ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ހދ. ކުޅުދުއްފުއްޓަށް ވެސް ބޮޑެތި ގެއްލުންތަކެއް ވެއްޖެއެވެ.
ރާއްޖެޓީވީގެ ސުންގަނޑި ޕްރޮގްރާމަށް ދެއްވި ހާއްސަ އިންޓަވިއުއެއްގައި އެ ރަށު ކައުންސިލްގެ ރައީސް އަބްދުއްލަތީފް ހަސަން ވިދާޅުވީ ވިއްސާރައިގެ ސަބަބުން ބައެއް ސަރަހައްދުތަކުގައި ތިން ފޫޓަށް ފެން ބޮޑުވި ކަމަށާއި ގިނަ ގެތަކަށް ފެން ވަދެފައިވާ ކަމަށެވެ. އަދި މި ވަގުތު އެންމެ ބޮޑަށް ދަތިވަނީ ވިއްސާރަވެ، ފެންބޮޑުވުމުގެ ސަބަބުން ނަދުރަމާގެ ނިޒާމް ހުއްޓުމަކަށް އައިސްފައިވުމުން ކަމަށް އޭނާ ވިދާޅުވިއެވެ.
މިހާތަނަށް ދިރިނޫޅެވޭ ވަރަށް ހަތަރު ގެއަކަށް ފެން ވަދެ ގެއްލުންވިކަން ފާހަގަކުރައްވާ އަބްދުއް ލަތީފް ވިދާޅުވީ އޭގެ ތެރެއިން ދެ އާއިލާ ގެސްޓްހައުސްއަށް ބަދަލުކުރެވި، އަނެއް ދެ އާއިލާ އެހެން ދެ ގެއަކަށް ބަދަލުކުރެވިފައިވާ ކަމަށެވެ. އަދިވެސް ގިނަ ގެތަކަށް ގެއްލުންވުމުން، ޖުމްލަ މުޅި ރަށަށް ލިބުމުނު ގެއްލުމުގެ މިންވަރު އަންދާޒާ ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ކުރިއަތް އޮތް ތާނގައި މޫސުން އަދިވެސް ގޯސްވާ ނަމަ، ނުރައްކާ ހާލަތަކަށް ވެއްޓިގެންދާނެ ކަމުގެ ބިރު އެބައޮތް ކަމަށް ވެސް ކުޅުދުއްފުށީ ކައުންސިލްގެ ރައީސް ވިދާޅުވިއެވެ.
ކުރިއަށް އޮތް 24 ގަޑިއިރު ރާއްޖޭގެ ބޮޑުބަޔަކަށް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާއިން ބުނެފައިވާއިރު ވިއްސާރައިގައި ބޯކޮށް ވާރޭ ވެހި ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭތީ ހުރިހާ ފަރާތްތަކުން، ޚާއްސަކޮށް ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
