އިންމަ ޓީސީއަށް ސޮއިކުރިއިރު، ފައިސަލް ދަ ގްރާންޑޭއަށް ސޮއިކޮށްފި
30 މެއި 2019 | ބުރާސްފަތި 07:37އިންމަ ޓީސީއަށް ސޮއިކުރީ ކިރަންގެ ބަދަލުގައި
ފައިސަލް (ކ) އަދި އިންމަ (ވ)
ގައުމީ ޓީމުގެ ގޯލު ކުރިން ބެލެހެއްޓި ތަޖުރިބާކާރު ކީޕަރު އިމްރާން މުހައްމަދު (އިންމަ) ޓީސީ ސްޕޯޓްސް ކްލަބަށް ސޮއިކުރިއިރު، ގައުމީ ޓީމުގެ ކީޕަރު މުހައްމަދު ފައިސަލް ދަ ގްރާންޑޭ ސްޕޯޓްސް ކްލަބަށް ސޮއިކޮށްފިއެވެ.
މިދިޔަ ސީޒަނުގެ ވަކި ހިސާބަކަށް ނިއުރޭޑިއަންޓް ސްޕޓޯސް ކްލަބަށް ކުޅުނު އިންމަ ޓީސީއަށް ގެނައީ އެ ކްލަބަށް މި ސީޒަނުގައި ކުޅެން ނިންމި ނޭޕާލް ކީޕަރ ކިރަންގެ ބަދަލުގައެވެ.
މައުލޫމާތު ލިބިފައިވާ ގޮތުގައި ކިރަން ނުގެންނަން ޓީސީން ނިންމީ ކްލަބުން ބޭނުންވި ތާރީހުގައި އޭނާ ފަރިތަކުރުންތަކުގައި ބައިވެރިވެފައިނުވާތީ އަދި ނެޕާލް ގައުމީ ޓީމުގެ އެކުވެރިކަމުގެ މެޗުތަކަކަށް ދިޔުމަށް އަމިއްލައަށް އެދިފައިވާތީއެވެ.
އިންމަ ޓީސީއަށް ސޮއިކޮށްފައިވާއިރު، މިއީ އުމުރުން 37 އަހަރުގެ އިންމަ ކުޅޭނެ ހަވަނަ ކްލަބެވެ. އޭނާ ވަނީ މީގެކުރިން ކްލަބް އީގަލްސް، ނިއު، ވިކްޓްރީ ސްޕޯޓްސް ކްލަބް، ވީބީ އައްޑޫ އެފްސީ އަދި މާޒިޔާ ސްޕޯޓްސް އެންޑް ރެކްރިއޭޝަންގެ ގޯލު ބަލަހައްޓާފައެވެ.
މިދިޔަ އަހަރު އޮތް ސާފް ޗެމްޕިއަންޝިޕްގެ މޮޅު ކުޅުންތެރިޔާގެ މަގާމު ހޯދި ގައުމީ ކީޕަރު ފައިސަލް ދަ ގްރާންޑޭއަށް ސޮއިކުރީ ބައެއް ކްލަބްތަކާ މަޝްވަރާކުރުމަށް ފަހު އެވެ.
މީގެކުރިން އޯލްޔޫތުލިންކޭޖް، ވިކްޓްރީ، ވެލެންސިއާ އަދި އީގަލްސްއަށް ވެސް ކުޅެފައިވާ ފައިސަލް މިދިޔަ ދެ ސީޒަނުގައި ވެސް ކުޅެފައިވަނީ ނިއުއަށެވެ. އޭނާ ނިއުއަށް ބަދަލުވީ 2017 ވަނަ އަހަރުގެ ސީޒަނުގައި ވެލެންސިއާއަށް ދިވެހި ޕްރިމިއާ ލީގުން ޖާގަ ނުލިބުމުން، އެ ކްލަބް ދޫކޮށްލުމަށްފަހުއެވެ.
ރާއްޖޭގެ ކީޕަރުންނަށް ފުރުސަތު އިތުރުކުރުމުގެ ގޮތުން އެފްއޭއެމުން ވަނީ 2020 ވަނަ އަހަރުން ފެށިގެން ބިދޭސީ ކީޕަރުން ނުގެނެވޭ ގޮތަށް ހަދަން ނިންމައި މިދިޔަ އަހަރު އޮކްޓޫބަރު މަހު އެކަން އިއުލާނުކޮށްފަ އެވެ. އެގޮތުން މި ސީޒަން ވެގެންދާނީ ބިދޭސީ ގޯލްކީޕަރުން ހިމަނައިގެން ކުޅެވޭނެ ފަހު އަހަރެވެ.
