"ފްރެންޑްސް" އަނބުރާ ގެންނަން ކާސްޓް އޮތީ ތައްޔާރަށްކަމަށް ޖެނިފަރ އެނިސްޓަން ބުނެފި!

އެމެރިކާގެ އެންމެ ކާމިޔާބު އެއް ޓީވީ ޝޯވކަމަށްވާ "ފްރެންޑްސް"ގެ ތަރިން ޝޯވ އަނބުރާ ގެންނަން ތައްޔާރަށް ތިބިކަމަށް އެ ޝޯވގެ ތަރި ޖެނިފަރ އެނިސްޓަން ބުނެފިއެވެ،

ޖެނިފަރ މިހެން ބުނެފައިވަނީ "ދަ އެލެން ޝޯވ"އަށް ދިން އިންޓަވިއު އެއްގައެވެ.

1994 އިން 2004 އަށް ކުރިއަށް ދިޔަ "ފްރެންޑްސް"ގައި ފެންނަނީ ހަ އެކުވެރިންނެވެ. އެއީ ޖެނިފަރ ކުޅޭ ރޯލްކަމަށްވާ ރޭޗަލް ގްރީންގެ އިތުރުން، މޮނިކާ ގެލަރ (ކޯޓްނީ ކޮކްސް)، ފީބީ ބުފޭ (ލީސާ ކޫޑްރޯ) އަދި ފިރިހެންނުންކަމަށްވާ ރޮސް ގެލަރ (ޑޭވިޑް ޝްވިމަރ)، ޖޯއީ ޓްރިބިއާނީ (މެޓް ލަ ބްލާންކް) އަދި ޗޭންލަރ (މެތިއު ޕެރީ)އެވެ.

މި ހަ ތަރިންވެސް ޝޯވ އަނބުރާ ގެންނަން ތައްޔާރަށް ތިބިކަމަށް ޖެނިފަރ ބުންޏަސް، ވޭތުވެ ދިޔަ އަހަރު ތަކުގައި ޝޯވގެ ކާސްޓް ބުނެފައިވަނީ އެއީ ވާނެ ކަމެއް ނޫންކަމަށެވެ.

އަދި އޭނާ މިހެން ބުނެފައި މިވަނީ ޝޯވ ފެށިތާ 25 އަހަރު ވާން ތިން މަހަށް ވެފައިވަނިކޮށެވެ. އެހެންކަމުން މި ޝޯވގެ ބައެއް ތަރިން ދެކޭ ގޮތުގައި މިއީ ޝޯވ އަނބުރާ އައުމުގެ ސައިން އެކެވެ. ނަމަވެސް، ބައެއް ފޭނުން ދަނީ ޝޯވ އަނބުރާ ނުގެނުމަށް ގޮވާލަމުންނެވެ.