ޖުޑީޝަލް ސަރވީސް ކޮމިޝަން (ޖޭއެސްސީ) އިން ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ނިންމި ނިންމުން ދެމި އޮންނާނެކަމަށް އެ ކޮމިޝަނުން ނިންމައިފި އެވެ.
އެ ކޮމިޝަނުން އެގޮތަށް ނިންމީ ބުރާސްފަތި ދުވަހުގެރޭ ބޭއްވި ކުއްލި ބައްދަލުވުމުގައެވެ. އެ ބައްދަލުވުމަށް އެޖެންޑާކުރީ، ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ޖޭއެސްސީން ނިންމި ނިންމުމާއި ދެކޮޅަށް ސުޕްރީމް ކޯޓުން ނެރުނު އަމުރުގެ މައްސަލަ އެވެ.
ޖޭއެސްސީން ބުނީ އެ ބައްދަލުވުމަކީ ޖޭއެސްސީގެ 6 މެމްބަރަކު ސޮއިކޮށް ހުށަހެޅި ކުއްލި މައްސަލައާއި ގުޅިގެން ބޭއްވި ބައްދަލުވުމެއް ކަމަށެވެ.
ކޮމިޝަންގެ ކުއްލި ބައްދަލުވުމުން ނިންމީ ސުޕްރީމް ކޯޓުން ބުރާސްފަތި ދުވަހު ނެރުނު އަމުރަކީ ޤާނޫނު އަސާސީގެ 159 ވަނަ މާއްދާގެ (ށ) އާއި ޖުޑީޝަލް ސާރވިސް ކޮމިޝަންގެ ޤާނޫނުގެ 21 ވަަނަ މައްދާގެ (ށ) އިން ލިބިފައިވާ ބާރަށް ހުރަސްއަޅާ އަމުރެއްކަމަށެވެ. އަދި އެ އަމުރަކީ ޖޭއެސްސީގެ ދުސްތޫރީ އަދި ޤާނޫނީ ވާޖިބަށް ހުރަސްއަޅާ އަމުރެއްކަމަށާއި، ފަނޑިޔާރު އަބްދުﷲ ދީދީ ސަސްޕެންޑްކުރުމަށް ނިންމި ނިންމުމަކީ ތަންފީޒްވަމުންދާ ދެމިއޮތް ނިންމުމެއް ކަމަށް ޖޭއެސްސީގެ ކުއްލި ބައްދަލުވުމުން ނިންމާފައިވާކަމަށް އެ ކޮމިޝަނުން ބުންޏެވެ.
ޖޭއެސްސީގެ ކުއްލި ބައްދަލުވުން ފެށުމާއެކު މެމްބަރަކު ވަނީ ބައްދަލުވުމުގެ ރިޔާސަތުގައި އިންނެވި ކޮމިޝަންގެ ރައީސް، ސުޕްރީމް ކޯޓުގެ ފަނޑިޔާރު އަބްދުﷲ އަރީފާއި މަސްލަހަތު ފުށުއެރުމެއް އޮތް ހުށަހަޅާފަ އެވެ. އެ ހުށަހެޅުމަށް ތާއީދު ލިބުމާއެކު، ފަނޑިޔާރު އަބްދުﷲ އަރީފް ވަނީ ކޮމިޝަންގެ ބައްދަލުވުން ދޫކުރައްވައި ވަޑައިގެންފަ އެވެ.
ސުޕްރީމް ކޯޓުން ބުރާސްފަތި ދުވަހު ނެރުނު އަމުރުގައި ބުނެފައިވަނީ ސުޕްރީމް ކޯޓުގެ ފަނޑިޔާރު އަބްދުﷲ ދީދީއާ މެދު އެއްވެސް ފިޔަވަޅެއް ނޭޅުމަށެވެ. އަދި ސުޕްރީީމް ކޯޓުން މައްސަލަ ބަލައި ހުކުމެއް ކުރަންދެން އަބްދުﷲ ދީދީ ގޭގައި މަޑުކުރަން އެންގި އެންގުން ތަންފީޒު ކުރުން ފަސްކުރުމަށާއި، ޖޭއެސްސީއަށް ރައީސް ނަޝީދު ހުށަހެޅި މައްސަލައާ ގުޅިގެން އެއްވެސް އިޖުރާއަތެއް އެ ކޮމިޝަނުން ކުރިއަށް ނުގެންދިޔުމަށް އަމުރުކޮށްފައިވެއެވެ.
ބުދަ ދުވަހު ބޭއްވި ޖޭއެސްސީގެ ބައްދަލުވުމުގައި ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ނިންމެވީ އޭނާއާއި ގުޅޭގޮތުން ހުށަހެޅުނު މައްސަލައަކާއި ގުޅިިގެންނެވެ. އަދި އޭނާ ސަސްޕެންޑްކުރުމަށް ނިންމީ ކޮމިޝަންގެ ބައްދަލުވުމުގައި ތިއްބެވި 9 މެމްބަރުންގެ އަޤުލަބިއްޔަތު ލިބުމުންނެވެ.
