އިތުރު ދައުރަކަށް ކުރިމަތިލާން އަދި ނުނިންމާ ކަމަށް ސްރީލަންކާގެ ރައީސް މައިތިރިޕާލަ ސިރިސޭނާ ވިދާޅުވެއްޖެއެވެ،
އިންޑީއާގެ ބޮޑު ވަޒީރު ނަރެންދުރަ މޯދީ ހުވާ ކުރުމުގެ ރަސްމިއްޔާތަށް އިންޑިއާއަށް ވަޑައިގެން ހުންނެވި ސިރިސޭނާ ނޫސްވެރިންނާ ބައްދަލުކޮށް މިއަދު ވިދާޅުވީ، ރިޔާސީ އިންތިހާބުގައި ބައިވެރިވާން ގޮތެއް ނިންމަން އަދި އަވަސް ކަމަށެވެ. ސިރިސޭނާގެ ރިޔާސީ ދައުރު ނިމެނޭ އަންނަ އަހަރު ޖެނުއަރީ މަހުގެ ނުވަވަނަ ދުވަހަށެވެ. އިންތިހާބު އޮޮންނާނީ މި އަހަރުގެ ޑިސެމްބަރު މަހުގައެވެ.
ސިރިސޭނާ ވިދާޅުވީ އަވަސް އަރުވާލައިގެން އިތުރު ރިޔާސީ ދައުރަކަށް ކުރިމަތިލުމާ މެދު ގޮތެއް ނުނިންމާ ކަމަށެވެ.
އަންނަން އޮތް ރިޔާސީ އިންތިހާބަށް ވާދަކުރައްވާނެ ކަން މިހާތަނަށް އިއުލާން ކުރައްވާފައި ވަނީ ކުރީގެ ރައީސް މަހިންދަ ރާޖަޕަކްސަގެ ކޮއްކޯފުޅު އަދި ކުރީގެ ޑިފެންސް ސެކެޓްރީ ގޯތާބަޔަ ރާޖަޕަކްސަ އެކަންޏެވެ.
އޭޕްރިލް މަހު ލަންކާގައި ދިން އީސްޓަރ ސަންޑޭ ހަމަލާއަށް ފަހު ސިރިސޭނާގެ މަގުބޫލުކަން ވަނީ ދުވަހަކުވެސް ނުދާވަރަށް ދަށަށް ގޮސްފައެވެ. އެގޮތުން އެ ގައުމުގެ ގިނަ ބަޔަކު ވަނީ ސިރިސޭނާ އިސްތިއުފާ ދިނުމަށް ގޮވާލާފައެވެ.
