ސޫދާނުގެ ހަމަނުޖެހުން: މަދަނީ ބަސްނޭހުމަކަށް އިދިކޮޅުން ގޮވާލައިފި
އިދިކޮޅު ފަރާތްތަަކުންދަނީ މަދަނީ ސަރުކާރަކަށް ގޮވާލަމުން
އިތިއޯޕިއާގެ ބޮޑުވަޒީރު އަބީ އަހުމަދު ގެންދަވަނީ ދެ ފަރާތް މަޝްވަރާގެ މޭޒަށް ގެނެވޭތޯ މަސައްކަތްކުރައްވަމުން
ސޫދާނުގެ އަސްކަރިިއްޔާއިން އާއްމުންނާ ދެކޮޅަށް ހިންގި ލޭއޮހޮރުވުން ބޮޑު ހަރަކާތްތަކުގައި އެތައް ބަޔަކު މަރުވުމުން، އެ ގައުމުގައި މަދަނީ ބަސްނޭހުމަކަށް ދިއުމަށް ސޫދާނުގެ ޑިމޮކްރަސީއަށް ގޮވާލާ ހަރަކާތުގެ އިސްކޮށް އުޅޭ އަމްބްރެއްލާ ގްރޫޕުން ގޮވާލައިފިއެވެ.
އެ ޖަމާއަތުން ވަނީ އާދީއްތަ ދުވަހު އެ ހަރަކާތް ފަށައި މަދަނީ ސަރުކާރެއް ގާއިމްކުރެވެންދެން ކެމްޕެއިން ކުރިޔަށް ގެންދިއުމަށް ގޮވާލާފައެެވެ.
ނަމަވެސް މަދަނީ ބަސްނޭހުމުގެ ތެރެއިން ކުރިޔަށް ގެންދަނީ ކޮން ހަރަކާތްތަކެއް ކަމެއް ސާފެއް ނުވެއެވެ.
މި ގޮވާލުން އައިސްފައި މިވަނީ އަސްކަރިއްޔާ އާއި މުޒާހަރާ ކުރާ ފަރާތްތަކާ ދެމެދު ވާހަކަދެއްކުމުގައި އިދިކޮޅު ފަރާތްތައް ތަމްސީލުކުރާ ތިން މީހަކު ހައްޔަރު ކުުރުމާ އެކުއެވެ.
އެ މީހުން ވަނީީ ސުލްހައިގެ ވާހަކަތައް އަލުން ފަށައިގަނެވޭތޯ އިތިއޯޕިއާގެ ބޮޑުވަޒީރާ ބައްދަލުކޮށްފައެވެ.
އިތިއޯޕިއާގެ ބޮޑުވަޒީރު އަބީ އަހުމަދުއާ ބައްދަލުކުރިތާ ގިނަ އިރެއް ނުވެ އިދިކޮޅު ސިޔާސީ ލީޑަރެއް ކަމަށްވާ މުހައްމަދު އިސްމަތު ހުކުރު ދުވަހު ހައްޔަރުކޮށްފައިވާ ކަމަށް އޭނާގެ އަރިސް ފަރާތަކުން ވަނީ ބުނެފައެވެ. މީގެ އިތުރުން ރިބެލް އެސްޕީއެލްއެމް-އެން ގްރޫޕުގެ ލީޑަރ އިސްމާއީލް ޖަލަބް އާއި އޭނާގެ ތަރުޖަމާނު މުބާރަކް އާދިލް ވަނީ ހޮނިހިރު ދުވަހުގެ ހެނދުނު ހައްޔަރުކޮށްފައެވެ.
މުޒާހަރާގެ ލީޑަރުން ވަނީ އެ ގަައުމުގެ ވަގުތީ ސަރުކާރު، ޓްރާންސިޝަނަލް މިލިޓަރީ ކައުންސިލް (ޓީއެމްސީ) އިން ލޭ އޮހޮރުވުން ހިންގާފައިވާ ކަމަށް ބުނެ މަޝްވަރާއަށް ގޮވާލި ގޮވާލުމަށް ދެކޮޅު ހަދާފައެވެ.
ސޫދާނުގެ ދުވަސްވީ ލީޑަރު އުމަރު އަލްބަޝީރުގެ ވެރިކަން މުޒާހަރާތަކަކަށް ފަހު އޭޕްރީލް މަހު ވައްޓާލިފަހުން އެގައުމުގެ ކޮންޓްރޯލް އޮތީ ޓީއެމްސީގެ އަތުގައެވެ.
މަދަނީ ވެރިކަމަކަށް ބަދަލުކުރާނެކަމަށް އަސްކަރިއްޔާއިން ވައުދުވެފައި ވީނަމަވެސް،މިދިޔަ ހަފްތާގެ ހޯމަ ދުވަހު ސަލާމަތީ ބާރުތަކުން އެތަނުން ފައްސާލުމާ ހަމައަށް މުޒާހަރާކުރާ ފަރާތްތައް ތިބީ ވެރިރަށް ޚަރްތޫމްގައި ހުންނަ އަސްކަރިއްޔާގެ މައި މަރުކަޒުގެ ކުރިމަތީގައި އިށީނދެގެންނެވެ.
