ލަންކާގައި ސަރުކާރު މުވައްޒަފުން ސާޅި އަޅަން މަޖުބޫރުކޮށްފި
1 ޖޫން 2019 | ހޮނިހިރު 08:45އެމީހެއްގެ ދީނުގެ އިތުރު ހެދުމެއް އެމީހަކަށް ލެވޭނެ
ސަރުކާރުގެ މުވައްޒަފުންނަށް ސާޅި އެޅުން މަޖުބޫރު ކުރީ ހުކުރު ދުވަހު
އަވަށްޓެރި ސްރީލަންކާގައި ސަރުކާރުގެ ވަޒީފާތަކުގައި މަސައްކަތް ކުރާ ހުރިހާ އަންހެނުން ސާޅި އަޅަން މަޖުބޫރު ކޮށްފިއެވެ.
ލަންކާގެ މިނިސްޓްރީ އޮފް ޕަބްލިކް އެޑްމިނިސްޓްރޭޝަން އެންޑް ޑިޒާސްޓާ މެނޭޖްމެންޓުން ހުކުރު ދުވަހު ނެރެފައިވާ ބަޔާނެއްގައި ބުނީ، އެކަން ކުރަން އެންގީ ސަލާމަތީ ސަބަބުތަކަށްޓަކައެވެ. ސަރުކާރުގެ ވަޒީފާތަކުގައި މަސައްކަތް ކުރާ އަންހެނުންނަށް އަޅަން ޖެހޭނީ ސާޅި ނުވަތަ އޮސާރީ ( ލަންކާ އަންހެނުންގެ ގައުމީ ހެދުން) އެވެ.
އެ ބަޔާނުގައިވާ ގޮތުން އެމީހެއްގެ ދީނުގެ އިތުރު ހެދުމެއް އެމީހަކަށް ލެވޭނެއެވެ. އެކަމަކު އެ ހެދުން އަޅައިގެން ހުންނަން ޖެހޭނީ ސާޅި އަޅައިގެންނެވެ.
ޕަބްލިކް އެޑްމިނިސްޓްރޭޝަނުން ނެރުނު ބަޔާނުގައި ބުނީ، މިހާރުވެސް ވަޒީފާގެ ގޮތުން އޮފިޝަލް ޔުނީފޯމް އަޅާ މުވައްޒަފުންނަށް އެ ޔުނީފޯމު އެޅޭނެ ކަމަށާއި، މާބަނޑު އަންހެނުންނަށް އެމީހުންނަށް ފަސޭހަ ހެދުމެއް ލެވޭނެ ކަމަށެވެ.
ސަރުކާރުގެ އޮފީސްތަކުގައި ސާޅި އެޅުން މަޖުބޫރު ކަމަށް ބަޔާނެއް ނެރެފައިވާއިރު، އީސްޓާ ސަންޑޭ ހަމަލާއަށް ފަހު ކާކުކަން ނޭގެ ގޮތަށް މޫނު ފޮރުވުން ވެސް ވަނީ މަނާކޮށްފައެވެ.
