިސްޓް ހަމަލާއާ ގުޅުން ހުރި ކަމަށް ބެލެވޭ ފަސް މީހަކު ސައުދި އަރަބިޔާއިން ހައްޔަރު ކޮށްގެން ލަންކާ އަށް ގެންގޮސްފިއެވެ.

އީސާއީ ދީނުގެ މީހުން ފާހަގަކުރާ އިސްޓާ ސަންޑޭއާ ދިމާކޮށް އަޅުކަން ކުރާ ތިން ފައްޅިއަކަށާއި މަތީ ފަންތީގެ ތިން ހޮޓަލަކަށް ދިން ހަމަލާގައި 258 މީހަކު މަރުވެ 500 އަށް ވުރެ ގިނަ މީހަކު ވަނީ ޒަހަމްވެފައެވެ.

ލަންކާގެ ފުލުހުންގެ ތަރުޖަމާނު ރުވާން ގުނަސޭކަރަ ހުކުރު ދުވަހު ވިދާޅުވީ، ހަމަލާއާ ގުޅުން ހުރި ކަމަށް ބެލެވޭ ފަސް މީހަކު ސައުދިއަރަބިޔާގެ ޖިއްދާއިން ހައްޔަރުކޮށްގެން ހުކުރު ހެނދުނު ލަންކާ އަށް ގެނެސްފައިވާ ކަމަށެވެ.

އެމީހުންނަކީ ސައުދީ ފުލުހުންގެ ބެލުމުގެ ދަށުގައި ތިބި މީހުންނެވެ. އެމީހުން އަނބުރާ ލަންކާ އަށް ގެންދިޔުމަށް ކްރިމިނަލް އިންވެސްޓިގޭޝަން ޑިޕާޓްމެންޓް (ސީއައިޑީ) އިން ސައުދީ އަށް ގޮސްފައި ވަނީ އަންގާރަ ދުވަހުއެވެ.

ހައްޔަރު ކޮށްފައިވާ ފަސް މީހުންގެ ތެރެއިން، މުހައްމަދު މިލްހާން އަކީ 2018 ވަނަ އަހަރުގެ ނޮވެމްބަރު މަހުގެ 30 ވަނަ ދުވަހު ބެޓިކޮލާގެ ވަވުނިތުގައި ފުލުހުންގެ ދެ ކޮންސްޓެބްލް އަކު މަރާލި ކަމުގެ ތުހުމަތު ކުރެވިފައިވާ މީހެކެވެ.

ލަންކާ އަށް ދިން ޓެރަރިސްޓް ހަމަލާގެ ޒިންމާ ހަތިޔާރު އެޅި ޓެރަރިސްޓު ޖަމާއަތެއް ކަމަށްވާ އައިއެސްއިން ނަގާފައިވާއިރު ލަންކާ ސަރުކާރު ބުނާގޮތުން ހަމަލާ ދީފައިވަނީ ހަރުކަށި އިސްލާމީ ޖަމާއަތެއް ކަމަށްވާ ނެޝަނަލް ތައުހީދު ޖަމާއަތް (އެންޓީޖޭ) އިންނެވެ.

އެންޓީޖޭގެ ލީޑަރު ޒަހްރާން ހާޝިމީ މަރުވެފައިވާކަން ލަންކާ ފުލުހުން ވަނީ ކަށަވަރު ކޮށްދީފައެވެ. ތަމަޅަ މީޑިއަމް އަށް ކިޔަވައިދޭ ސްކޫލެއްގެ ޕްރިންސިޕަލަކާ، ޓީޗަރަކު ހިމެނޭ ގޮތަށް 106 މީހަކު ވަނީ މިހާތަނަށް ހައްޔަރުކޮށްފައެވެ.

ލަންކާ އަށް ދިން ހަމަލާއަށް ފަހު މިހާރު އެގައުމުގެ ހާލަތު ދަނީ މަޑުމަޑުން ހަމަޔަކަށް އެޅެމުންނެވެ.