އަންހެނަކު ލައްވާ ހަށިވިއްކަން އުޅުނު ބިދޭސީންތަކެއް ހައްޔަރުކޮށްފި
މި ދެމަފިރިން ރާއްޖެ އައިސްފައިވަނީ ޓުއަރިސްޓް ވިސާއެއްގައި
ފުލުހުންގެ އިދާރާ
މާލޭ ގެއެއްގެ ތެރޭގައި އަންހެނަކު ލައްވާ ހަށިވިއްކަން އުޅުނު ބިދޭސީންތަކެއް ހައްޔަރުކޮށްފިއެވެ.
ފުލުހުން ބުނީ މި މަހުގެ 20 ވަނަ ދުވަހު މައްޗަންގޮޅި ގެއެއްގައި ހަށިވިއްކާކަމަށް ފުލުހުންނަށް ލިބުނު މައުލޫމާތަކާއި ގުޅިގެން ކޯޓް އަމުރެއްގެ ދަށުން އެގެ ބަލާ ފާސްކުރެވިފައި ވާކަމަށެވެ. އަދި އެގެއިން ހަށިވިއްކުމުގެ މަސައްކަތުގައި އުޅުނު ބަންގްލަދޭޝްގެ ތިން ފިރިހެނުން ހައްޔަރު ކުރެވިފައިވާ ކަމަށާއި ވިއްކާކަމަށް ތުހުމަތު ކުރެވުނު އަންހެންމީހާ އަކީވެސް ބަންގްލަދޭޝްގެ ރައްޔިތެއް ކަމަށެވެ.
މި މައްސަލައިގައި ފުލުހުން ބެލި ބެލުމުން ފާހަގަ ކުރެވިފައިވަނީ އަންހެންމީހާ ލައްވާ ހަށިވިއްކަނީ އޭނާގެ ފިރިމީހާ ކަމަށާއި އަދި އޭނާގެ ފިރިމީހާ ކޮށްފައި ހުރި ކަމަށް ބެލެވޭ އަނިޔާތަކުގެ ނިޝާންތައްވެސް އޭނާގެ ހަށިގަނޑުގައި ހުރިކަމަށް އަދި އަންހެން މީހާގެ ޕާސްޕޯޓް އޭނާ ހިފައިގެން ދިޔަ ކަމަށް މައުލޫމާތު ލިބިފައިވާ ކަމަށެވެ. މި މައްސަލައިގައި އަންހެން މީހާއަށް ސޭފް ހައުސް ހަމަޖެހިފައިވަނީ 23 މެއި 2019 ވަނަ ދުވަހު ކަމަށާއި އަދި އެދުވަހު އޭނާ ސޭފް ހައުސްއަށް ބަދަލުކުރެވިފައިވާ ކަމަށް ފުލުހުން ބުންޏެވެ. އަދި ސޭޕް ހައުސް ހަމަޖެހެންދެން އެ އަންހެންމީހާ ހުރީ ފުލުހުންގެ ބެލުމުގެ ދަށުގައި ކަމަށް ފުލުހުން މައުލޫމާތު ދެއެވެ.
ފުލުހުން ބުނީ އެ އަންހެން މީހާގެ ފިރިމީހާގެ މައުލޫމާތު ފުލުހުންވަނީ އިމިގްރޭޝަންއާއި ހިއްސާކޮށްފައި ކަމަށާއި އެމީހާ ހޯދުމުގެ މަސައްކަތް ކުރަމުންދަނިކޮށް 25 މެއި 2019 ވަނަ ދުވަހު 22:00 ހާއިރު އިމުގްރޭޝަނުން ވަނީ އެ އަންހެން މީހާގެ ފިރިމީހާ، އަންހެން މީހާގެ ޕާސްޕޯޓް ހިފައިގެން ފުރަން އުޅެނިކޮށް ވެލާނާ އިންޓަނޭޝަނަލް އެއަރޕޯޓުން ހިފަހައްޓާފައި އެ ސާރވިސްއަށް މައުލޫމާތު ދީފައި ކަމަށެވެ. އަދި އެފިރިހެން މީހާ ވަނީ ފުލުހުންގެ ބެލުމުގެ ދަށަށް ގެނެވިފައި ކަމަށް ފުލުހުން ބުންޏެވެ.
މި ދެމަފިރިން ރާއްޖެ އައިސްފައިވަނީ ޓުއަރިސްޓް ވިސާއެއްގެ ދަށުން 15 މެއި 2019 ވަނަ ދުވަހު އެވެ.
ފުލުހުން ދަނީ މި މައްސަލަ ހިއުމަން ޓްރެފިކިންގެ ސީރިއަސް މައްސަލައެއްގެ ގޮތުގައި ބަލަމުން ކަމަށް ފުލުހުން މައުލޫމާތު ދެއެވެ.
ކްރމިނަލް ކޯޓުން ވަނީ އެ އަންހެން މީހާގެ ފިރިމީހާއަށް ހަތް ދުވަހުގެ މުއްދަތު ދީފައި ކަމަށާއި އަދި އަނެއް ތިން ފިރިހެނުންނަށް 15 ދުވަހުގެ މުއްދަތު ދީފައި ކަމަށް ފުލުހުން މައުލޫމާތު ދެއެވެ.
