ށ އަތޮޅުން ފުރައިގެން މާލެ ދަތުރުކުރި ސަޕްލައި ދޯންޏެއް ޅ. ޅޮއްސާލަފުށި ކިޔާ ފަޅު ރަށަކަށް އަރައިގެން، އެމްއެންޑީއެފުން ހަރަކާތްތެރިވެއްޖެއެވެ.
މި ހާދިސާ އެމްއެންޑީއެފް އަށް ރިޕޯޓުކޮށްފައިވަނީ ރޭ 22:49 ހާއިރު ކަމަށް އެމްއެންޑީއެފުން ވިދާޅުވިއެވެ.
ހާދިސާ ހިނގި އިރު ދޯނީގައި ތިބީ ތިން މީހުންނެވެ. އޭގެތެރޭގައި ހިމެނެނީ ދިވެއްސެއްގެ އިތުރުން ދެ ބިދޭސީންނެވެ.
Advertisement
އެމްއެންޑީއެފުން އިތުރަށް ވިދާޅުވި ގޮތުގައި، ދޯނި ފަރަށް އަރައިގެން އެމްއެންޑީއެފް ނަދަން އޭރިއާ ކޯސްޓް ގާޑް ސްކޮޑްރަންގެ ޑައިވަރުންނަށް އެސަރަހައްދަށް ދެވުނު އިރު އެ ސަރަހައްދުގެ ކަނޑު ވަރަށް ގަދައެވެ.
ކޯސްޓްގާޑް ޑައިވަރުން ދަނީ އެދޯނި ފުން ކުރުމުގެ މަސައްކަތް ކުރަމުންނެވެ.
މިދިޔަ ހަފްތާގައި ކ.ކާށިދޫ ފަރަށްވެސް ބޯޓެއް އަރައިގެން އެމްއެންޑީއެފުން ހަރަކާތްތެރިވެފައިވެއެވެ.
