މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓުން މޯލްޑިވްސް ސްކައުޓް އެންޑް ގައިޑް ފެލޯޝިޕްއާ ދިވެހިރާއްޖޭގެ އިސްރަށްވެހިންގެ ޖަމިއްޔާއިން ގުޅިގެން އިސްރަށްވެހިންނަށް ޚާއްސަ ޕްރޮގްރާމެއް ބާއްވަން ނިންމައިފިއެވެ.

ޔޫތު މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު މަހުލޫފު ވިދާޅުވީ އިސްރަށްވެހިން ބާރުވެރިކުރުވުމަށް ޖަމިއްޔާތަކާ ގުޅިގެން ކުރަންޖެހޭ ހުރިހާ މަސައްކަތެއް ކުރާނެ ކަމަށާއި، މި މަސައްކަތްތައް ކުރުމަށް ޖަމިއްޔާތަކަށް ފުރުސަތުފަހިކޮށްދޭނެ ކަމަށެވެ.

އެމްޕަވަރމަންޓުން މޯލްޑިވްސް ސްކައުޓް އެންޑް ގައިޑް ފެލޯޝިޕްގެ ފަރާތުން މައުލޫމާތު ދެއްވަމުން ޑރ. މަރިޔަމް ޝަކީލާ ވިދާޅުވީ މި ޕްރޮގްރާމް ކުރިއަށް ގެންދަނީ މާލެ އާއި ވިލިމާލޭގައި ދިރިއުޅޭ އިސްރަށްވެހިންނަށް ޖޫން 15 ވާ ހޮނިހިރު ދުވަހުގެ ހަވީރު ކަމަށެވެ. އަދި މިޕްރޮގްރާމްގައި މާލެއިން ބައިވެރިވާ އިސްރަށްވެހިން ވިލިމާލެ ގެންދިއުމުގައި ހަރަކާތްތެރިވަނީ މާލޭ ސިޓީ ކައުންސިލްގެ ވުމެންސް ޑިވަލޮޕްމެންޓް ކޮމެޓީންކަން އޭނާ ފާހަގަކުރެއްވިއެވެ.

ޑރ. ޝަކީލާ ވިދާޅުވީ 2017 އިން ފެށިގެން އިސްރަށްވެހިންނަށް ޚާއްސަކޮށްގެން ގިނަ ޕްރޮގްރާމްތަކެއް ހިންގަމުން އަންނަ ކަމަށެވެ. މިފަދަ ޕްރޮގްރާމްތަކުގައި ރިސޯޓުތަކަށް ގެންދިއުމާއި، ފަތުރުވެރިކަމުގެ ދާއިރާގެ ތަޖުރިބާކުރުމުގެ ފުރުސަތުފަހިކޮށްދީފައިވާ ކަމަށެވެ. އަދި މައުލޫމާތު ދިނުމާއި، ހޭލުންތެރިކަން އިތުރުކުރުން ހިމެނޭ ކަމަށް ވިދާޅުވިއެވެ.

ޔޫތު މިނިސްޓްރީން ބުނީ ވިލިމާލޭގެ އިޖްތިމާއީ މަރުކަޒުގައި މިއަންނަ ހޮނިހިރު ދުވަހުގެ ހަވީރު ބާއްވާ މި ޕްރޮގްރާމްގައި ރަނގަޅު ސިއްހަތުގައި ހުރުމަށް މަސައްކަތް ކުރާނެ ގޮތާއި، އީދު ހަދިޔާ ބެހުމާއި، ކަސްރަތު ކުރާނެ ގޮތްތައް ކިޔައިދިނުމާއި، އިޖްތިމާއި ހޭލުންތެރިކުރުމުގެ އިތުރުން ތަފާތު ކުޅިވަރުތައް ބާއްވާނެ ކަމަށެވެ.