އީދު ބަންދުގައި ވިއްސާރަވާނެ، ރައްކާތެރިކަމުގެ ފިޔަވަޅުއަޅުއްވާ: އެޗްޕީއޭ
3 ޖޫން 2019 | ހޯމަ 17:59ފަސޭހައިން ފެތުރެމުންދާ ބަލިތަކަށް ދުރާލާ ފިޔަވަޅުއެޅުން މުހިންމު
އީދު ދުވަސް ފާހަގަކުރަނީ
އީދު ބަންދު ދުވަސްވަރުގައި ވިއްސާރާވާނެ ކަމަށް ލަފާކުރެވޭތީ އެއްވެ އުޅޭތަންތަނުގައި ސިއްހީ ގޮތުން ރައްކާތެރި ފިޔަވަޅުތައް އަޅުމަށް ހެލްތު ޕްރޮޓެކްޝަން އެޖެންސީން އިލްތިމާސްކޮށްފިއެވެ.
އެޗްޕީއޭ އިން ބުނީ އީދު ބަންދުގެ ދުވަސްވަރު ގިނަ އަދަދެއްގެ ބަޔަކު އަތޮޅުތެރެއަށާއި ރާއްޖެއިން ބޭރަށް ދަތުރުކޮށް އުޅުމާއި އެއްތަނަކަށް އެއްވެ އުޅުން އިތުރުވާނެތީ ސިއްހީ ގޮތުން ރައްކާތެރި ފިޔަވަޅުތައް އަޅަންޖެހޭ ކަމަށެވެ.
އެޗްޕީއޭއިން ބުނީ ފަސޭހައިން ފެތުރެމުންދާ ބަލިތަކަށް ސަމާލުވެ ދުރާލާ ރައްކާތެރި ކަމުގެ ފިޔަވަޅުއެޅުން ވަރަށް މުހިންމު ކަމަށެވެ. ޑެންގީހުމާއި ޗިކުންގުންޔާ، ވައިރަލް ހުން، ބޭރަށް ހިންގުން، އަރިދަފުސް ރޯގާ ފަދަ ބަލިތަކުން ރައްކާތެރިވެ ތިބުމަށް ޚާއްސަ ސަމާލުކަމެއް ދިނުމަށް އެ އިދާރާ އިން ވަނީ އިލްތިމާސްކޮށްފައެވެ.
ޗިކުންގުންޔާއަކީ ވެސް ޑެންގީ ހުން ފަތުރާ މަދިރިކަމުގައިވާ އީޑީސް މަދިރީގެ ޒަރިއްއާ އިން ފެތުރޭ ބައްޔެއްކަން ފާހަގަކޮށް އެޗްޕީއޭ އިން ވަނީ ބަލިން ރައްކާތެރިވުމުގެ ފިޔަވަޅުތައް އެޅުމަށް ގޮވާލައިފަ އެވެ. އެ ގޮތުން ހަށިގަނޑު ރަނގަޅަށް ނިވާވާ ގޮތަށް ހެދުން އެޅުމަށާއި، މަދިރި ލޯޝަން ބޭނުން ކުރުމަށާއި، ސްޕްރޭ ބޭނުން ކުރުމަށް އެޗްޕީއޭއިން އިލްތިމާސް ކޮށްފައިވެއެވެ. އަދި ތިން ދުވަހަށް ވުރެ ގިނައިން ހުން އަންނަނަމަ، އަދި ޑެންގީގެ އެއްވެސް އަލާމާތެއް ފެނިއްޖެ ނަމަ ސިއްހީ އެހީތެރިއެއްގެ އެހީ ހޯދުމަށް އެ އެޖެންސީން އެދިފައި ވެއެވެ.
