ދުނިޔޭގެ އެއްވަނަ އަންހެން ޓެނިސް ކުޅުންތެރިޔާ ޖަޕާނުގެ ނައޯމީ އޮސާކާ ފްރެންޗް އޯޕަން 2019 ގެ ތިން ވަނަ ބުރުން ބަލިވެއްޖެއެވެ.
ޕެރިސްގެ ރޯލެންޑް ގެރޮސްގައި ބޭއްވި މި މުބާރާތުގައި ނައޯމީ ބަލިވެފައި ވަނީ 23 އަހަރުގެ ކެތްރީނާ ސިނިއަކޯވާއާ ވާދަކޮށްގެންނެވެ. ނައޯމީ ބަލިކޮށްފައި ވަނީ ސީދާ ދެ ސެޓުންނެވެ.
މެޗުގެ ފުރަތަމަ ސެޓުގައި 6-4 އިން ނައޯމީ ބަލިވެފައިވާއިރު، ދެވަނަ ސެޓުގައި ވެސް 6-2 އިން ކެތްރީނާ ވަނީ ނައޯމީގެ މައްޗަށް ކުރި ހޯދާފައެވެ.
ނައޯމީއަށް އެންމެ ފުރަތަމަ ބޮޑު ކާމިޔާބީއެއް ލިބިފައި ވަނީ މިދިޔަ އަހަރުގެ ޔޫއެސް އޯޕަންގައެވެ. އޭނާ ޔޫއެސް އޯޕަން ކާމިޔާބު ކޮށްފައި ވަނީ މަޝްހޫރު ކުޅުންތެރިޔާ ސެރީނާ ވިލިއަމްސް ބަލި ކުރުމަށް ފަހުއެވެ. އެ އަށް ފަހު، އޮސްޓްރޭލިއަން އޯޕަން ކާމިޔާބުކޮށް ނައޯމީއަށް ވަނީ ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ ލަގަބު ލިބިފައެވެ.
