ޖަރުމަނުވިލާތުގެ ބަރލިން ގައި އަންގާރަ ދުވަހު ބާއްވާ ބަރލިން ކްލައިމެޓް އެންޑް ސެކިއުރިޓީ ކޮންފަރެންސާ, ޖަރމަން-އޭޝިއަން ބިޒްނަސް ޑައިލޮގްގައި ބައިވެރިވެވަޑައިގަތުމަށް މިނިސްޓަރ ޝާހިދު ޖަރުމަންވިލާތަށް ފުރާވަޑައިގެންފިއެވެ.
ޖަރުމަނުގެ ފޮރިން މިނިސްޓްރީން އިންތިޒާމް ކޮށްގެން ބާއްވާ ބަރލިން ކްލައިމެޓް އެންޑް ސެކިއުރިޓީ ކޮންފަރެންސަކީ ގައުމުތަކުގެ ސަރުކާރުގެ އިސްވެރިންނާ، އަމިއްލަ ޖަމްއިއްޔާ އަދި ޖަމައަތްތަކުން އެންމެން އެއްމޭޒު ދަށުގައި މޫސުމަށް އަންނަ ބަދަލުތަކާއި، ދުނިޔޭގެ ސުލްހަ މަސްލަސްކަމާއި ބެހޭ ގޮތުން މަޝްވަރާ ކުރުމަށް ބާއްވަ ކޮންފަރެންސްއެކެވެ.
މި ދަތުރުފުޅުގައި ޝާހިދު ބައިވެރިވެވަޑައިގަންނަވާ ޖަރމަން-އޭޝިއަން ބިޒްނަސް ޑައިލޮގް އަކީ އޭޝިއާ ބައްރުގެ ގައުމުތަކާއި ޖަރުމަނުވިލާތާ އިގްތިސާދީ ގޮތުން ހުޅުވާލުމުގެ ގޮތުން ބާއްވާ ޑައިލޮގްއެކެވެ. މި ފަހަރުގެ ސަމިޓްގައި މައިގަނޑު އަލިއަޅުވާލަން ހަމަޖެހިފައިވަނީ ޒަމާނީ ޓެކްނޮލޮޖީއާ ސްމާޓް ސިޓީއާ ބެހޭ ގޮތުންނެވެ.
ޝާހިދު ޖަރުމަނަށް ވަޑައިގެންފައިވާއިރު އޭޕްރީލް މަހު އޭނާ ވަނީ ޖަރުމަނަށް ދަތުރުފުޅެއް ކުރައްވާފައެވެ. އެ ދަތުރުފުޅަކީ ބަރލިންގައި ކުރިއަށް ދިޔަ ހަކަތައާ ބެހޭ ކޮންފަރަންސެއް ކަމަށްވާ 'ފިފްތް ބަރލިން އެނާރޖީ ޓްރާންސިޝަން ޑަޔޮލޮގް 2019' ގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ. އެ ދަތުރުފުޅުގައި ޝާހިދު ވަނީ ފެޑެރަލް މިނިސްޓަރ ފޮރ ފޮރިން އެފެއާޒް ހެއިކޯ މާސް އާ ބައްދަލު ކުރައްވާފައެވެ.
