މޯލްޑިވްސް ޕޮލިސް ސާވިސްގެ ކޮލެޖެއް ކަމަށްވާ އިންސްޓިޓިއުޓް ފޯރ ސެކިއުރިޓީ އެންޑް ލޯ އެންފޯސްމަންޓް ސްޓަޑީސް (އައިލްސް) ފުރަތަމަ މާސްޓާސް ޕަރޮގްރާމްގައި ބައިވެރިވުމުގެ މުއްދަތު އިތުރުކޮށްފިއެވެ.
ލޯއެންފޯސްމެންޓް ނުވަތަ ސެކިއުރީޓީ ދާއިރާ އިން ކުރިއަށް ގެންދިއުމަށް ހަމަޖެހިފައިވާ މާސްޓަރ އޮފް ލީޑަރޝިޕް އެންޑް މެނޭޖްމަންޓް (ޕޮލިސިން އެންޑް ސެކިއުރިޓީ) މި ކޯސް ކުރިއަށް ގެންދަނީ އޮސްޓްރޭލިއާގެ ޗާލްސްޓަޓް ޔުނިވާސިޓީ އާއި އެފިލިއޭޓް ވެގެން ކަމަށާއި މިކޯހަށް އެދި ހުށަހެޅުމުގެ އެންމެ ފަހުގެ ތާރީހަކީ ޖޫން މަހުގެ 30ގެ ނިޔަލަށެވެ.
މި ކޯހުގައި މުޅިން ވެސް ކިޔަވައިދޭނީ އޮސްޓްރޭލިއާގެ ބޭފުޅުން ކަމަށެވެ.
ކޯހުގެ މޮޑިއުލްތަކަކީ ލޯއެންފޯސްމެންޓް ނުވަތަ ސެކިއުރީޓީ ދާއިރާއަށް އެންމެ އެކަށީގެންވާ މޮޑިއުލްތަކެއް ކަމަށާއި ދާއިރާއަށް އަލަށް ވަންނަން ބޭނުންވާ ފަރާތްތަކަށް ވެސް މީ ލިބޭ ރަނުގެ ފުރުސަތެއް ކަމަށް އައިލްސް ކޮލެޖުން ބުންޏެވެ.
ކޯސް ކުރިއަށްދާނީ އަހަރަކު ތިން ސެމިސްޓައަށް ކަމަށާއި ކޮންމެ ސެމިސްޓައެއްވެސް ކުރިއަށްދާނީ ސަރުކާރުގެ ރަސްމީގަޑި ފިޔަވާ ކޮންމެ ދުވަހެއްގެ ވެސް 4:00 ގެ ފަހުންނެވެ. އެއީ ވެސް ގިނަ ފަރާތްތަކަކަށް ފުރުސަތު ދިނުމުގެ ގޮތުން ކަމަށް އައިލްސްއިން މައުލޫމާތިދިނެވެ.
ދެ އަހަރު ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ކޯހުން 60 ފަރާތަތަކަށް ޖާގަ ދެވޭނެއެވެ. ކޯހަށް ވަނުމުގެ ޝަރުތުތަކުގެ ތެރޭގައި ގުޅޭ ދާއިރާއަކުން ބެޗްލާސް ޑިގްރީއެއް ހާސިލް ކޮށްފައިވުމާއި، ގުޅޭ ދާއިރާއަކުން ޕޯސްޓް ގުރެޖުއޭޓް ލެވެލް އަށެއްގެ ސެޓްފިކެޓެއް އޮތުން ހިމެނެއެވެ.
މީގެ އިތުރުން ވެސް ގުޅޭ ދާއިރާއަކުން ޑިޕްލޮމާއެއް އޮވެފައި މި ދާއިރާގައި ހަ އަހަރާއި ހަތް އަހަރާ ދެމެދުގެ ތަޖުރިބާ ހުރުން ޝަރުތުތަކުގެ ތެރޭގައި ހިމެނެއެވެ.
ސީއެސްޔޫއަކީ ދުނިޔޭގެ ރޭންކިންގައި 21 ވަނައިގައި އުޅޭ ޔުނިވަސިޓީއެއް ކަމަށްވާ އިރު ލޯއެންފޯސްމެންޓް ނުވަތަ ސެކިއުރީޓީ ދާއިރާގައި މި ޔުނިވާސިޓީ ރޭންކް ކުރެވިފައިވަނީ ދުނިޔޭގެ އެއް ވަނަ ޔުނިވާސިޓީގެ ގޮތުގައެވެ.
ދުނިޔޭގެ އެކި ހިސާބުތަކުގައި ސީއެސްޔޫގެ ޕްރޮގްރާމްތައް ހިންގާކަން ފާހަގަ ކޮށްލެވެއެވެ.
މިކޯހަކީ ރާއްޖޭގައި މުޅިން އަލަށް ހިންގަން ތައްޔާރުވަމުންދާ ކޯހަކަށްވެފައި، މުއްދަތު އިތުރުކުރަން ނިންމީ އިތުރު ފަރާތްތަކަށް ފުރުޞަތު ދިނުމުގެ ގޮތުން ކަމަށް އައިލްސް ކޮލެޖުން ބުންޏެވެ.
މި ޕްރޮގްރާމަކީ ގައުމުގައި މައިންބަފައިންގެ ގާތުގައި ތިބެގެން ވަޒީފާއަށް ވެސް ދަމުން ހެދިދާނެ ކޯހެއް ކަމަށް ވެސް އައިލްސް އިން މައުލޫމާތު ދެއެވެ.
