ބަޔާން މިއުނިކް ދޫކޮށްލުމަށްފަހު ބްރެޒިލްގެ ރައިޓްބެކް ރަފީނާ ފްލެމިންގޯއަށް ސޮއިކޮށްފިއެވެ.

ބަޔާންގައި 8 ސީޒަން ހޭދަކުރުމަށްފަހު، އުމުރުން 33 އަހަރުގެ ރަފީނާ ފްލެމިންގޯއަށް ސޮއިކޮށްފައިވަނީ ދެ އަހަރުގެ އެއްބަސްވުމެއްގެ ދަށުންނެވެ.

ބަޔާން ދޫކޮށްލުމަށްފަހު ރަފީނާ ބުނީ، ފާއިތުވެދިޔަ 8 އަހަރު ތެރޭގައި ބަޔާންގައި ކާމިޔާބު ދުވަސްތަކެއް ހޭދަކުރެވިފައިވާ ކަމަށާއި، ކްލަބާއެކު ވަރަށް ގާތް ގުޅުމެއް އުފެދިފައިވާ ކަމަށެވެ.

އެގޮތުން ރަފީނާ ބުނީ، އެގުޅުން އަބަދުވެސް ދެމި އޮންނާނެ ކަމަށާއި، ކްލަބުގެ ކުޅުންރިންނާއި، މެނޭޖްމަންޓް އަދި ސަޕޯޓަރުންނަށް ވަރަށް ބޮޑު ޝުކުރެއް އަދާކުރާ ކަމަށެވެ.

މީގެކުރިން ޝާލްކޭއަށްވެސް ކުޅެފައިވާ ރަފީނާ ބަޔާންއަށް ބަދަލުވީ 2011 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް ކުޅުނު 265 މެޗުގައި ހަ ލަނޑު ކާމިޔާބުކޮށްފައެވެ.

ބަޔާންއާއެކު ހަތް ލީގު ތަށި ކާމިޔާބުކޮށްފައިވާ ރަފީނާ ވަނީ އެ ކްލަބާއެކު ޖަރުމަން ކަޕް ހަތަރު ފަހަރު، ޔުއެފާ ޗެމްޕިއަންސް ލީގު އެއްފަހަރު، ޔުއެފާ ސުޕަކަޕް އެއްފަހަރު އަދި ފީފާ ކްލަބް ވޯލްޑް ކަޕް އެއްފަހަރު ކާމިޔާބުކޮށްފައެވެ.

ރަފީނާ ވަނީ ބްރެޒިލް ގައުމީ ޓީމަށް މިހާތަނަށް ހަތަރު މެޗު ކުޅެފައެވެ.