މަތީ ތައުލީމް ލޯން މައްސަލާގައި އެމްޑީޕީގެ މެމްބަރުން މިނިސްޓަރާއި މަޝްވަރާކޮށްފި
9 ޖޫން 2019 | އާދީއްތަ 14:44ލޯނަށް ހުށަހެޅުމަށް ލުއިގޮތްތަކެއް ހަމަޖައްސައިދިނުމަށް މެމްބަރުން މިނިސްޓަރަށް ހުށަހެޅި
މިނިސްޓަރާއެކު ބޭއްވި ބައްދަލުވުމުގެ ތެރެއިން
ގިނަ ދަރިވަރުންތަކަކަށް މަތީ ތައުލީމްްގެ ލޯން ނުލިބުނު މައްސަލާގައި އެމްޑީޕީގެ ޕާލިމެންޓްރީ ގުރޫޕްގެ މެމްބަރުން ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަންއާ މަޝްވަރާކުރައްވައިފި އެވެ.
މިނިސްޓަރ ޑރ. އިބްރާހިމް ހަސަނާ މަޝްވަރާކޮށްފައިވަނީ ސަރުކާރުގެ ވައުދުތައް ފުއްދާ މިންވަރާ ގުޅެގޮތުން އެމްޑީޕީން އުފައްދާފައިވާ ކޮމެޓީތަކުގެ ތެރެއިިން "ފަހުރުވެރިި އާއިލާ" ކޮމެޓީންނެވެ. އެ ކޮމެޓީގައި ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވެސް ހިމެނިވަޑައިގަންނަވައެވެ.
ރާއްޖެ.އެމްވީއަށް މައުލޫމާތުދެއްވަމުން ކޮމެޓީގެ މުޤައްރިރުކަން ކުރައްވާ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ލޯނު މައްސަލާގައި ހުރި ކަންބޮޑުވުންތައް އޮޅުންފިލުއްވި ކަމަށެވެ. އަދި ހުރި މައްސަލަތައް ހައްލުކުރާނެގޮތާ ގުޅެގޮތުން މަޝްވަރާކުރެވުނު ކަމަށާއި، އެޕްލިކޭޝަން ހުށަހެޅުމަށް މިހާރު ހުރި ދަތިތައް ލުއިކޮށްދިނުމަށް ހުށަހެޅިކަމަށް އަލީ އާޒިމް ވިދާޅުވި އެވެ. އަދި ލޯން ނުލިބުނު ދަރިވަރުންނަށް، ލޯން ނުލިބުނީ ވރަށް ކުދިކުދި މައްސަލަތައްޖެހިގެންކަމުން އެކަންކަން ހައްލުކުރުމުގެ ފުރުސަތެއް އެ ކުދިންނަށް ދިނުމަށް ހުށަހެޅި ކަމަށް ވެސް އާޒިމް ވިދާޅުވި އެވެ.
ރާއްޖެ.އެމްވީއަށް މައުލޫމާތުދެއްވަމުން މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދު ވިދާޅުވީ އެ ބައްދަލުވުމުގައި ގިނަ ދަރިވަރުންތަކަކަށް ލޯނު ނުލިބުމުން މެމްބަރުންގެ ހުރި ކަންބޮޑުވުންތައް މިނިސްޓަރާ ހިއްސާކުރި ކަމަށެވެ. އަދި ދަރިވަރުންނަށް ލޯން ނުލިބުނު ސަބަބުތައް މިނިސްޓަރުގެ ކިބައިން އޮޅުން ފިލުވިކަމަށާއި، އެޕްލިކޭޝަންގައި ޖެހުނު މައްސަލަތައް ވެސް މެމްބަރުން މިނިސްޓަރުގެ ކިބައިން އޮޅުން ފިލުއްވި ކަމަށެވެ.
ބައްދަލުުވުމާއި ގުޅެގޮތުން ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމް ކުރެއްވި ޓުވީޓެއްގައި ވިދާޅުވީ މިނިސްޓަރާއެކު ބޭއްވި ބައްދަލުވުމުގައި މިނިސްޓަރ ކަންކަން ރަނގަޅުކޮށް ރައީސް އިބްރާހިމް މުހައްމަދު ސޯލިހްގެ ވައުދު ފުއްދުމަށް މިނިސްޓަރ ފިޔަވަޅު އަޅުއްވާނެ ކަމަށް ވިދާޅުވި ކަމަށެވެ. އަދި މާދަމާ އަލުން އަނެއްކާވެސް ފުރުސަތު ހުޅުވާލާނެކަމަށް މިނިސްޓަރ ވިދާޅުވިކަމަށް ސަލީމް ވިދާޅުވި އެވެ.
ހަޔަރ އެޑިއުކޭޝަން މިނިސްޓަރު ޑރ. އިބްރާހީމް ހަސަން މީގެކުރިން ކުރެއްވި ޓުވީޓެއްގައި ވިދާޅުވީ ލޯނު ލިބުނީ 79 ފަރާތަކަށް ކަމަށެވެ. ގިނަ ދަރިވަރުން ޑިސްކޮލިފައިވީ އާންމުކުރެވުނު އުސޫލާ ހިލާފަށް އެޕްލިކޭޝަން ހުށަހެޅިފައި ވާތީ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ޑިސްކޮލިފައިވި ސަބަބު ހަޔާ އެޑިއުކޭޝަން މިނިސްޓްރީން ހާމަކޮށްދޭނެ ކަމަށާއި، ބާކީ ޖާގަތަކުގައި ކިޔެވުމަށް މި މަހުގެ 20 ގައި އަނެއްކާ ވެސް ލޯނަށް އެދުމުގެ ފުރުސަތު ހުޅުވާލާނެ ކަމަށެވެ.
21 މާރޗުގައި އިއުލާން ކުރެވުނު 242 ޖާގައިގެ މަތީ ތައުލީމުގެ ލޯނުގެ ތެރެއިން އެންމެ ގިނަ ބަޔަކު ލޯނަށް އެދުނީ ބޭނުން ދާއިރާއަކުން ވަކި ގައުމުތަކުން ކިޔެވުމަށް ހުޅުވާލި ފުރުސަތަށެވެ. އެ ދާއިރާއިން 332 މީހުން ލޯނަށް އެދުނު އިރު ލޯނު ހަމަޖެހުނީ 30 މީހަކަށެވެ.
މި އަހަރުގެ މަތީ ތައުލީމުގެ ލޯނަށް ޖުމްލަ 54 މިލިއަން ރުފިޔާގެ ބަޖެޓެއް ވަނީ ކަނޑައަޅާފައެވެ. އެ ލޯނުގެ ފައިސާ އަނބުރާ ދައްކަން ފަށަން ޖެހޭނީ ކިޔަވައި ނިންމާތާ ހަ މަސް ފަހުންނެވެ. އެ ލޯނުގެ އިންޓަރެސްޓް ރޭޓް މިހާރު ތިން އިންސައްތައަށް ކުޑަކޮށްފައިވާއިރު، ލޯނުތައް އަނބުރާ ދެއްކުމަށް ލޯނުގެ އަދަދަށް ބަލައި 20 އަހަރާ ހަމައަށް މުއްދަތެއް ލިބޭނެއެވެ.
