ރާއްޖޭގައި އެކި ހިސާބުތަކުގައި ވިއްސާރަވެ ފެންބޮޑުވަމުން އަންނާތީ، އެކަމަށް ހައްލެއް ހޯދުމަށް ކާށިދޫ ދާއިރާގެ މެމްބަރު އަބްދުﷲ ޖާބިރު މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.

ކުއްލި މައްސަލަ ހުށަހަޅުއްވަމުން ޖާބިރު ވިދާޅުވީ ވިއްސާރަވެ ރަށްރަށަށް ލިބެމުންދާ ގެއްލުންތަކަށް ސަރުކާރުން ހައްލު ހޯދައިދޭންޖެހޭނެ ކަމަށެވެ.

ޖާބިރު ހުށަހެޅުއްވި މައްސަލައަށް ތާއީދު ކުރައްވާ މެމްބަރުން ވަނީ ވާހަކަފުޅު ދައްކަވާފައެވެ. ވިލުފުށީ ދާއިރާގެ މެމްބަރު ހަސަން އަފީފް ވިދާޅުވީ ވިއްސާރަވެ ފެންބޮޑުވާ މައްސަލައަށް ހައްލެއް ހޯދަންޖެހޭ ކަމަށެވެ. އަފީފް ވިދާޅުވީ ވިއްސާރަވެ މޫސުމް ގޯސްވުމުގެ ސަބަބުން، އެ ދިމާވާ ހާދިސާތަކަކީ ދުނިޔޭގެ ހުރިހާ ގައުމުތަކަށް ވެސް ދިމާވަމުން އަންނަ ކަންކަން ކަމަށެވެ. އެކަންކަމުން ލިބޭ ގެއްލުންތަކުން ރައްކާތެރިވުމުގެ ފިޔަވަޅު ދުރާލާ އަޅައިގެން ތިބުމުން މުހިއްމު ކަމަށެވެ.

ރާއްޖެއަށް ވިއްސާރަވެ މޫސުމް ގޯސްވުމުގެ ސަބަބުން ގެއްލުން ލިބުނު ދާއިރާތަކުގެ ތެރޭގައި ހިމެނޭ ލ. ގަމު ދާއިރާގެ މެމްބަރު މުހައްމަދު ވިސާމް ވިދާޅުވީ ވިއްސާރަވެ ފެންބޮޑުވި ރަށްރަށަށް އެހީތެރިކަން ފޯރުކޮށްދިނުމުގައި ސަރުކާރުން ވަރަށް އަވަސް ފިޔަވަޅުތަކެއް އެޅުއްވިކަން ފާހަގަކުރެވުނު ކަމަށެވެ.

ފާއިތުވި ހަފްތާގައި ރާއްޖެއަށް ކުރި ވިއްސާރައިގައި ލ އަދި ތ އަތޮޅުގެ ރަށްތަކަށް ވަނީ ބޮޑެތި ގެއްލުންތަކެއް ލިބިފައެވެ. އެ ރަށްރަށުގެ ގެތަކަށް ފެން ވަދެ، ހިފާ ގެންގުޅޭ ތަކެތި ވަނީ ހަލާކުވެފައެވެ.