މޯދީގެ ދަތުރުފުޅާ ގުޅިގެން ގްރީން ޒޯނާ އެކު ބޮޑު ސަރަހައްދެއް ބަންދުކުރަން ނިންމައިފި
6 ޖޫން 2019 | ބުރާސްފަތި 04:56މަގުތައް ބަންދު ކުރަނީ ސެކިއުރިޓީ ބޭނުމަށް
ބަންދުކުރަން ނިންމާފައިވާ ސަރަހައްދުގެ މަގު ޗާޓު
އިންޑިއާގެ ބޮޑު ވަޒީރު ނަރެންދުރަ މޯދީގެ ދަތުރުފުޅާ ގުޅިގެން ގްރީން ޒޯނާ އެކު ބޮޑު ސަރަހައްދެއް ބަންދުކުރަން ނިންމައިފިއެވެ.
ފުލުހުން ބުނީ މޯދީގެ ދަތުރުފުޅާ ގުޅިގެން ސެކިއުރިޓީ ބޭނުމަށް ޗާޓުގައި ރަތްކުލައިން ފާހަގަކޮށްފައިވާ ޒޯންތަކުގައި މި މަހުގެ 6 ވަނަ ދުވަހުގެ ރޭ 7:00 އިން މި މަހުގެ 8 ވަނަ ދުވަހުގެ ރޭ 00:00 އަށް އެއްގަމު އުނޅަދު ޕާކު ކުރުމަކީ މަނާ ކަމެއް ކަމަށެވެ.
ގްރީން ޒޯނާ އެކު އިންވެގެން ހުރި މަގުތައް ވެސް ބަންދުކުރުމަށް ނިންމާފައިވާއިރު، ބައެއް މަގުތައް އެއްކޮޅަށް ދުއްވޭ ގޮތަށް (ވަންވޭ) ހެދުމަށް ނިންމާފައިވާ ކަމަށް ފުލުހުން ބުންޏެވެ.
އިންޑިއާގެ ބޮޑުވަޒީރުގެ މަގާމަށް ދެ ވަނަ ދައުރަކަށް އިންތިހާބުވެ ވަޑައިގެންނެވި ނަރެންދުރަ މޯދީ މަގާމާ ހަވާލުވެވަޑައިގަތުމަށް ފަހު ފުރަތަމަ ފަހަރަށް އިންޑިއާ އިން ބޭރަށް ކުރައްވާ ދަތުރުފުޅުގައި ރާއްޖެ ވަޑައިގެން، ރައްޔިތުންގެ މަޖިލީހުގައި ތަގުރީރު ކުރެއްވުމަށް ދައުވަތު ދިނުމަށް މަޖިލީހުން ފާސްކޮށްފައި ވަނީ 29 މެއިގައި އޮތް ރައްޔިތުންގެ މަޖިލީހުގެ ޖަލްސާގައެވެ. މަޖިލީހުގައި މޯދީ ތަގްރީރުކުރައްވާނީ ހޮނިހިރު ދުވަހުގެ ރެއެވެ.
މޯދީ ވަނީ ރައީސް އިބްރާހީމް މުހައްމަދު ސޯލިހް ހުވާކުރެއްވުމުގެ ޖަލްސާ އަށް ވެސް ވަޑައިގެންފައެވެ.
