އޮލިމްޕިކް ލިޔޯން ދޫކޮށް، އެ ކްލަބަށް ކުޅެމުން އައި ފްރާންސްގެ ލެފްޓް ބެކް ފާލޭންޑް މެންޑީ ރެއާލް މެޑްރިޑަށް ބަދަލުވެއްޖެއެވެ.
އުމުރުން 24 އަހަރުގެ މެންޑީ ރެއާލްއަށް ހަ އަހަރުގެ އެއްބަސްވުމެއްގެ ދަށުން 48 މިލިއަން ޔޫރޯއަށެވެ.
ރެއާލްއިން ނެރުނު ބަޔާނެއްގައި ބުނީ، މެންޑީ ރެއާލްއަށް ބަދަލުވާން ނިންމާފައިވާ ކަމަށާއި، އޭނާ ކްލަބުގެ ކުޅުންތެރިޔެއްގެ ގޮތުގައި މި މަހުގެ 19 ވަނަ ދުވަހު ދައްކާލަން ވަނީ ހަމަޖެހިފައި ކަމަށެވެ.
ރެއާލްގައި 2025 ވަނަ އަހަރުގެ ނިޔަލަށް މެންޑީ މަޑުކުރަން ޖެހޭއިރު، މިފަހަރުގެ ޓްރާންސްފާގައި މެންޑީ ހޯދުމަށް ގިނަ ކްލަބްތަކުން ވަނީ މަސައްކަތް ކޮށްފައެވެ.
ފްރާންސްގެ ލީގް 2 ގެ ލެ ހަވްރޭއިން ކެރިޔަރު ފެށި މެންޑީ ވަނީ އެ ކްލަބުގެ ޔޫތު ޓީމަށްވެސް ކުޅެފައެވެ. އޭނާ ވަނީ އެ ކްލަބުގެ ޔޫތު ޓީމަށް 56 މެޗު އަދި ސީނިއަރ ޓީމަށް 51 މެޗު ކުޅފައެވެ.
ލެ ހަވްރޭ ދޫކޮށްލުމަށްފަހު، މެންޑީ ދެން ބަދަލުވީ 2017 ވަނަ އަހަރުގެ ސީޒަނުގައި ލިޔޯންއަށެވެ. އޭނާ ވަނީ އެ ކްލަބަށް ކުޅުނު 79 މެޗުގައި ތިން ލަނޑު ކާމިޔާބުކޮށްފައެވެ.
ފްރާންސް ގައުމީ ޓީމަށް މިހާތަނަށް ތިން މެޗު ކުޅެފައިވާ މެންޑީ ގައުމީ ޓީމަށް ފުރަތަމަ މެޗެއް ކުޅުނީ މިދިޔަ އަހަރެވެ. އޭނާ އަންނަނީ މިހާރު ބަރާބަރަށް ގައުމީ ޓީމުން ޖާގަ ހޯދަމުންނެވެ.
