ބ އަތޮޅު ފެހެންދޫގެ ދަރިވަރުން އެ އަތޮޅު ގޮއިދޫ ސްކޫލަށް ދިއުމަށް ބޭނުންވާ ފެރީއެއް ހަމަޖެއްސުމަށް އިންޑިއާ ސަރުކާރުން ހިލޭ އެހީ ހަމަޖައްސަވައިފިއެވެ.
އިންޑިއާ ސަރުކާރުން ދިވެހި ރާއްޖެއަށް ދެއްވާފައިވާ 106 މިލިއަން ދިވެހި ރުފިޔާ (6.9 މިލިއަން އެމެރިކާ ޑޮލަރު) ގެ ހިލޭ އެހީގެ ތެރެއިން 1.5 މިލިއަން ރުފިޔާ ސަރުކާރުން އެ ޕްރޮޖެކްޓަށް ކަނޑައަޅުއްވާފައިވާއިރު، އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ފެހެންދޫ ކައުންސިލުގެ ނައިބް ރައީސް އިބްރާހިމް ފަޒީލް ވިދާޅުވީ، އެރަށު ސުކޫލު ދަރިވަރުން މިހާރު ކިޔަވަމުންދަނީ ވަރަށް ދަތި ހާލުގައި ކަމަށެވެ.
ފަޒީލް ވިދާޅުވީ، ފެހެންދޫ ސުކޫލު ދަރިވަރުން އެ އަތޮޅު ގޮއިދޫ ސުކޫލަށް ދިއުމަށް ކޮންމެ ދުވަހަކު ވެސް ބޭނުން ކުރަނީ މަތި ހިޔާކޮށްފައި އޮންނަ 18 ފޫޓުގެ ޑިންގީއެއް ކަމަށާއި، ކޮންމެ ދުވަހަކު ވެސް ގާތްގަނޑަކަށް 3 ދަތުރު ކުރަންޖެހޭ ކަމަށެވެ. އެގޮތުން ފަތިހު 6:00 ހާއިރު ސުކޫލަށް ދިއުމަށް ފުރަތަމަ ދަތުރުކުރާއިރު، އިންޓަރވަލް ގަޑީގައި ކޮންމެ ދުވަހަކުވެސް ބެލެނިވެރިން ޑިންގީގައި އިންޓަރވަލް ހިފައިގެންދާ ކަމަށް ފަޒީލް ވިދާޅުވިއެވެ. އޭގެ އިތުރުން ، ސުކޫލު ނިންމުމަށްފަހު ވެސް ޑިންގީގައި ފެހެންދޫއަށްދާއިރު، ހުޅަނގު މޫސުމުގައި ވިއްސާރަވެ ވައިގަދަވެއްޖެނަމަ ދަތުރު ނުކުރެވި ތިބެންޖެހޭ ކަމަށްވެސް ފަޒީލް ވިދާޅުވިއެވެ.
ފެހެންދޫ ސުކޫލުގައި ގާތްގަނޑަކަށް 26 ކުދިން ކިޔަވާއިރު، ރައްކާތެރިކަމާއެކު ސުކޫލަށް ދިއުމަށް ބޭނުންވާނެ އެކަށީގެންވާ ފެރީގެ ނިޒާމެއް ބޭނުންވާ ކަމަށްވެސް ފަޒީލް ވިދާޅުވިއެވެ.
އިޖްތިމާއީ-އިޤްތިޞާދީ ތަރައްގީއަށް ބޭނުންވާ ޕްރޮޖެކްޓުތައް ހިންގުމަށްޓަކައި އިންޑިއާ ސަރުކާރުން ހިލޭ އެހީ ރާއްޖެއަށް ދިނުމަށް އެއްބަސްވީ މި އަހަރުގެ މާރިޗް މަހު 17 އިން 18 އަށް އިންޑިއާގެ މިނިސްޓަރ އޮފް އެކްސްޓާރނަލް އެފެއާޒް ހަރ އެކްސަލަންސީ ސުޝްމާ ސްވަރާޖް ރާއްޖެއަށް ކުރެއްވި ރަސްމީ ދަތުރުފުޅުގައެވެ. މި އެހީގެ ދަށުން ހިންގާ ޕްރޮޖެކްޓުތައް ހިންގާނީ ރާއްޖޭގެ ކަމާބެހޭ މުއައްސަސާތައް ގުޅިގެންނެވެ.
ކުރީގައި ފެހެންދޫގެ ސްކޫލްގައި ކިޔަވައިދިން ނަމަވެސް ރަށުގެ އާބާދީ ކުޑަވުމުގެ ސަބަބުން އެ ސުކޫލު 2008 ގައި ވަނީ ބަންދުކޮށްފައެވެ. އެގޮތުން އާބާދީގައި 300 އެއްހާ މީހުން ހިމެނޭ އެ ރަށުގައި މިހާރު ބޭނުންކުރަމުންދާ ޑިންގީ ބާވެ، ހަލާކުވަމުންދާ ކަމަށް އެރަށު ކައުންސިލުން މައުލޫމާތުދެއެވެ.
މިހިލޭ އެހީއަކީ މި އަހަރުގެ މާރިޗް މަހު 17 އިން 18 އަށް އިންޑިއާގެ މިނިސްޓަރ އޮފް އެކްސްޓާރނަލް އެފެއާޒް ހަރ އެކްސަލަންސީ ސުޝްމާ ސްވަރާޖް ރާއްޖެއަށް ކުރެއްވި ރަސްމީ ދަތުރުފުޅުގައި ރާއްޖޭގެ އިޖްތިމާއީ-އިޤްތިޞާދީ ތަރައްގީއަށް ބޭނުންވާ ޕްރޮޖެކްޓުތައް ހިންގުމަށްޓަކައި އިންޑިއާ ސަރުކާރުން ދިން އެހީއެކެވެ.
