މުޖުތަމައު ބާރުވެރި ކުރުމާ ގުޅޭ ގޮތުން އާންމުންގެ ކިޔާލު ހޯދުމާ ގުޅޭ ކަރުދާސް އާންމުކޮށްފިއެވެ.
އަންގާރަ ދުވަހު މިނިސްޓަރ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަހުލޫފު ކުރެއްވި ޓްވީޓެއްގައި ވިދާޅުވީ، "މުޖުތަމައު ބާރުވެރި ކުރުވުން- ހުދު ކަރުދާސް" ނަމުގައި މިނިސްޓްރީގެ ކޮމިއުނިޓީ އެމްޕަވަރމަންޓް ޑިޕާރޓްމަންޓުން ތައްޔާރުކުރި ކަރުދާސް އާންމުކޮށްފައިވާ ކަމަށާއި، އެ ކަރުދާސް މެދުވެރިކޮށް އާންމުންގެ ހިޔާލު ހޯދުމަށް ހުޅުވާލާފައިވާ ކަމަށެވެ.
މި ކަރުދާސް ލޯންޗު ކުރުމުގެ ރަސްމިއްޔާތުގައި ޕްރޮފެސަރ އުގައިލް ވެސް ބައިވެރިވެ ވަޑައިގެންފައިވާއިރު، އެކަމަށްޓަކައި މިނިސްޓަރ ވަނީ އުގައިލުއަށް ޝުކުރު އަދާ ކުރައްވާފައެވެ.
މި ކަރުދާހަކީ ދިވެހިންނަށް ހައްޤު މިންވަރު ހޯދުމުގައި އަމިއްލަ ބައިވެރިވުން އިތުރު ކުރުމާއި، އަމިއްލަ އިސްނެގުމުގެ މަތިން މުޖުތަމައުގެ ތަރައްޤީއަށް މަސައްކަތް ކުރުމުގައި ބާރު އަޅައި، ރައްޔިތުން ބާރުވެރި ކުރުމުގެ ގޮތުން މިނިސްޓްރީން ކުރިއަށްގެންދިއުމަށް ހަމަޖެހިފައިވާ ކަންކަމާ ގުޅޭގޮތުން ރައްޔިތުންގެ ހިޔާލު ހޯދުމުގެ މަޤުސަދުގައި އާންމުކޮށްފައިވާ ކަރުދާހެކެވެ.
