ދިޔަވަރުބޮޑުވާ ގަޑީގައި ބައެއް ރަށްރަށަށް އުދައާރާފާނެތީ ސަމާލުވުމަށް މެޓް އޮފީހުން އެދިއްޖެ
13 ޖޫން 2019 | ބުރާސްފަތި 04:38އުދަ އެރުމުގެ ފުރުސަތު އޮންނަނީ ކަނޑުގެ ބާނި ބޮޑު ވުމުގެ ސަބަބުން
ދިޔަވަރުބޮޑުވާ ގަޑީގައި ބައެއް ރަށްރަށަށް އުދައާރާފާނެ ކަމަށް މެޓް އޮފީހުން ވަނީ ބުނެފައި
ދިޔަވަރު ބޮޑުވާ ގަޑިތަކުގައި ރާއްޖޭގެ ބައެއް ރަށްރަށަށް އުދަ އަރާފާނެ ކަމަށް ލަފާކުރެވޭތީ އެކަމަށް ސަމާލުވުމަށް މޯލްޑިވްސް މީޓިއޮރޮލޮޖިކަލް ސާރވިސް އިން އެދިއްޖެއެވެ.
ކުރިއަށް އޮތް 24 ގަޑިއިރަށް ރާއްޖޭގެ މޫސުން ލަފާކުރާ ގޮތާ ގުޅޭ ގޮތުން "ރާއްޖެއެމްވީ"އަށް މައުލޫމާތު ދެއްވަމުން މޫސުމާބެހޭ އިދާރާގެ އެސިސްޓެންޓް މީޓިއޮރޮލޖިސްޓް ހުސައިން ވަހީދު ވިދާޅުވީ، ޖުމުލަ ގޮތެއްގައި ކަނޑުތައް އާދައިގެ ވަރަކަށް މަޑުވާނެ ކަމަށާއި، ނަމަވެސް ދިޔަވަރު ބޮޑުވާ ގަޑިތަކުގައި އުދައަރާފާނެ ކަމަށް ލަފާ ކުރެވޭ ކަމަށެވެ. އެގޮތުން އެގަޑިތަކުގައި އުދަ އެރުމުގެ ފުރުސަތު އޮންނަނީ ކަނޑުތައް މަޑުވި ނަމަވެސް ކަނޑުގެ ބާނި ބޮޑުވުމުގެ ސަބަބުން ކަމަށް އޭނާ ވިދާޅުވިއެވެ.
ހުސެން ވަހީދު ވިދާޅުވީ، ޖުމުލަކޮށް މޫސުން ރަނގަޅު ނަމަވެސް އުތުރުގެ ބައެއް ހިސާބުތަކަށް ކޮންމެސް ވަރަކަށް ވާރޭ ވެހުމުގެ ފުރުސަތު އެބައޮތް ކަމަށާއި، ގުުގުރުން ވެސް އެކަށީގެންވާ ކަމަށެވެ. އަދި ރާއްޖޭގެ ހުރިހާ ހިސާބަކަށް ވެސް ވައި މަޑުވަމުން އަންނަ ކަމަށާއި، ނަމަވެސް އުތުރުގެ ބައެއް ހިސާބުތަކުގައި އަށް މޭލާއި 18 މޭލަށް ވައިގަދަވާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ. އޭގެ އިތުރުން، އުތުރުގެ އަތޮޅުތަކަށް ކަނޑުތައް އާދައިގެ ވަރަކަށް ގަދަވާނެ ކަމަށް ވެސް ލަފާކޮށްފައިވެއެވެ.
