އެމްއެމްޕީއާރްސީން ބާއްވާ ޕްރޮމޯޝަނަލް ބޭގް ޑިޒައިން ކުރުމުގެ މުބާރާތުގައި ބައިވެރިވުމުގެ ފުރުސަތު އަލުން ހުޅުވާލައިފި

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީން) ބާއްވާ ޕްރޮމޯޝަނަލް ބޭގް ޑިޒައިން ކުރުމުގެ މުބާރާތުގައި ބައިވެރިވުމުގެ މުއްދަތު އިތުރުކޮށްފިއެވެ.

ބުދަ ދުވަހު އެމްއެމްޕީއާރަސީން ކުރި އިއުލާނެެއްގައި ބުނީ، އެ ކޯޕަރޭޝަނުން 2020 ވަނަ އަހަރު ބައިވެރިވާ ފެއަރ، ރޯޑްޝޯ އަދި އެހެނިހެން މާކެޓިންގ އިވެންޓްތަކުގައި ބޭނުންކުރާ، "މޯލްޑިވްސް ސަނީ ސައިޑް ޕްރޮމޯޝަނަލް ބޭގް" ޑިޒައިންކުރުމުގެ މުބާރާތުގައި ބައިވެރިވުމުގެ މުއްދަތު އިތުރު ކުރެވިފައިވާ ކަމަށާއި، 18 އަހަރުން މަތީގެ ފަރާތްތަކާއި އޭގެ އިތުުރުން ކުންފުނިތަކަށްވެސް މި މުބާރާތުގައި ބައިވެރިވެވޭނެ ކަމަށެވެ.

މި މުބާރާތުގައި ބައިވެރިވާން ބޭނުންވާ ފަރާތްތަކުން 2019 ޖޫން 27 ވާ ބުރާސްފަތި ދުވަހުގެ މެންދުރު ފަހު 03:00 ގެ ކުރިން މުބާރާތުގެ ގައިޑްލައިނާއި އެއްގޮތަށް ޑިޒައިންތަށް އީމެއިލް ކުރުމަށް ފުރުސަތު ހުޅުވާލާފައިވާއިރު، މުބާރާތުގައި ޕޮއިންޓްދޭ މިންގަނޑުތަކާއި ގައިޑްލައިންތައް އިއުލާނުގައި ވަނީ ބަޔާންކޮށްފައެވެ.

ރާއްޖެއާއި ރާއްޖެއިން ބޭރުގެވެސް ގިނަ އިވެންޓު ތަކުގައި ބޭނުންކުރާ މޯލްޑިވްސް ސަނީ ސައިޑް ޕްރޮމޯޝަނަލް ބޭގް ޑިޒައިން ކުރުމުގެ މި މުބާރާތުން އެއްވަނައަށް ހޮވޭ ފަރާތަކަށް 25000 ރުފިޔާގެ އިނާމެއް ކަނޑައަޅާފައިވާއިރު، އެއްވަނައަށް ހޮވޭ ޑިޒައިންގައި ބޭނުންކުރާ ތީމް 2020 ވަނަ އަހަރުގެ ހުރިހާ ޕްރޮމޯޝަނަލް މެޓީރިއަލްއެއްގައި ބޭނުންކުރާނެއެވެ.