އީމާންކަން ހަރުދަނާ ކުރުމަށް ހުކުރު ހުތުބާގައި ގޮވާލައިފި
7 ޖޫން 2019 | ހުކުރު 08:26މީހާގެ އުޅުމާއި އަމަލުތަކުގެ ސަބަބުންވެސް އީމާންކަން ބަލިކަށި ވެގެން ދޭ
އިސްލާމީ މަރުކަޒު
އީމާންކަން ހަރުދަނާ ކުރުމަށް ހުކުރު ހުތުބާގައި ގޮވާލައިފިއެވެ.
"އީމަންކަން ހަރުދަނާ ކުރުން" މި މައުލޫގެ މައްޗަށް ބިނާކޮށްފައިވާ ހުތުބާގައި ބުނީ އީމާން ކަމަކީ އިސްލާމްދީނުގެ އަސާސް ކަމުން ދުންޔަވީ ހަޔާތުގެ އުފަލާއި އަރާމާއި، އާހިރަތުގެ ބާއްޖަވެރިކަން ލިބޭނީ އީމާންކަން ވަރުގަދަ ކޮށް، ހަރުދަނާ ކޮށްގެން ކަމަށެވެ.
މީގެ އިތުރުން، އީމަންކަމަކީ ހިތުގައި ސާބިތުވެފައިވާ ވަރުގަދަ އަގީދާއެއް ކަމަށާއި އެއްވެސް ފަރާތަކަށް އެއަށް ބަދަލު ނުގެނެވޭނެ ފަދަ ގޮތަކަށް އެމީހެއްގެ ހިތުގައި ބިންވަޅު ނެގިފައިވާ ޔަގީންކަމެއް ކަމަށް ހުތުބާގައި ބުނެދީފައިވެއެވެ. އަދި އެއީ އެމީހަކު ތެދުކޮށް ގަބޫލުކޮށްފައިވާ ކަށަވަރުކުރުމެއް ކަމަށާއި އިސްލާމްދީނުގެ އަސާސް ކަމުގައި ބިނާވެފައިވަނީ އެ ތެދުކުރުން ކަމުގައި ހުތުބާގައި ފާހަގަކުރިއެވެ.
އަޅުގަނޑުމެންގެ މުޖުތަމައުގައި ބޮޑެތި ކުށްތަކައް އަރައިގަންނަ މިންވަރު މިހާރު އިންތިހާއަށް އިތުރުވެފައިވާކަން ހުތުބާގައި ފާހަގަކޮށްފައިވެއެވެ.
އޭގެ އިތުރުން، އަޅުގަނޑުމެންގެ ބަލިކަށިވެފައިވާ އަގީދާއާއި އީމާންކަން ވަރުގަދަކުރެވި، އަޅުކަމުގެ ހަގީގީ ރާހަތާއި ފޮނިކަން އިހުސާސްކުރެވޭނީ މާތް ﷲ ގެ ހަޟްރަތައް ރުޖޫއަވެގެން ކަމަށާއި ކީރިތި ގުރުއާން ކިޔަވައި އޭގެ އާޔްތަތަކާމެދު ވިސްނައި ފިކުރު ހިންގުމުން ކަމަށް ހުތުބާގައި ބުނެދިނެވެ.
އަދި ގައުމުގެ ކުރިމަގު ބިނާކުރަން ތިބި ބަޔަކީ ޒުވާނުން ކަމަށްވެފައި މިހާރު ބައެއް ޒުވާނުންނަކީ ދީނާއި ދުރު، ރިވެތި އަހުލަގީ ސިފަތަކަށް ބީރައްޓެހިވެފައިވާ ބައެއް ކަމަށާއި އެހެންކަމުން ހުރިހާ ކަމެއްވެސް ބައްޓަން ކުރަންވާނީ އިސްލާމްދީނުގެ ހަމަތަކާއި އެއްގޮތަށް ކަމަށާއި ތައުލީމީ މަންހަޖުގައި ހުރި އަގީދާއާއި އީމާންކަމުގެ ބައިތަކާއި ވާހަކަތައް ފުރިހަމައަށް ތަންފީޒު ކުރަން ޖެހޭކަން ހުތިބާގައި ހަނދާން ކޮށްދީފައިވެއެވެ.
