މާލެ އިންޑަސްޓްރިއަލް ޒޯން ސަރަހައްދަށް އުދަ އަރައިފި އެވެ.
ފުލުހުން ކޮށްފައިވާ ޓުވީޓެއްގައި ބުނެފައިވަނީ އިންޑަސްޓްރިއަލް ޒޯން ސަރަހައްދަށް އުދަ އަރަމުންދާތީ އެސަރަހައްދުގައި ހުރި ވެހިކަލްތައް ދުރައްޖައްސަވާ ރައްކާތެރިކަމުގެ ފިޔަވަޅު އެޅުމަށެވެ.
މޯލްޑިވްސް މީޓިއޮރޮލޮޖިކަލް ސާރވިސްއިން ބުނެފައިވަނީ ދިޔަވަރު ބޮޑުވާ ގަޑިތަކުގައި ރާއްޖޭގެ ބައެއް ރަށްރަށަށް އުދަ އަރާފާނެ ކަމަށް ލަފާކުރެވޭތީ އެކަމަށް ސަމާލުވުމަށް އެދޭ ކަމަށެވެ.
ކުރިއަށް އޮތް ސައުވީސް ގަޑިއިރު ރާއްޖޭގެ މޫސުމަށް ބަލާއިރު ރާއްޖޭގެ އުތުރުގެ ބައެއް ރަށްތަކަށް ކެރީގެއަސަރު ފޯރާނެ ކަމަށާއި އެހެން އަތޮޅުތަކަށް މޫސުން އާއްމުގޮތެއްގައި ރަގަޅު ވާނެ ކަމަށް މެޓު އޮފީހުން ވަނީ ބުނެފައެވެ.
ދެކުނާއި ހުޅަނގުދެކުނުން، އުތުރުގެ އަތޮޅުތަކަށް ގަޑިއަކު 6 މޭލާއި 15 މޭލާ ދެމެދުގެ ބާރު މިނުގައި ވައި ޖެހޭނެ ކަމަށް ލަފާކުރެވޭއިރު، ދެކުނާއި މެދުތެރޭގެ އަތޮޅުތަކަށް ގަޑިއަކު 3 މޭލާއި 13 މޭލާ ދެމެދުގެ ބާރު މިނުގައި ވައި ޖެހޭނެ އެވެ.
ރާއްޖޭގެ ކަނޑުތައް އާދައިގެ ވަރަކަށް މަޑުވި ނަމަވެސް ބައެއް އަތޮޅުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރު ކުރުމަކީވެސް އެކަށީގެންވާ ކަމެއް ކަމަށް މެޓުން ވަނީ ބުނެފައެވެ.
އެހެންކަމުން ހުރިހާ ފަރާތްތަކުންވެސް ރައްކާތެރި ކަމުގެ ފިޔަވަޅު އެޅުމަށް މެޓު އޮފީހުން ވަނީ އިލްތިމާސްކޮށްފައެވެ.
