ބިލް ބޮޑުވީ ހޫނު ގަދަވުމާއި ރޯދަ މަހު ކަރަންޓް ބޭނުންކުރި މިންވަރު އިތުރުވުމުން: ސްޓެލްކޯ

ކަރަންޓުގެ ބިލު ބޮޑުވެފައި ވަނީ ހޫނު ގަދަވުމާއި ރޯދަ މަހާ ދިމާކޮށް ކަރަންޓް ބޭނުންކުރި މިންވަރު އިތުރުވުމުން ކަމަށް ސްޓެލްކޯ އިން ބުނެފިއެވެ.

އަންގާރަ ދުވަހު ސްޓެލްކޯއިން ބޭއްވި ނޫސްވެރިންގެ ބައްދަލުވުމެއްގައި ސްޓެލްކޯގެ ޖެނެރަލް މެނޭޖަރ މުހައްމަދު ސަލީމް ވިދާޅުވީ، ފާއިތުވި ދުވަސްތަކުގެ ތެރޭގައި ހޫނު ގަދަވުމުގެ ސަބަބުން ގިނައިން ކަރަންޓް ބޭނުންކޮށްފައިވާ ކަމަށާއި، ކަރަންޓް ބޭނުންކުރާ މިންވަރު އިތުރުވުމުގެ ސބަބުން ކޮންމެ އަހަރަކު ވެސް ރޯދަމަހާ ދިމާކޮށް ކަރަންޓްގެ އަގު ބޮޑުވުމަށް މެދުވެރިވާ ކަމަށެވެ.

ސްޓެލްކޯ އިން އެހެން ބުނެފައިވާއިރު، ސަރުކާރުން އަގު ހެޔޮކޮށްފައިވާ ކަރަންޓްގެ އަގަށް ބަލައިގެން ތައްޔާރު ކުރި ކަރަންޓް ބިލްތައް ގެތަކަށް ލިބުނު އިރު ކުރީ މަސްތަކަށް ވުރެ އާދަޔާ ހިލާފަށް ބިލް ބޮޑުވެފައިވާކަމުގެ ޝަކުވާ ގިނަ ބަޔަކު ދަނީ ކުރަމުންނެވެ.

ކަރަންޓްގެ އަގު ކުޑަކުރުމަކީ ރައީސް ސޯލިހުގެ ވައުދެއް ކަމަށް ވުމާ އެކު އޭޕްރީލް މަހުގެ 1 ވަނަ ދުވަހު ސަރުކާރުން ވަނީ ކަރަންޓްގެ އަގު ހެޔޮކުރިކަން އިއުލާނުކޮށްފައެވެ. އަދި މާލެއެކޭ އެއް ހަމައަކަށް ރަށްރަށުގެ ކަރަންޓް ރޭޓް ވަނީ ކަނޑައަޅާފައެވެ. ކަރަންޓްގެ އަގު އަގުހެޔޮކުރިކަން ސަރުކާރުން އިއުލާނުކުރި ނަމަވެސް ފާއިތުވި ދެ މަހުގެ ބިލު، ހާއްސަކޮށް އެންމެ ފަހުގެ ބިލު ބޮޑުވެފައިވާތީ ގިނަ ބަޔަކު ދަނީ ޝަކުވާކުރަމުންނެވެ.