އައްޑޫގެ ޓާރޝަރީ ހޮސްޕިޓަލަށް ކިޔާނެ ނަމެއް ހޯދަނީ
ކައުންސިލުން 3 ނަމެއް ހުށައަޅާފައިވޭ
އައްޑޫ ކޮންވެންޝަން ސެންޓަރު ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތްކުރިއަށް ދަނީ. - ފައިލް ފޮޓޯ
އެމްޑީޕީގައި ހަދަމުން އަންނަ ޓަރޝަރީ ހޮސްޕިޓަލަށް ކިޔާނެ ނަމަކާ މެދު އާންމުންގެ ހިޔާލު ހޯދުމަށް ހުޅުވާލައިފިއެވެ.
އަންގާރަ ދުވަހު އައްޑޫ ސިޓީ ކައުންސިލުން ކުރި ޓްވީޓެއްގައި ބުނީ، އެމްޑީޕީ ސަރުކާރުން އައްޑޫގައި ކުރިން ހަދާފައިވާ ކޮންވެންޝަން ސެންޓަރުގައި ހަދަމުން އަންނަ ޓާރޝަރީ ހޮސްޕިޓަލަށް ދޭނެ ނަމެއް ފާސް ކުރުމަށްޓަކައި ކައުންސިލުން ނިންމާފައިވާ ނަންތަކަށް އާންމުންގެ ހިޔާލު ހޯދުމަށް ހުޅުވާލާފައިވާ ކަމަށާއި، އެ ގޮތުން ތިން ނަމަކަށް ރައްޔިތުންގެ ހިޔާލު ހޯދުމަށް ހުޅުވާލާފައިވާ ކަމަށެވެ.
ޓްވިޓަރ މެދުވެރިކޮށް ކައުންސިލުން ހުށައަޅާފައިވާ ނަންތަކަކީ "އިކުއިޓޯރިއަލް އައްޑޫ ހޮސްޕިޓަލް"، "އައްޑޫ ހޮސްޕިޓަލް"، އަދި "ސުވަދީވް ހޮސްޕިޓަލް" އެވެ.
ޓްވިޓަރ މެދުވެރިކޮށް ނަންތަކަށް ވޯޓުލުމަށް ހުށައަޅާފައިވާއިރު، ކައުންސިލުން ބުނީ، ހޮސްޕިޓަލަށް ކިޔާނެ ނަމަކާ މެދު އިތުރު ހިޔާލެއްވާ ނަމަ ހުށައެޅުމުގެ ފުރުސަތު ވެސް ހުޅުވާލާފައިވާ ކަމަށެވެ.
އައްޑޫގައި ހަދަމުންދާ 100 އެނދުގެ ޓަރޝަރީ ހޮސްޕިޓަލަށް ކިޔާނެ ނަމެއް ފާސް ކުރަން ހުޅުވާލާފައިވާއިރު، އައްޑޫގެ ސިއްހީ ނިޒާމަށް ކުރިމަތިވެފައިވާ ހުރިހާ މައްސަލައަކަށް ޓަރޝަރީ ހޮސްޕިޓަލް ހުޅުވުމުން ހައްލު ލިބޭނެ ކަމަށް ހެލްތު މިނިސްޓަރު އަބްދުﷲ އަމީން ވަނީ ވިދާޅުވެފައެވެ.
