ދާއިމީ ކޮމިޓީތަކުގައި ތިއްބަވާނެ މެމްބަރުންގެ އަދަދަށް ބަދަލު ތަކެއް

ރައްޔިތުންގެ މަޖިލީހުގައި ހިމެނޭ ދާއިމީ 16 ކޮމިޓީގައި ޕާޓީތައް ތަމްސީލު ކުރާނެ މެމްބަރުންގެ އަދަދު އެކަމަށް ކަނޑައެޅި ދެ ކޮމިޓީއިން ކަނޑައަޅައިފިއެވެ.

ކޮންމެ ކޮމެޓީއެއްގައި 11 މެމްބަރުން ތިބުމަށް ވަގުތީ ގަވައިދު ކޮމިޓީން ނިންމާފައިވަނީ މިމަހުގެ 2 ވަނަ ދުވަހުއެވެ. އެހެންކަމުން ކޮމިޓީތަކަށް މެމްބަރުން ބެހުމަށް މަޖިލީހުގެ ދާއިމީ ކޮމިޓީތައް އެކުލަވާލުމަށް ހޮއްވެވި ވަގުތީ ކޮމިޓީއެއް އެކުލަވާލިއެވެ.

Advertisement

އެގޮތުން އެ ކޮމިޓީއިން ނިންމި ނިންމުމުގައި 241 ކޮމިޓީ ފިޔަވައި ދެން ހުރި ކޮންމެ ކޮމިޓީއެއްގައި 11 މެމްބަރުން ހިމެނޭ ނަމަ ކޮމިޓީތަކުން 176 ޖާގަ ލިބެއެވެ.

އެއީ މަޖިލީހުގައި 65 މެމްބަރުން ހިމެނޭ އެމްޑީޕީއަށް ދީފައިވަނީ 75 ޕަސެންޓަށްވާ 132 ޖާގައެވެ. އޭރުން ކޮންމެ ކޮމިޓީއަކުން އެމްޑީޕީއަށް ލިބެނީ 9-8 ޖާގައެވެ. ޖޭޕީއާއި ޕީޕީއެމްގައި ކޮންމެ ޕާޓީއެއްގައި މަޖިލީސް ތަމްސީލު ކުރާ ފަސް މެމްބަރުން ތިއްބަވާއިރު ކޮންމެ ޕާޓީއަކަށް ލިބިފައި ވަނީ ހަ ޕަސެންޓަށްވާ 10 ޖާގައެވެ. ޖޭޕީއާއި ޕީޕީއެމް އަށް ތިބެވެނީ ކޮންމެ ޕާޓީއަކުން އެއް މެމްބަރެކެވެ.

ޕީއެންސީގައި ތިން މެމްބަރުން ތިއްބަވާއިރު އެ ޕާޓީއަށް ލިބެނީ ހަ ކޮމެޓީއަކުން ހަ ޖާގައެވެ. އެއީ ތިން ޕަސެންޓެވެ. އެމްޑީއޭގައި ދެ މެމްބަރުން ތިއްބަވާއިރު އެ ބޭފުޅުންނަށް ލިބެނީ ދެ ޕަސެންޓާއި އެކު ހަތަރު ކޮމިޓީއަކުން ހަތަރު ޖާގައެވެ. އަމިއްލަ މެމްބަރުންގެ ގޮތުގައި ހަތް ބޭފުޅުން ތިއްބަވާ އިރު އެ ބޭފުޅުންނަށް 14 ކޮމިޓީއަކުން ޖާގަ ލިބެ އެވެ. އެއީ އަށް ޕަސެންޓަށްވާވަރަށް 14 ކޮމިޓީގެ ތެރެއިން ކޮންމެ ކޮމިޓީއެއްގައި އަމިއްލަ އެއް މެމްބަރެވެ.

އެ ޖާގަތައް ބަހާލުމުން ބައެއް ކޮމިޓީތަކުގައި ވަގުތީ ގަވައިދު ކޮމިޓީން ނިންމި ގޮތާއި ޚިލާފަށް 11 މެމްބަރުންނަށް ވުރެ އިތުރު ވެއެވެ. އަދި ބައެއް ކޮމިޓީތަކުގައި 11 މެމްބަރުންނަށް ވުރެ މަދު ވެއެވެ.

ޕާޓީތައް ތަމްސީލު ކުރާނެ ގޮތް ވަގުތީ ކޮމިޓީން ނިންމިގޮތަށް ބަލާއިރު އެންމެ ގިނަ މެމްބަރުން ހިމެނެނީ މާލިއްޔަތު ކޮމިޓީގައެވެ. އެކޮމިޓީގައި 14 މެމްބަރުން ތިއްބަވައެވެ. އިގްތިސާދީ ކޮމިޓީއާއި މިނިވަން މުއައްސަސާތަކުގެ ކޮމިޓީއާއި ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީއާއި ސްޓޭޓް އޯންޑް އެންޓަރޕްރައިޒަސް ކޮމިޓީގައި، ކޮންމެ ކޮމިޓީއެއްގައި 13 މެމްބަރުން ތިއްބަވައެވެ.

އެންމެ މަދު މެމްބަރުން ބޭނުންވެލެއްވީ ޕެޓިޝަން ކޮމިޓީއިންނެވެ. އެ ކޮމިޓީއިން ޖާގަ ބޭނުންވެލެއްވީ އަށް މެމްބަރުންނެވެ.

16 މެމްބަރުން ތިއްބަވާނެ ކޮމިޓީތައް، ކޮމިޓީތަކަށް މެމްބަރުން ބެހުމަށް މަޖިލީހުގެ ދާއިމީ ކޮމިޓީތައް އެކުލަވާލުމަށް ހޮއްވެވި ވަގުތީ ކޮމިޓީއިން ވަގުތީ ގަވައިދު ކޮމިޓީއަށް ފޮނުވުމުން އެ ކޮމިޓީއިން ވަނީ މެމްބަރަކު ބަދަލު ކުރަން ވާނީ މެމްބަރުންގެ ރުހުން އޮވެގެން ކަމަށާއި އެނޫންގޮތަކަށް މެމްބަރަކު ބަދަލު ނުކުރެވޭނެ ގޮތަށް ކަނޑައަޅާފައެވެ. އެގޮތަށް ވަގުތީ ގަވައިދު ކޮމިޓީއަށް ހުށައެޅުއްވީ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާއެވެ. އެ ހުށައެޅުއްވުމަށް ތާއީދު ކުރައްވާ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ރުހުން ނެތި މެމްބަރުން ކޮމިޓީތަކަށް ބަދަލު ކުރުމުން އެކަން ނިމިދިޔަ މަޖިލީހުން ފެނިގެން ދިޔަ ކަމަށާއި ކޯރަމް ހަމަނުވެ ކޮމިޓީތައް ނުބޭއްވޭތަން އައި ކަމަށެވެ. އަދި އެކަން ތަކުރާރު ވިޔަ ނުދިނުމަށް އެހުށައެޅުއްވުމަށް ތާއީދު ކުރައްވާ ކަމަށެވެ. އަބްދުލްޣަފޫރު ހުށައެޅުއްވި ހުށައެޅުއްވުން ފާސްވީ ބައިވެރިވެ ވަޑައިގެންނެވި މެމްބަރުންގެ އަޣުލަބިއްޔަތުންނެވެ.