ފްރެންކްފާޓް ދޫކޮށް ޖޮވިކް ރެއާލްއަށް ސޮއިކޮށްފި
4 ޖޫން 2019 | އަންގާރަ 14:06ޖޮވިކް ސޮއިކުރީ ހަ އަހަރުގެ އެއްބަސްވުމުގެ ދަށުން
ލޫކަ ޖޮވިކް
ފްރެންކްފާޓް ދޫކޮށް ސާބިއާގެ ސްޓްރައިކަރ ލޫކަ ޖޮވިކް ރެއާލް މެޑްރިޑަށް ސޮއިކޮށްފިއެވެ.
އުމުރުން 21 އަހަރުގެ ޖޮވިކް ރެއާލްއަށް ސޮއިކޮށްފައިވަނީ 70 މިލިއަން ޔޫރޯގެ ޓްރާންސްފާއެއްގެ ދަށުން ހަ އަހަރަށެވެ.
ރެއާލްއިން ނެރުނު ބަޔާނެއްގައި ބުނީ، ޖޮވިކްގެ ސޮއި އެ ކްލަބުން ހޯދާފައިވާ ކަމަށާއި، އޭނާ ކްލަބުގައި 2025 ވަނަ އަހަރުގެ ނިޔަލަށް މަޑުކުރާނެ ކަމަށެވެ. އަދި އޭނާގެ މެޑިކަލް ވަރަށް އަވަހަށް ފުރިހަމަކުރާނެ ކަމަށްވެސް ރެއާލްއިން ބުނެއެވެ.
ޖޮވިކް ރެއާލްއަށް ބަދަލުވެފައިވަނީ ކުރިޔަށް އޮތް ސީޒަނަށް އަމާޒުކޮށް އޭނާ ހޯދުމަށް ގިނަ ކްލަބްތަކުން މަސައްކަތް ކުރަމުން އައި ދަނޑިވަޅެއްގައެވެ. އޭނާ ހޯދުމަށް ބާސެލޯނާއިންވެސް މަސައްކަތް ކުރިއެވެ.
ސާބިއާގެ ރެޑް ސްޓާއިން 2012 ވަނަ އަހަރު ކެރިޔަރު ފެށި ޖޮވިކް ވަނީ ބެންފީކާއަށްވެސް ކުޅެފައެވެ. އޭނާ ވަނީ ރެޑް ސްޓާއާއެކު ސާބިއަން ސުޕަލީގް ކާމިޔާބުކޮށްފައެވެ.
ބެންފީކާގެ ޔޫތު ޓީމަށްވެސް މެޗުތަކެއް ކުޅެ ލަނޑުތަކެއްވެސް ކާމިޔާބުކޮށްފައިވާ ޖޮވިކް ވަނީ އެ ކްލަބުގެ ސީނިއާ ޓީމަށް ހަތަރު މެޗު ކުޅުމުގެ އިތުރުން، އެ ކްލަބާއެކު ދެ ލީގު ތަށި ހޯދާފައެވެ.
ލޯން އެއްބަސްވުމެއްގެ ދަށުން 2017 ވަނަ ސީޒަނުގައި ފްރެންކްފާޓްއަށް ބަދަލުވި ޖޮވިކް ވަނީ އެ ކްލަބާއެކު ޖަރުމަން ކަޕް ކާމިޔާބުކޮށްފައެވެ. އަދި އޭނާ ވަނީ އެ ކްލަބަށް ކުޅުނު 75 މެޗުގައި 36 ލަނޑު ކާމިޔާބުކޮށްފައެވެ.
ސާބިއާ ގައުމީ ޓީމަށް ހަތަރު މެޗު ކުޅެ އެއް ލަނޑު ކާމިޔާބުކޮށްފައިވާ ޖޮވިކް ވަނީ އެ ސާބިއާގެ އެކި އުމުރުފުރާތަކުގެ ގައުމީ ޓީމުތަކަށްވެސް ކުޅެފައެވެ.
