އައްޑޫގައި ބާއްވާ އުރީދޫ ކަލަރ ރަންގައި ބައިވެރިވާން ހުޅުވާލައިފި

އައްޑޫގައި ބާއްވާ އުރީދޫ ކަލަރ ރަންގައި ބައިވެރިވުމުގެ ފުރުޞަތު އުރީދޫ މޯލްޑިވްސް އިން ހުޅުވާލައިފިއެވެ.

އުރީދޫ އިން ބުނީ، ހަ އަހަރުން މަތީގެ ހުރިހާ ފަރާތްތަކަށް ވެސް، މި ދުވުމުގައި ބައިވެރިވުމުގެ ފުރުސަތު ހުޅުވާލެވިފައިވާ ކަމަށާއި، 5 ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށް ވެސް ބައިވެރިވެވޭނެ އިވެންޓެއް ކަމަށެވެ. އޭގެ އިތުރުން، ކޮންމެ ކިލޯމީޓަރެއް ދުވެ ނިމުމުން ބެހެއްޓިފައިވާ ކުލަ ސްޓޭޝަންތަކުން އެކަން ފާހަގަ ކުރާނެ ކަމަށާއި، މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހެއް ނޫން ކަމަށް ވެސް އުރީދޫ އިން ބުނެފައި ވެއެވެ.

ޖޫން މަހުގެ 28 ވަނަ ދުވަހު އައްޑޫގައި ކުރިއަށްގެންދާ މި ކަލަރ ރަން މިނިސްޓްރީ އޮފް ޔޫތު، ސްޕޯޓްސް އެންޑް ކޮމިޔުނިޓީ އެމްޕަވަރމަންޓްއާ ގުޅިގެން އުރީދޫއިން ކުރިއަށް ގެންދާއިރު، މިފަހަރު އިވެންޓް އޯގަނައިޒަރއަކީ ޔުނިކްސް ސްޕޯޓިންގ ކަމަށް އުރީދޫއިން މައުލޫމާތުދެއެވެ.

މި ކަލަރ ރަންގެ ކިޓުތައް ދެ ގެޓެގަރީއަކުން ލިބޭއިރު، ސްޓޭންޑަޑް ކިޓްގެ ޓީޝާރޓުގެ އަގަކީ 85ރ. އެވެ. އޭގެ އިތުރުން، ފަން ކިޓުގައި 150ރ. އަށް ލިބޭ އުރީދޫ ކަލަރ ރަން އައްޑޫ ޓީޝާޓްގެ އިތުރުން ރިސްޓްބޭންޑަކާއި، ކަރުދާސް ތޮތްޕަކާއި ފޮތި ދަބަހެއް ހިމެނިފައި ވެއެވެ.

މި ފަހަރުގެ ކަލަރ ރަންގައި ވީހާ ވެސް ގިނަ ފަރާތްތަކުން ބައިވެރިވުމަށް އުރީދޫ އިން އެދިފައި ވެއެވެ.

އުރީދޫ އިން 2017 ވަނަ އަހަރުން ފެށިގެން ހުޅުމާލޭގައި ބާއްވަމުން އަންނަ ކަލަރ ރަންއަކީ ފަސް ކިލޯމީޓަރުގެ ދުވުމުގެ ހަރަކާތެކެވެ. މި ދުވުމުގައި ގަޑިއަށް ބަލައިގެން އެއްވެސް ވަނައެއް ނުދޭއިރު، އިނާމު ދޭން ހަމަޖެހިފައި ވަނީ އެންމެ ތަފާތު ދުވުމުގެ ސްޓައިލް ގެންގުޅޭ ދުވުންތެރިންނަށެވެ. މި ފަހަރުގެ ރަންގައި ވެސް ކުލަ ޖެހުމާއި މިއުޒިކީ ފަންނާނުންގެ ހަރަކާތްތައް ހިމެނެއެވެ. ފާއިތުވެ ދިޔަ ދެ އަހަރުގައި މި ރަންއަށް ބޮޑު ތަރުހީބެއް ލިބިފައި ވެއެވެ.