އިޔާދަކުރަނިވި ހަކަތައަށް ބަދަލުވާން ފެނަކައިން ތައްޔާރުވެއްޖެ!
5 ޖޫން 2019 | ބުދަ 22:34އިޔާދަކުރަނިވި ހަކަތައަށް ދިއުމަށް ގިނަ މަސައްކަތްތަކެއް ކުރެވިފައިވާކަމަށް ވިދާޅުވި
ފެނަކަ ކޯޕްރޭޝަންގެ މޭނޭޖިން ޑިރެކްޓަރ ސައީދު، ރާއްޖެޓީވީގެ ފަލަސުރިހީގައި
އިޔާދަކުރަނިވި ހަކަތައަށް ބަދަލުވުމަށް ގިނަ މަސައްކަތްތަކެއް ކުރެވިފައިވާކަމަށް ފެނަކަ ކޯޕަރޭޝަންގެ މޭނޭޖިން ޑިރެކްޓަރ އަހުމަދު ސައީދު ވިދާޅުވެއްޖެއެވެ.
ޑީސަލް އަންދައިގެން ކަރަންޓު އުފެއްދުމުގެ ބަދަލުގައި އިޔާދަކުރެނެވި ހަކަތައިން ކަރަންޓު އުފެއްދުމަށް ކުރަމުން އަންނަ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ސައީދު ވިދާޅުވީ ފެނަކަ ކޯޕްރޭޝަނުން އިޔާދަކުރަނިވި ހަކަތައިން ކަރަންޓު އުފެއްދުމަށް ތައްޔާރުވެ، ރާއްޖޭގެ ގިނަ ރަށްރަށުގައި އިޔާދަކުރަނިވި ހަކަތާގެ ވިޔުގައި ގާއިމްކުރުމަށް ކުރަންޖެހޭ މަސައްކަތައް ކޮށްފައިވާ ކަމަށެވެ. އެގޮޮތުން އެކަމަށްޓަކައި ކުރަންޖެހޭ ކަރުދާހުގެ ގިނަ މަސައްކަތްތައް މިހާރު ނިމިފައިވާކަމަށް ސައީދު ވިދާޅުވި އެވެ.
ސައީދު ވިދާޅުވީ ސަރުކާރުގެ ވިސްނުމަކީ 70 އިންސައްތަ ހަކަތަ ސޯލާ ޕެނަލާއި، ތިމާވެއްޓާއި ރައްޓެހި ގޮތްތަކުން އުފެއްދުންކަމަށެވެ.
އިޔާދަކުރަނިވި ހަކަތައަށް ބަދަލުވުމުން މިހާރު ދިމާވާ ގިނަ މައްސަލަތަކަކަށް ހައްލު އަންނާނެކަން ފާހަގަކޮށް ސައީދު ވިދާޅުވީ، އިތުބާރާއި، ޔަޤީންކަމާއެކު ރައްޔިތުންނަށް ހިދުމަތް ލިބޭނެކަމަށެވެ. އަދި އެއާއިއެކު އަގަށްވެސް ބޮޑެތި ބަދަލުތަކެއް އައިސް، ރައްޔިތުންނަށް ބޮޑެތި ފަސޭހަތަކެއް ލިބިގެންދާނެކަން ސައީދު ފާހަގަކުރެއްވި އެވެ.
ސައީދު ވިދާޅުވީ އާންމު ފަރުދުންނަށް ވެސް އަމިއްލަ ގޭގައި ހަކަތަ އުފައްދައިގެން ސަރުކާރުން ގެންގުޅޭ ވިއުގާ ތެރެއަށް އެމީހުންގެ ކަރަންޓު ވިއްކުގެ ނިޒާމެއް ގާއިމްވެގެން ދިއުމަކީ ރައްޔިތުން މިކަމަށް ކުރާ ހަރަދުތައް އިންތިހާއަށް ކުޑަވެގެންދާ ކަމެއް ކަމަށެވެ. އަދި ވިދާޅުވީ ހިސާބުތަކުން ދައްކާގޮތުގައި އިޔާދަކުރަނިވި ނިޒާމެއްގެ ގާއިމްކުރެވިއްޖެނަމަ ތެލަށް ކުރާ ހަރަދުގެ 30 އިންސައްތަ ކުޑަކުރެވިގެންދާނެ ކަމަށެވެ.
