ސުޕްރީމް ކޯޓުގެ ބާރުތައް ހަނިކޮށް ދިނުމަށް ބަންޑާރަ ނައިބު އެދިވަޑައިގެންފި
ފަނޑިޔާރުންނާ މެދު ކުރެވޭ ތުހުމަތުތައް އަވަސް މިނެއްގައި ބެލެން ޖެހޭ ކަމަށް ވިދާޅުވި
ބަންޑާރަ ނައިބް ރިއްފަތުއާ ޖޭއެސްސީގެ މެމްބަރު އީސާފުޅު
ސުޕްރީމް ކޯޓަށް ޖުޑީޝަލް ސަރވިސް (ޖޭއެސްސީ) ގެ ދުސްތޫރީ އަދި ގާނޫނީ ވާޖިބަށް ހުރަސްއެޅުން ހުއްޓުވުމަށްޓަކައި އެ ކޯޓުގެ ބާރުތައް ހަނިކޮށްދިނުމަށް ދައުލަތުގެ ބަންޑާރަ ނާއިބް އިބްރާހިމް ރިއްފަތު ރައްޔިތުންގެ މަޖިލީހުގައި އެދިވަޑައިގެންފިއެވެ.
ސުޕްރީމް ކޯޓުގެ ބާރުތައް ހަނިކުރުމަށް ބަންޑާރަ ނާއިބް އެދިފައި މިވަނީ އެ ކޯޓުން ޖޭއެސްސީގެ ނިންމުންތަކަށް ނުފޫޒު ފޯރުވަމުންދާތީ ކަމަށް ލަފާކުރެވެއެވެ.
ސުޕްރީމް ކޯޓުގެ ގާޒީއެއް ކަމަށްވާ އަބްދުﷲ ދީދީ ސަސްޕެންޑް ކުރި މައްސަލަ ކުރިޔަށް ނުގެންދިޔުމަށް ސުޕްރީމް ކޯޓުން ވަނީ ޖޭއެސްސީ އަށް އަމުރުކޮށްފައެވެ. އެކަމަކު ޖޭއެސްސީން ވަނީ އެ އަމުރު ބަލައިނުގަނެ ދީދީގެ ސަސްޕެންޝަން ދެމި އޮންނާނެ ކަމަށް ބުނެ ބަޔާނެއް ނެރެފައެވެ.
ޖޭއެސްސީގެ މެމްބަރުން ހާޒިރުކޮށް ބޭއްވި ރައްޔިތުންގެ މަޖިލީހުގެ ޖުޑީޝަރީ ކޮމެޓީ ނިންމަވާލެއްވުމުގެ ކުރިން ލިބުނު އެންމެ ފަހު ފުރުސަތުގައި ރިފްއަތު ވަނީ މަޖިލީސް މެމްބަރުންގެ އަރިހުން ތިން ކަމަކަށް އެދިވަޑައިގެންފައެވެ.
އެގޮތުން އެންމެ ފުރަތަމަ ކަމަކަށް ބަންޑާރަ ނާއިބް އެދިވަޑައިގެންފައިވަނީ ޖޭއެސްސީން ނިންމާފައިވާ ނިންމުން ދަމަހައްޓައި ތަންފީޒު ކުރުމަށްޓަކައި ކަމާބެހޭ ގާނޫނުތަކަށް ގެންނަން ޖެހޭ ބަދަލުތައް ގެނެސް، ސުޕްރީމް ކޯޓަށް ޖުޑީޝަލް ސަރވިސްގެ ދުސްތޫރީ އަދި ގާނޫނީ ވާޖިބަށް ހުރަސް އެޅުން ހުއްޓުވުމަށްޓަކައި މި ހިނދުން މި ހިނދަށް އަޅުއްވަން ޖެހޭ ހުރިހާ ފިޔަވަޅެއް އަޅުއްވައިދެއްވުމަށެވެ.
އަދި އޭގެ އިތުރުން ފަނޑިޔާރުގެ ގާނޫނުން ޖޭއެސްސީ އަށް ލާޒިމްކޮށްފައިވާ ފަނޑިޔާރުންގެ މަސައްކަތުގެ ފެންވަރު ވަޒަންކުރުމުގެ މަސައްކަތް ކުރިޔަށް ގެންދިޔުމަށްޓަކައި ރައްޔިތުންގެ މަޖިލީހުން ކޮށްދެވެން އޮތް ހުރިހާ މަސައްކަތެއް ކޮށްދިނުމަށް ބަންޑާރަ ނާއިބް ވަނީ މަޖިލީހުގައި އެދިވަޑައިގެންފައެވެ.
ދިވެހިރާއްޖޭގެ ކޯޓުތަކުގައި ތިއްބަވަން ޖެހޭ ފަނޑިޔާރުންގެ ގާބިލްކަމުގެ ފެންވަރު އެކަށީގެންވާ ގޮތަށް ވަޒަން ނުކުރެވި މިއަދާ ހަމަޔަށް އައުމުގެ ސަބަބުން ރައްޔިތުންގެ ހިތުގައި ފަނޑިޔާރުގެއާ މެދުގައި އިތުބާރުގެ މައްސަލަ އިންތިހާ އަށް ބޮޑުވެފައިވާ ކަން ރިފްއަތު ފާހަގަކުރެއްވިއެވެ.
ފަނޑިޔާރުންނާ މެދު ކުރެވޭ ކޮރަޕްޝަނާ ޖިނާއި ތުހުމަތުތައް ހާމަކަމާއި އެކީގައި އަވަސް މިނެއްގައި ބެލެވެން ޖެހޭ ކަމަށާއި، އެކަމަށްޓަކައި ކަމާ ބެހޭ އިދާރާއިން ކުރަން ޖެހޭ މަސައްކަތް އަވަސްކޮށް ދިނުމަށް އެމަނިކުފާނު އެދިވަޑައިގެންނެވިއެވެ.
